رۆهات زادە، پسپۆڕ و تایبەتمەندە لە ئابووریی ڕۆژئاوای كوردستان و توێژینەوەكانی جەخت لەسەر بەپیشەسازیكردنی سێكتەرە جیاوازەكانی ئابووری دەكەنەوە. لە گفتوگۆی ئەمجارەی «بازنەی گفتوگۆ»دا (كاریگەریی ئابووری و بازاڕی هاوبەش لە بونیادنانی نەتەوەدا)، بەمجۆرە دیدوبۆچوونی خۆی خستەڕوو:

زۆر سوپاسی بەشی ڕۆشنبیری و ڕاگەیاندنی پارتی دیموكراتی كوردستان دەكەم بۆ ڕێكخستنی ئەم گفتوگۆ ئاست بەرزە لەسەر پرسێكی هەستیار بە ناونیشانی «كاریگەریی ئابووری و بازاڕی هاوبەش لەسەر بونیادنانی نەتەوە» كە بە ڕاستی پرسێكی هەستیار و زۆر گرنگە.

لەم چوار چێوەیەدا ئەگەر بە وردی لە نەخشەی ئابووریی ئێستای كوردستان بڕوانین، هاودژییەكی بەرچاو لە نێوان واقیعی كۆمەڵایەتی و ئابووریدا بەدی دەكەین. لە لایەكەوە، پەیوەندییەكی مرۆیی، كولتووری و بازرگانیی ڕۆژانە لە نێوان هەر چوار بەشەكەی كوردستان لە ئارادایە، بەڵام لە لایەكی دیكەوە، تا ئێستا چوارچێوەیەكی ئابووریی ڕێكخراو و سیستەماتیك بوونی نییە كە بتوانێت ئەم پەیوەندییە پەرشوبڵاوانە ڕێك بخات و بیانكاتە هێزێكی تەواوكار بۆ یەكدی.

ڕۆژانە هەزاران جۆر كاڵا و شتومەك بە دەروازە سنوورییەكانی وەك «ئیبراهیم خەلیل، باشماخ، حاجی ئۆمەران و پەروێزخان»دا تێدەپەڕن، بەڵام ئەم ئاڵوگۆڕانە زیاتر شێوازی بازرگانیی كاتی و دەرەكییان هەیە، نەك تەواوكارییەكی ستراتیژیی ناوخۆیی. بە واتایەكی دی، كۆمەڵگەكان لە ڕووی كۆمەڵایەتی و مرۆییەوە بەستراونەتەوە، بەڵام ئابوورییەكانیان هێشتا نەگەیشتوونەتە ئاستی هاوتەریبی و تەواوكاری.

 

پێكهاتەی ئابووریی بەشەكان:

لە بەربەستەوە بۆ دەرفەت

هەر بەشێكی كوردستان لەژێر كاریگەریی سیستەمە سیاسی و داراییەكانی دەوڵەتانی دەوروبەردا خاوەنی تایبەتمەندی و ئاستەنگی جیاوازە:

- ڕۆژاوای كوردستان: ئەم بەشە لە ڕووی كشتوكاڵ، بەرهەمی دانەوێڵە و سەرچاوە سرووشتییەكانی وەك نەوت دەوڵەمەندە، بەڵام بە دەست نەبوونی ژێرخانی پیشەسازی، لاوازیی سیستمی دارایی و گەیشتن بە بازاڕی دەرەكییەوە دەناڵێنێت.

- باشووری كوردستان: خاوەنی سەرمایە، بازاڕی چالاك، كەرتی خزمەتگوزاری و دامەزراوەی خوێندنی باڵایە، بەڵام ئابوورییەكەی بە توندی بەستراوەتەوە بە دەرەوە (بە تایبەت توركیا). پشتبەستنی تەواوی بە داهاتی نەوت، هاوردەكردنی كاڵا و بوودجەی بەغدا، وای كردووە سەربەخۆییە ئابوورییەكەی لە بەردەم قەیرانەكاندا لەرزۆك بێت.

- باكووری كوردستان: لە ڕووی پیشەسازی و لۆجستییەوە لە پێشەنگدایە، بەڵام لە هەمان كاتدا بە دەست نایەكسانیی گەشەپێدان و دەرەنجامەكانی ململانێی درێژخایەنی چەندین دەیەوە دەناڵێنێت.

