پرسی ریفراندۆمی سەربەخۆیی كوردستان و ئەوە وەرچەرخانە مێژووییەی دروستی كردووە، ئەگەر لە لایەكەوە دژایەتی ناڕەوای حوكمڕانیی عێراق و هەوڵی دروستكردنی گەلەكۆمەكی لە لایەن وڵاتانی دراوسێوە زەق كردووتەوە، ئەوا لە لایەكی دیكەوە ئومێدێكی گەشی بە كوردستانییان بەگشتی و دانیشتووانی ناوچە كوردستانییەكانی دەرەوەی هەرێمی كوردستان بەتایبەتی بەخشیوە، بەوەی كە توانییان لەو پرۆسە مێژووییەدا بەشداری بكەن، كە چارەنووسی خۆیان و جیلەكانی داهاتووی كوردستان دیاری دەكات. ئەو ناچانە بە خوێنی گەشی پێشمەرگەی قارەمان و نەبەرد رزگار كراوە و تا ئێستاش لەسەر دەستی پێشمەرگەی داعش بەزێن پارێزراون. ئەو رووداوانەو هەوڵەكانی بەغدا بۆ نزیكبوونەوە، یان داگیركردنەوەی كەركووك، هەروەها چەند پرسێكی هەنوكەیی تەوەری سەرەكیی ئەم دیدارەی گوڤاری گوڵان لەگەڵ د. سیروان كەركووكی كەسایەتی ئەكادیمی و پەرلەمانتاری پێشووی عێراق پێكدەهێنن.

* لەدوای ئەنجامدانی ریفراندۆم و بەشداریی كەركووك لەو ریفراندۆمە، ئێستا كەركووك كەوتۆتە ژێر هەڕەشەی حەشدی شەعبی، ئایا ئیرادە و ورەی كەركووكییان بۆ رووبەڕووبوونەوەی هەڕەشەكانی دوژمنانی كوردستان چۆن دەخوێنیتەوە؟
- دوای ئەنجامدانی ریفراندۆم قۆناخێكی نوێ لە سەرتاسەری كوردستان دەستی پێكردووە، بێگومان ئەم قۆناخە نوێیە لە كەركووكیش هەستی پێدەكرێت و كەركووكییەكان هەست بە ئومێد و جۆش و خرۆشێكی گەورە دەكەن، پێشتر كەركووكییەكان لەوە نیگەران بوون، بۆچی ئێدارەی هەرێمی كوردستان هیچ هەنگاوێك بۆ كەركووك هەڵناگرێت، بەڵام پاش ئەوەی كەركووك بەشداری ریفراندۆمی كرد و بە (بەڵی) دەنگی بۆ سەربەخۆیی كوردستان دا، ئەوا ئێستا هەست بە قۆناخێكی نوێ دەكەن و زیاتر ورەیان بەرزە و ئامادەباشن بۆ ئەوەی بەرگری لە شارەكەی خۆیان بكەن، بەڵام خۆ دەبێت لایەنە سیاسییەكان بەتایبەتی ئەو لایەنانەی ئەمڕۆ لە شاری كەركووك گەمەی سیاسی دەكەن، ئیلهام لە ورەی بەرزی خەڵكی كەركووك وەربگرن، خەڵك رۆحییەتی فیداكاری و داكۆكیكاری لە دەستكەوتەكانی كوردستانی تێدایە، بەتایبەتی داكۆكیكردن لە ریفراندۆم كە باشترین دەستكەوتی مێژوویی كوردستانە.