- ڕۆژهەڵاتی كوردستان: خاوەن توانایەكی بەرچاوی كشتوكاڵی، پیشەی دەستی و بازرگانییە، بەڵام بەهۆی سزا نێودەوڵەتییەكان لەسەر ئێران، سنوورداریی لە سیستمی بانكی و پشتبەستن بە بازرگانیی نافەرمی و كۆڵبەری، نەیتوانیوە پەرە بە توانای ڕاستەقینەی خۆی بدات.

لەبەر ڕۆشنایی ئەم دۆخەدا، پرسیاری واقیعبینانە ئەوە نییە كە ئایا دەتوانین لەم بارودۆخە سیاسییە ئاڵۆزەدا سنوورە نێودەوڵەتییەكان لابدەین و بازاڕێكی هاوبەشی فەرمی دروست بكەین؟ بێگومان لە دۆخی یاسایی و جیۆپۆلەتیكی ئێستادا ئەمە مەحاڵە. بەڵكو پرسیارە گونجاوەكە ئەوەیە: چۆن دەتوانین لە چوارچێوەی یاساكانی ئێستادا، تێچووی ئابووریی دابەشبوون كەم بكەینەوە؟ چۆن دەكرێت تۆڕێك لە بەرژەوەندیی هاوبەش، دامەزراوە و زنجیرەی بەرهەمهێنان ساز بكرێت كە ئەم كۆمەڵگایانە بە شێوەیەكی كرداری پێكەوە ببەستێتەوە؟

دروستكردنی بازاڕی هاوبەش بە مانا یاساییەكەی پێویستی بە ڕێككەوتننامەی دەوڵەتان و ئازادیی ڕەهای جووڵەی سەرمایە و مرۆڤ هەیە، كە لە ئێستادا بەردەست نین. بەڵام دەكرێت ئامانجێكی واقیعیتر دابنرێت، ئەویش بونیادنانی «بۆشاییەكی ئابووریی كوردی»یە كە بە هەنگاوی بچووكی یاسایی، كەرتی تایبەت و ڕێكخراوەیی دەست پێ بكات و بەپێی گۆڕانكارییە سیاسییەكان گەشە بكات.

 

چوار زنجیرەی سەرەكی

بۆ بەستنەوەی ئابووری بە نەتەوەسازییەوە

ئابووری دەتوانێت لە ڕێگەی چوار ڕەهەندی سەرەكییەوە ببێتە داینەمۆی پرۆسەی نەتەوەسازی:

- بەرژەوەندیی ئابووریی هاوبەش:

پێویستە بزانین ناسنامەی نەتەوەیی و كولتووری هەرچەندە گرنگ بن، بە تەنیا بەس نین بۆ بونیادنانی هاوكاریی بەردەوام. پێویستە ئەم ناسنامەیە پشتگیریی دارایی و بەرژەوەندیی ڕۆژانەی تێدا بێت. كاتێك جووتیارێك دەزانێت بەرهەمەكەی لە بازاڕی بەشێكی دیكەی كوردستان دەفرۆشێت، یان خاوەن كارگەیەك ماددەی خاو لە بەشێكی دیكە وەردەگرێت، ناسنامە لە هەستێكی سۆزدارییەوە دەبێتە واقیعێكی بەرجەستەی بژێوی. بەرژەوەندیی ئابووری ناكۆكییە سیاسییەكان بە تەواوی بنبڕ ناكات، بەڵام تێچووی شەڕ و دابڕان ئەوەندە بەرز دەكاتەوە كە لایەنەكان ناچار بە پاراستنی ئارامی و بەردەوامیی گفتوگۆ دەكات.

- تەواوكاریی لە زنجیرەی بەها و بەرهەمهێناندا:

جیاوازیی نێوان بەشەكان نابێت تەنیا وەك ڕێگر سەیر بكرێن، بەڵكو دەكرێت ببنە دەرفەتێك بۆ دروستكردنی زنجیرەی بەهای هاوبەش. بۆ وێناكردنی ئەمە لە كەرتی كشتوكاڵدا: دەكرێت ماددەی خاو لە ڕۆژهەڵات، یان ڕۆژاوا بەرهەم بهێنرێت، لە باشوور لە ڕێگەی كارگەكانەوە پرۆسێس و پاكێج بكرێت، سوود لە ئەزموونی پیشەسازی و لۆجستیی باكوور وەربگیرێت بۆ دابینكردنی ماشین و هێڵەكانی بەرهەمهێنان و لە كۆتاییدا لە ڕێگەی دیاسپۆرای كورد لە دەرەوەی وڵات بازاڕی نێودەوڵەتی بۆ دابین بكرێت.

ئەم پرۆسەیە پێی دەوترێت «تەواوكاریی گەشەپێدەر» كە تێیدا لە هەر قۆناغێكدا بەهایەكی نوێ بۆ بەرهەمەكە زیاد دەبێت. ئەمە تەواو جیاوازە لە بازرگانیی ترانزێتی سادە كە تەنیا كاڵا لە دەوڵەتانی هاوسێوە هاوردە دەكات و بەبێ هیچ گۆڕانكارییەك دەیفرۆشێتەوە.

 

- دامەزراوەسازیی متمانە:

بۆ ئەوەی ئەم تۆڕە ئابوورییە كار بكات، پێویستە دامەزراوەی نافەرمی، یان نیمچە فەرمی هەبن كە متمانە و هاوئاهەنگی ڕێكبخەن. دروستكردنی ئەنجومەنی بازرگانیی هاوبەش، هاندانی هاوبەشیی دارایی لە نێوان بانكە تایبەتەكان و پەرەپێدانی پلاتفۆرمی دیجیتاڵی بۆ ئاسانكاریی بازرگانی، دەبنە هۆی دروستكردنی ژێرخانێكی ناڕاستەوخۆ بۆ بەستنەوەی كەرتی تایبەتی بەشە جیاوازەكان.

 

- دابەشكردنی دادپەروەرانەی سوودەكان:

پڕۆژەی نەتەوەسازیی ئابووری كاتێك سەركەوتوو دەبێت كە هەموو بەشەكان هەست بە سوودمەندی بكەن. ئەگەر ناوچەیەك تەنیا كڕیار بێت و ناوچەیەكی دیكە تەنیا فرۆشیار، دواجار نادادیی ئابووری دروست دەبێت و ئەمەش هاوسەنگییەكە تێكدەدات. بۆیە پێویستە هەمیشە گەشەپێدانی پیشەسازی و كشتوكاڵی بە جۆرێك بێت كە هاوسەنگی لە نێوان پارێزگا و ناوچە جیاوازەكاندا بپارێزێت.

پەیوەندیی ئابووریی نێوان ڕۆژاوا و باشوور

لە تۆڕە نافەرمییەكانەوە بۆ دامەزراوەییبوون

ئەزموونی پەیوەندییەكانی نێوان ڕۆژاوا و باشووری كوردستان لە دەیەی ڕابردوودا، نموونەیەكی گرنگە لەسەر پێویستیی دامەزراوەكان بۆ دابینكردنی پێداویستیی مرۆیی وەك دەرمان، خۆراك، وزە و هاتوچۆی خوێندكاران و خێزانەكان، كە كاریگەرییەكی بێشوومار و قووڵیان لەسەر جومگەكانی ژیانی كۆمەڵایەتی و پەیوەندییە ئابوورییەكانی نێوانمان هەبوو. دەروازەی سێمالكا تەنیا ڕێڕەوێكی ئاسایی نەبوو، بەڵكو داخستن و كردنەوەی، كاریگەریی ڕاستەوخۆی لەسەر بازاڕ، نرخەكان و ژیانی هاووڵاتیان دروست دەكرد.

ئەم ئەزموونە نیشانی دا كە نزیكیی جوگرافی و ناسنامەی نەتەوەیی هاوبەش، بەبێ بوونی یاسای جێگیر بۆ باج، مۆڵەت، گواستنەوەی دارایی و چارەسەركردنی ناكۆكییە بازرگانییەكان، هیچ كات ناتوانن ئاسایشێكی تەواو و سەقامگیرییەكی ئابووریی درێژخایەن بۆ ناوچەكە مسۆگەر بكەن. لە كاتی پەككەوتنی دامەزراوە فەرمییەكاندا، تۆڕە نافەرمییەكانی وەك بازرگانان، خێزانەكان، ناوبژیوانان و دیاسپۆڕا ڕۆڵی سەرەكییان بینیوە و لایەنی متمانە، زانیاری و دابینكردنی قەرزیان گرتووەتە ئەستۆ، تاوەكو شادەماری پەیوەندیی نێوان هەردوو لایەنی سنوورەكە بە زیندوویی و بێ پچڕان بهێڵنەوە.