* ئایا پێتوایە لایەنە سیاسییەكان لەئاست بەرپرسیارێتی ئەم بارودۆخەدا نین؟ بەتایبەتی لە كەركووكدا كە ئێستا پێویستە پاراستنی كەركووك لە سەرووی هەموو شتێكی دیكەوە بێت؟
- ئەگەر سەیری شاشەی تیڤیەكان بكەین، هەست بەم نیگەرانییە دەكەین كە من باسم لێوە كرد، هەندێك لە كادری حزبەكان، یان كە وەك نوێنەری حزبێكی دیاریكراو سەیر دەكرێت، كاتێك بۆ راگەیاندنەكان قسە دەكات، دەیەوێت قسەو لێدوانەكانی بە ئاراستەیەكدا بەرێت، بۆ ئەوەی ورەی خەڵكی بڕووخێنێت و جەماوەر تووشی شۆك و نائومێدی بكات، كە لە راستیدا دۆخەكە بەو شێوەیە نییە. هەر بۆیە لەم بارودۆخەدا ئەركی كەناڵەكانی راگەیاندن قورستر و گرنگتر دەبێت، بەتایبەتی لەم دۆخەدا كە كوردستان رووبەڕووی هەڕەشەیەكی ترسناك بووەتەوە، لە ناوخۆی عێراق و هەروەها لە لایەن وڵاتانی ئێران و توركیاوە، بەتایبەتی كە زۆر مەزهەبگەران و شۆڤێنییانە بیردەكەنەوە، ئەوەتا حەشدی شەعبی مەترسییەكی تەواوی لەسەر خەڵكی شاری كەركووك و ئاڵۆزبوونی دۆخەكە دروست كردووە، هەربۆیە دەبێت راگەیاندن لەئاست بەرپرسیارێتی دۆخەكەدا بێت، نابێت دۆخەكە بە رادەیەك بشێوێنن كە خوانەخواستە خەڵكی بترسێنن، من لەو باوەڕەدام خەڵكانێك هەیە تێكچوونی دۆخەكەی بێ خۆشە، تەنیا لەبەر ئەوەی بڵێت من نەموت بارودۆخەكە وا تێكدەچێت و ئاڵۆز دەبێت، ئەمە لەكاتێكدا دەبوایە باسی سەربەخۆیی و دەوڵەتی بكردایە و داكۆكی لەمافە رەواكانی نەتەوەكەی بكردایە.

* بەڵام بە بەردەوام دەوڵەتانی داگیركەر، كاریان لەسەر تێكدانی نێوماڵی كورد كردووەو لەمەشدا سوودیان لە نانەوەی دووبەرەكی و راكێشانی گروپ و لایەنی سیاسی كردووە بۆ ئەوەی وەكو تابووری پێنجەم لەناوخۆی كوردستان درز بخەنە ناو ئەو یەكڕیزی و یەكدەنگییەی كە ئەمڕۆ لەكوردستاندا دەبینرێت، لەو بارەیەوە راتان چییە؟
- ئەو فیتنەو دووبەرەكییە دروست كراوە و بە سەرنجێك بۆ لێدوانەكانی ئەو كەسانەی ئەمڕۆ دێنە سەر شاشەی تیڤییەكان بەئاشكرا ئەو كەسانە دەناسیتەوە كە رۆڵی تێكدانی یەكڕیزی و تەبایی نێوماڵی كورد دەبینن، بەڵام لێرەدا رۆڵی ئەو تیڤی و كەناڵانەی راگەیاندن دەردەكەون كە پێویستە ئەوان رێگە نەدەن بەو جۆرە لێدوان و قسانەو سانسۆر لەسەر هەندێك دەستەواژەو قسە دابنێن كە زیانی بۆ سەر یەكڕیزی نێوماڵی كورد هەیە، دەبێت پێشكەشكارو پەیامنێرەكە ئەو كەسانە شەرمەزار بكەن، نەك وەكو ئێستا رۆژنامەنووسانێكمان هەیە دەیانەوێت قسە لەو جۆرە كەسانە دەربهێنن بۆ ئەوەی هەر زوو بەهەواڵێكی بەپەلە بیداتەوە بە گوێی خەڵكیداو كاریگەری لەسەر دابەزینی ورەی جەماوەر بكات.