تیۆریی «ڕێككەوتنی سیاسی»، موشتاق خان جەخت دەكاتەوە كە تەنیا یاسا نووسراوەكان واقیعی كاركردن دیاری ناكەن، بەڵكو پێویستە تێبگەین هێز چۆن دابەش بووە و كێ كۆنتڕۆڵی سەرچاوە و دەروازەكان دەكات. لەم دۆخەدا، دەبێت جیاوازی لە نێوان ناوبژیوانیی سوودبەخش و تۆڕەكانی گەندەڵیدا بكەین. گەندەڵی ڕەنگە لە ڕێگەی لایەندارییەوە كارئاسانیی خێرا بۆ كەسانی خاوەن دەسەڵات بكات، بەڵام بازاڕی ئازاد پەك دەخات و مافە گشتییەكان دەكاتە ئیمتیازی تایبەت. ڕێككەوتنی نافەرمی لەسەر داهاتی سنوورەكان تەنیا بەرژەوەندیی نوخبەكان دەپارێزێت و جووتیاری بچووك و پڕۆژە سەربەخۆكان بێبەش دەكات، بەمەش گەشەسەندنی یەكسان بۆ هەمووان ڕەت دەكاتەوە.

بۆیە، نابێت ئەم تۆڕە نافەرمییانە پشتگوێ بخرێن، یان لایەنە نایاساییەكانیان ڕەوا بكرێت. پێویستە كاركردی ئەرێنییان بگوازرێتەوە بۆ ناو چوارچێوەی فەرمی، وەك گۆڕینی متمانەی كەسیی بازرگانان بۆ تۆماری فەرمیی كۆمپانیاكان، گۆڕینی ناوبژیوانی بۆ داوەریی بازرگانیی دامەزراوەیی و گواستنەوەی هێواش و پلان بۆداڕێژراوی سیستمی دارایی نافەرمی بۆ كەناڵە فەرمی، یاسایی و بانكییە سەلامەتەكان. ئەم گۆڕانكارییە دەتوانێت زەمینەیەكی پتەو بۆ گەشەپێدان و تەواوكاریی ئابووریی ڕاستەقینە لە نێوان هەردوو كۆمەڵگەكەدا دروست بكات و سنوورەكان لە جێگەی كێشە، بكات بە سەرچاوەیەكی گرنگی بووژانەوە.

 

ئاسۆكانی گەشەپێدانی ئابووری

لە سایەی گۆڕانكارییە سیاسییەكانی ناوچەكەدا

پرۆسەی چاكسازی و ئاشتی لە باكوور و پرۆسەی تێكەڵبوونەوەی ڕۆژاوا لەگەڵ دەوڵەتی سووریا، دوو مەلەفی ئاڵۆز و جیاوازن كە دەكرێت دەرفەتی ئابووریی نوێ لە ناوچەكەدا بخوڵقێنن. لەگەڵ ئەوەشدا، پێویستە ئاماژە بەوە بكرێت كە ئەم دوو ڕەوتە یەك پرۆسەی هاوشێوە نین و ئەنجامە كۆتاییەكانیشیان هێشتا بە تەواوی مسۆگەر نین.

ئەگەر پرۆسەی ئاشتی لە توركیادا بەرەوپێشچوونی ڕاستەقینە بەخۆیەوە ببینێت، دەكرێت ببێتە هۆی كەمكردنەوەی مەترسییە ئاسایشییەكان، ئەمەش زەمینە خۆش دەكات بۆ ڕاكێشانی وەبەرهێنان، بووژانەوەی كەرتی گەشتیاری، باشتركردنی ژێرخانە سەرەكییەكان لە ناوچە كوردییەكاندا و دواجار ڕەخساندنی دەرفەتی بازرگانیی فراوانتر لەگەڵ باشوور و سووریادا. لە لایەكی دیكەوە، ئەگەر پرۆسەی تێكەڵبوونەوەی ڕۆژاوا لەسەر بنەمای دابینكردنی مافی ڕوون و بەڕێوەبردنی ناوخۆیی جێگیر بێت، دەكرێت یارمەتیدەر بێت لە گەڕاندنەوەی خزمەتگوزارییە بنەڕەتییەكان، كردنەوەی ڕێگاوبان و بازاڕەكان، دەستڕاگەیشتن بە دارایی و دووبارە بووژاندنەوەی كەرتەكانی كشتوكاڵ و پیشەسازی.