* كە باسی یەكڕیزی و یەكگرتوویی نێوماڵی كورد دەكرێت، كۆڵەكە سەرەكییەكەی (پارتی و یەكێتی)یە، ئەگەر ئەم دوو هێزە یەكگرتوو بن، ئەوانی دیكەش هاودەنگیان دەبن؛ لە مەترسییەكانی سەرەتای ئەم هەفتەیەشدا كە لەسەر كەركووك هەبوو، هەستمان بەو یەكڕیزییە كرد، پرسیار ئەوەیە ئایا پێتوایە مەترسییەك لەسەر ئەم یەكڕیزی و یەكهەڵوێستییە هەیە؟
- من ئومێدم وایە و داوا دەكەم ئەو رۆحییەتەی یەكڕیزی و یەكدەنگییەی نێوان پارتی و یەكێتی بمێنێت و بگرە زیاتریشی بكەن، چونكە خەڵكی بەرامبەر لێدوان و قسەكانی تاكە تاكەی هەندێك بەرپرس و كەسایەتی ناو حزبەكان بێزارە، ئەوەی كەمێك شارەزایی لە سیاسەت و چاودێری دۆخەكەی هەبێت، بەئاشكرا درك بەو نەفەسە و كوتلەكارییە دەكات، بۆ نموونە لەم دۆخ و ساتەدا پێویست ناكات دوو بەرپرسی ناو حزبێك كە سەر بەدوو كوتلەی جیاوازن دژی یەكتر لێدوان و قسە بدەن، تەنانەت نابێت رێگا بەوەش بدرێت بۆ نموونە كەسێك نەیارێكی یەكێتییە دەیەوێت قسەیەكی هەڵە بكات، هەربۆیە دەبێت سەركردایەتی سیاسی و بەرپرسانمان لەو ئاستە بەرزەدا بن كە بتوانن رووبەڕووی هێرشی حەشدی شەعبی ببنەوەو لەناوخۆشدا ئاگادار بن راگەیاندنەكانیان بەهەستیاری و بەرپرسیارێتییەوە مامەڵە لەگەڵ بارودۆخەكەدا بكەن. من گەشبینم كە كوردستان بەم بارودۆخەشدا تێپەڕ دەبێت، هەروەكو چۆن ئێمەیان لە ریفراندۆم و دەنگدان بەسەربەخۆیی ترسان، بەڵام ئیرادەی گەلی كوردستان سەركەوت، هەرواش ئەمە بارودۆخێكی نوێیە و ئێمە دەمانەوێت ببینە خاوەن دەوڵەت، خۆ دەوڵەت بوون لەسەر سینیەكی زێڕ بۆمانی ناهێنن، بەڵكو دوژمنەكانمان لەسەر ئەو فاكتەرانە كاردەكەن كە پەشیمانمان بكەنەوە، من دڵنیایی بەخەڵكی كوردستان دەدەم كە جەماوەری كوردستان سەربەخۆیی و دەوڵەتی دەوێت و دەبێت سەركردایەتیی سیاسی و بەرپرسەكانیشمان لەو ئاستەدا بن كە داكۆكی لە ئومێدو هیوای جەماورەكەیان بكەن و ئیلهامی لێوەربگرن.


* ساڵی رابردوو هەر لەم مانگەدا داعش هێرشی بۆ كەركووك بردو ویستی كەركووك بگرێت، بەڵام ورەی گەنجەكانی كەركووك ورەی بە كوردستانیش بەخشی، پێتوایە ئەمجارەش هەروا دەبێت؟
- ورەو گڕوتینی گەنجەكانی كەركووك ئەمڕۆ زۆر زیاترە لەو كاتەی داعش هاتوو ویستی كەركووك بگرێت، چونكە ئەمڕۆ خەڵكی كەركووك ورەی بۆ دروست بووە، ئەو كات ورەی بە سەركردایەتی سیاسی بەو شێوە بەرزەی ئێستا نەبوو، كاتێك سەركردایەتی سیاسیی كوردستان بڕیاری ریفراندۆمی دا، هەموومان بینیمان خەڵكی كەركووك بە چ گڕوتینێكەوە چوون دەنگیان بۆ سەربەخۆیی كوردستان دا. ئەمڕۆ گەنجەكانمان و خەڵكی كەركووك ئومێدی هەیە كوردستان ببێتە دەوڵەت، هەر بۆیە ئەو جۆش و خرۆشەی ئێستا لەناو ئەم جەماوەردا هەیە، زیاتر هانی دەدات بەرگری لە دەرئەنجامەكانی ریفراندۆمەكە بكات.
* پێتوانییە رۆژ لەدوای رۆژ شیعە دەكەوێتە هەڵەوە، بەتایبەتی دوای ئەوەی سوننە بەهەڵوێستی خۆیدا چووەو خۆی ناكاتە بەرەیەك لەگەڵ شیعەدا، ئایا چۆن هەڵوێستەكانی بەغدا دژ بە گەلی كوردستان دەخوێنیتەوە؟
-ئەمەی ئێستا دەیبیستین، تەنیا هەڕەشەو گوڕەشەیەو ناتوانن هیچ بەرامبەر كوردستان بكەن، بەڵگەش بۆ ئەمە ئەوان لەناو خۆیاندا تەبا نین و ناكۆكن، ئەوان گەیشتوونەتە ئاستی غرووری سیاسی وا دەزانن دوژمنایەتی كورد بكەن، سەردەكەون بێ ئەوەی سوود لە ئەزموونی رابردوو وەربگرن، ئێستا ماوەی دوو ساڵێكە شەڕی داعشیان كردووەو وا دەزانن ئەم هەڕەشەو دژایەتییەی كوردستانیان بۆ دەچێتە سەر، ئەوان یەك دوو ساڵێكە دروست بوون و ئەزموونێكی دەوڵەمەندیان نییە، ئەوەیان لەبیر كردووە ئەگەر پێشمەرگەو هاوپەیمانەكان نەبووایە ئەوان نەیاندەتوانی شەڕی داعشیش بكەن، شەڕەكانی بەشیر كە ناحیەكی بچووك بوو بەو هەموو حەشدەوە نەیانتوانی بەشیر بگرنەوە، ئەگەر پێشمەرگە نەبووایەو داوایان نەكردایە هاوكارییان بكەین، هەرگیز نەیاندەتوانی ئەو ناحییە بگرنەوە، ئێستا ئەم گروپانەی حەشدی شەعبی لەناوخۆیاندا تووشی غرووری سیاسیی بوون و دەڵێن ئێمە تەنانەت پابەند نابین بە فەرمانەكانی عەبادیشەوە، غرووری سیاسی لووتی خۆیان دەشكێنێت، بەپێچەوانەی كوردەوە كە ئەزموونێكی زۆری لە شەڕ و بەرگریكردن و قوربانیدان هەیە، بۆیە حەز ناكات شەڕ بكات و داوای دیالۆگ دەكات و دەڵێت با خوێن نەڕژێت. كورد هەرگیز لە هیچ هێزێكی داگیركەر نەترساوە، هەربۆیە خەیاڵیان خاوە ئەگەر بیانەوێت خۆیان لەگەڵ كورد تاقی بكەنەوە.

* وەك پەرلەمانتارێكی پێشوو كە ئەزموونێكی باشت لەناو پەرلەمانی عێراق هەیە، پێتوایە پەرلەمانی عێراق بنەمایەكی بەهێزی تێدا ماوە وەكو دەوڵەتی عێراق؟
- جارێ ئێستا شتێك نەماوە ناوی حكومەتی عێراق بێت؛ حكومەتێك نەتوانێت ئاراستەی خۆی بزانێت و سەروەری لەدەست بدات و بیەوێت نەتەوەو گەلێكی وەكو كورد سزا بدات و گەمارۆی بدات، پەنا بەرێتە بەر توركیاو ئێران بۆ ئەوەی هێز پەیدا بكات و شەڕ لەدژی كوردستان بكات و ئیرادەمان بشكێنێت، ئەمە پێی ناوترێت حكومەت، هەر ئەم حكومەتەی عەبادی ماوەیەك پێش ئێستا داوای لە نەتەوە یەكگرتووەكان دەكرد، هێزەكانی توركیا لە عێراق بكاتە دەرەوە، كەچی ئێستا دەڵێت وەرە ناوەوە ئیرادەی گەلی كوردستانم بۆ بشكێنە. سەبارەت بە پەرلەمانیش كە هەر وجوودی نەماوە و ئەركە سەرەكییەكەی خۆی لەدەست داوە كە بریتییە لە چاودێریكردن و دانانی یاساو پەسەندكردنی بودجە، ئەم سێ ئەركەی بووەتە ئەركی دژایەتیكردنی گەلی كوردستان، لەكاتێكدا هیچ بڕیارێكی پەرلەمانی عێراق مولزەم نییەو كاری پێ ناكرێت، كەی كاری پەرلەمانی عێراق ئەوەیە پارێزگاری كەركووك دەربكات، لە كاتێكدا پارێزگاری كەركووك شەرعیەتی لەمیللەت وەرگرتووە نەك لە پەرلەمانی عێراق، پارێزگاری كەركووك نەهاتووە سوێند لەبەردەم پەرلەمانەكەی ئەوان بخوات، تاوەكو ئەوان حەسانەی لەسەر هەڵبگرن و متمانەی لێ بسەننەوە، هەربۆیە پەرلەمان متمانەی لەدەست داوەو حكومەت بنەماكانی دەوڵەتی تێدا نەماوە.
* لەبەرامبەر ئەم هەڵوێستە توندەی عەبادی و پەرلەمانی عێراق لە دوای ریفراندۆمەوە هەڵوێستی بارزانی زۆر هێمنە، ئایا چۆن هەڵوێستی بارزانی دەخوێنیتەوە؟
- ئەوانە لەو هەڵوێستە نەرمەی بارزانی تێناگەن، لەبەر ئەوەی پیاوی ئازا ئەوەیە كە بە زوویی بڕیار نەدا و هێمن و دانایی هەبێت، ئەم داناییە لە سەركردایەتی سیاسیی كورد دەبینم، لەو ئەنجومەنەی كە دروست دەكرێ بینیومە، تا ئێستا هیچ بڕیارێكیان وەرنەگرتووە، تەنیا بڕیاری ئاشتیخوازانە نەبێ، پیاوی بوێرو ئازا ئاوا هەڵوێستی دەبێ، وەك ئەوانە نییە كە سەركردایەتییان تێدا نییە، ئەمانە رۆژێ لە رۆژان ماندوو نەبوون لەگەڵ كەسەكانی خۆیان، بەڵام ئەوانەی ئێمە پەروەردە بوون و دەزانن چۆن سەركردایەتیی خەڵكەكەی خۆیان بكەن، هیواخوازیشم ئەو هەنگاوانە بەردەوام بن، بۆ ئەوەی هەر شەڕێك بێت و لە شوێنێكەوە بێ، یاخوا هیچ نەبێ، ئەگەر بشبێت بێ ئەو كاتە ئێمە مافی شەرعی خۆمانە بەرگری لە خۆمان بكەین.


* بڕیاری سووربوون لەسەر ئەنجامدانی ریفراندۆم دەستكەوتێكی گەورە بوو، كە هەموو جیهان دەیانگوت دوای بخەن، كەچی بارزانی دوای نەخست، ئەم بڕیارە تا چەند وەرچەرخانی دروست كردووە؟
- بەڵێ، ئەوە باشترین بڕیار بوو كە ریفراندۆمەكە كرا، من دەڵێم ئەگەر بڕیارەكەش نەدرایە، ئەو هاشوهوشە دەبوو، چونكە ئەوانە نایانەوێ تۆ دەستكەوتەكانت بۆ میللەتەكەت فەراهەم بكەیت، ئەو ببینێت لە بارودۆخێكی ناخۆشدایە و كوردستانیش بەرەو سەركەوتن دەڕوات، ئەو بڕیارەی ریفراندۆم بڕیارێكی زۆر زۆر حەكیمانەوە و سەركەوتووانە بوو. ئێمە ئێستا لە قۆناغێكی دیكەداین، لە قۆناغی بەرەو دەوڵەتبوون و سەربەخۆیین، من وەك وتم ریفراندۆم بازدانێكی بە پرسی كورد كرد، لە دوای ئەو هەموو ماوەیەو لە دوای 2003 ئێمە زەرەرێكی زۆرمان كرد تا ئەو رۆژەی ریفراندۆممان كرد رۆژ بەرۆژ خەڵك لە شكستی و بێڕێزی بوو، بێ ئومێد ببوو لەو سەركردایەتییە، ئێستا ئەم سەركردایەتییە هۆشێكی دایەوە بەر ئەو خەڵكە. بۆیە من دەستیان دەگوشم و دەڵێم دەستتان خۆش بێت و تەمەنتان درێژ بێت، بۆ ئەوەی ئێمە بگەیەننە كەناری ئارام.
* بەغدا داوا دەكات ئاكامی ریفراندۆم هەڵوەشێنرێتەوە، ئایا كەس هەیە بتوانێ ئەم ئاكامە هەڵوەشێنێتەوە؟
- بەغدا بۆ خۆی بەهەڵەدا چووە، كەسیش جورئەت ناكات، بڵێ ئەم بڕیارە هی كەسێكە، یان هی حزبەكانە، ئەوە بڕیاری گەلی كوردستانە، تەنیا بڕیاری كاك مسعود بارزانی و حزبەكان نییە، ئێستا لەدەست ئەوان دەرچووە و میللەت سەركردایەتیی ئەو ریفراندۆمە دەكات، ئەوەشی بیەوێ پاشگەز ببێتەوە، خۆكوشتنی سیاسییە. هەتا ئەگەر بیشەوێت،- ناتوانێ بیكات، تازە تەواو رەوڕەوەی ژیان كە رۆیشت، ناگەڕێتەوە، هەموو عارەب و زلهێزەكان بە كوردیان گوت ریفراندۆم مەكەن، كورد هەر كردی، تەواو بڕیاری خۆی دا، ئەمە چەسپاوە لە نەتەوە یەكگرتووەكان و یەكێتیی ئەوروپا و وڵاتانی ئیقلیمی، ئەگەر من پرسیارێكی لۆجیكی بكەم، ئەگەر ئەمە سەرئەنجامێكی باشی نەبێ بۆ ئەم میللەتە، ئەی خێرە عەبادی وا خۆی تێكداوە، خێرە ئێران خۆی تێكداوە و توركیا خۆی تێكداوە و سوپا كۆدەكاتەوە، ئەگەر ئەنجامی شەرعی نییە بۆ خۆیان تێكداوە؟ من دڵم پێی خۆشە، ئەوەشی خۆی تێكداوە، هەر دەڵێ دانی پێدا نانێم و یان سوورە لەسەر پەشیمانبوونەوە لە ئەنجامەكەی، مانای وایە لە هیچ تێنەگەیشتووە.


* ئێستا لە پارێزگاری كەركووكیان هەڵپێچاوە و دەیانەوێت بە بیانووی گەندەڵییەوە دەری بكەن، ئایا ئەم پرسە كاردانەوەی بەشداری كەركووك نییە لە ریفراندۆم؟
- من وەك كەركووكییەك دەمێكە لەناو كەركووكدام، ئەگەر گەندەڵیش هەبێت، ئەوە پاساو نییە كە ئەو دەربكات، دەبێ ئەنجومەن دەریبكات، ئەوە ئیشی حكومەتی عەبادی و پەرلەمان نییە بێ پارێزگار دەربكات، ئەوان ناڵێن دەستوور و پەیڕەوی ناوخۆ و مافی یاسا، با ئەمە بەجێبهێڵن بۆ ئەنجومەنی كەركووك، ئەگەر بە ئێمەیان گوت گەندەڵە، ئێمەش ئەو كاتە پشتی ئەنجومەنی كەركووك دەگرین، وەك خەڵكی كەركووك دەڵێین جەنابی پارێزگار چۆن متمانەمان پێت دا، - من پێشتریش باسم كردووە، ئەمە پیلانێكی پێشوەختەیەو داڕێژراوە، دەیانەوێ ئاڵۆزی بخەنە ناو شاری كەركووكەوە، كورد پەراوێز بخەن و ئەو پێگەیانەی كورد لە كەركووك هەیەتی، لێی بسەننەوە، لە خودی پارێزگارەوە دەستی پێدەكەن تا خوار، لەبیرمان نەچێت لە ئاڵاكەش هۆسەیەكی زۆریان بۆ نایەوە، ئەمە رق و كینەی ئاڵاكەشە، لە دكتۆر نەجمەدین و ئەنجومەن و خەڵكی كەركووك دەكەنەوە كە پێشوازییان لە ئاڵاكە كرد، نایانەوێ كورد نینۆكێكی هەبێ خۆی پێ بخورێنێ، ئیدی ئەمە دوژمنییەتیی دەسەڵاتی كوردییە لە هەر كوێیەك هەبێ.


* تا ئێستا نزیكەی مانگێك بەسەر لەكارلابردنی پارێزگار دەرچووەو تا ئێستاش جێبەجێ نەكراوە، ئەگەر ناچاربكرێن بڕیارەكە جێبەجێ بكەن بۆ كەركووكییەكان شكستە، یان نا؟
- دەبێ قبووڵی نەكەن، ئەمە دەستتێوەردانە بۆ ئەنجومەن و جەماوەری كەركووك، بە ئێمە بڵێن ئێمە لای دەبەین، ئێمە ئەگەر شتێكی مەلموسمان لێ دیت، لای دەبەین، ئەوان بۆیان نییە، ئێمە دەچین پارێزگاری بابل و بەسرە و شوێنەكانی ئەوان لابەرین، كەواتە بۆ ئەوان نییە دەست لە كاروباری ناوخۆی ئێمەو كەركووك وەردەن، خەڵكی كەركووك بڕیاری لەسەر پارێزگاری كەركووك و ئەنجومەنەكەی داوە، ئەگەر بەدڵمان نەبوو، خۆپیشاندان دەكەین و ئێوەش وەرن یارمەتیمان بدەن بە پێی پایەو رێساكانی دیموكراسی، بەڵام تۆ بێیت و بڵێیت پارێزگار لابەرە، تۆ جارێ بڕۆ گەندەڵییەكانی خۆتان چارەبكەن، بۆ دێن شەڕ بە ئێمە دەفرۆشن.
* پێتوایە كە دكتۆر نەجمەدین لەسەر لیستی یەكێتییە سنووری بیركردنەوەی حزبایەتی تێپەڕاندووە؟
- ئەوەی كە ئێستا دەیبینم تێی پەڕاندووە، دكتۆر نەجمەدین حزبایەتی تێدا نابینم، یەك دەست لەگەڵ پارتی و حزبەكانی دیكە دەیانەوێ خزمەت بە شارەكە بكەن. هەر بۆیە من دەڵێم مانەوەی دكتۆر نەجمەدین تا ئەو كاتەی كەركووك رزگاری دەبێ و بە تەواوەتی دەچەسپێت لەسەر هەرێمی كوردستان پێویستە، چونكە ئێستا كاتی ئەوە نییە تۆ دەسەڵات لە دكتۆر نەجمەدین بسەنیتەوە، كە شتێكی ناخۆشە بۆ كەركووكییەكان و نابێ قسەی بەغدا و نەیارانمان سەربكەوێت.


* ئێمە ریفراندۆممان ئەنجامداوەو ئاكامەكەشی دەنگی خەڵكی كوردستانە بە ڕێژەی سەرووی لە سەدا 92، بە رای تۆ تا چەند دەوڵەتانی رۆژئاواو دیموكراسی دەتوانن خۆیان لە دەنگی كوردستان بێ ئاگا بكەن؟ ئایا دەتوانن تا سەر دژایەتیی ئەو دەنگانە بكەن؟
- پێموایە ئەگەر ئەوان ئەمە بكەن واتا دژی قسەكانی خۆیانن، چونكە ئەوان باسی خۆیان دەكەن كە دیموكراسیخوازن، لە نەتەوە یەكگرتووەكانیش هەیەئە و میساقە هەیە كە ئەو دەوڵەتانە مافی چارەی خۆنووسینیان داوەتە دەست نەتەوەكانیان و واژۆیان كردووە و دەبێ رێز لە واژۆكانیان بگرن، كەواتە زلهێزەكان ناتوانن دژی ئیرادەی گەلی كورد بن كە ریفراندۆمێكی كردووە كە ئایا دەتەوێ لەگەڵ عێراقدا بمێنیتەوە كە بە زۆر پێوەی لكاویت، یان نا، من دەمەوێ سەربەخۆ بم، ئەمەش مافێكی شەرعی و یاسایی گەلی كوردستانە.