•  كۆسپەكانی بەردەم گەشەپێدانی دادپەروەرانە

مێژووی پڕ لە ململانێی ناوچەكە نیشانی داوە كە بەدیهاتنی ئاشتی بە تەنیا و بە شێوەیەكی خۆكارانە گەشەپێدانی هاوسەنگ بەرهەم ناهێنێت. ڕەنگە توندوتیژی و شەڕ بوەستن، بەڵام مەترسیی ئەوە هەیە كۆمپانیا زەبەلاحەكان و ئەو تۆڕە بازرگانییانەی لە ناوەندەكانی دەسەڵاتەوە نزیكن، دەست بەسەر گرێبەستە گەورەكان، زەوییە ستراتیژییەكان و پڕۆژەكانی دووبارە بنیادنانەوەدا بگرن.

لە دۆخێكی ئاوها قۆرخكراودا، ئەگەری هەیە بازاڕەكان بكرێنەوە، بەڵام بەرهەمهێنەرانی ناوخۆیی توانای پێویستیان نەبێت بەرانبەر بە كاڵا هاوردەكراوەكان، یان توانای ڕكابەریكردنیان لە ئابوورییەكی بەهێزتردا لاواز بێت. بۆیە، گۆڕینی «سوودەكانی ئاشتی» بۆ واقیعێكی بەرجەستە، پێویستی بە سیاسەتێكی ئابووریی تۆكمە هەیە كە كار بۆ پاراستنی ڕكابەریی دروست، پشتیوانیكردنی پڕۆژە بچووك و مامناوەندەكان، پەرەپێدانی لێهاتوویی پیشەیی، دابینكردنی دارایی بۆ بەرهەمهێنەرانی ناوخۆیی و مسۆگەركردنی بەشداریكردنی ناوچە خۆجێییەكان لە پڕۆژەكانی ئاوەدانكردنەوەدا بكات.

 

•  ڕێگریكردن لە پەراوێزخستنی كۆمەڵایەتی و پێكهاتەیی

بازاڕەكان خاوەن هێزێكی دووفاقین، دەتوانن كۆمەڵگەكان بە یەكەوە ببەستنەوە، بەڵام هاوكات دەكرێت دابەشبوونی چینایەتی و جوگرافی قووڵتر بكەن. ئەگەر دەستكەوتە ئابوورییەكان تەنیا لە سەنتەری شارە گەورەكانی وەك هەولێر، سلێمانی، یان ئامەد كورت ببنەوە، یان تەنیا لە دەستی ژمارەیەكی سنووردار لە كۆمپانیا و لایەنە سیاسییەكاندا كۆببنەوە، ئەوا خەڵكی ناوچە سنوورییەكان و گوندنشینەكان هەست بە متمانە و هاوبەشی ناكەن. بەم هۆیەشەوە، هەمیشە پێویستە ئەم پرسیارە جەوهەرییانە بورووژێندرێن: كێ لەم گۆڕانكارییانە سوودمەند دەبێت؟ كێ تێچووەكەی دەدات؟ ئایا گەنجان، ژنان، جووتیاران و خاوەن پڕۆژە بچووكەكان دەرفەتی چوونە ناو بازاڕیان دەبێت؟ یان كارئاسانییەكان هێشتا بەستراونەتەوە بە لایەنگریی سیاسی و ناوبژیوانیی هێزە دەسەڵاتدارەكانەوە؟

هەروەها، هەر هەوڵێك بۆ هاوكاریی ئابووری لە ناوچەكەدا نابێت وەك پڕۆژەیەكی نەتەوەیی داخراو دەربكەوێت كە پێكهاتەكانی دیكەی وەك عەرەب، توركمان، سریانی، ئاشووری و ئەرمەن پەراوێز بخات. ئەگەر ئەم پێكهاتانە هەست بە هەڕەشە بكەن لەسەر بەرژەوەندییەكانیان، ڕەنگە ببنە بەربەست لەبەردەم پڕۆسەكەدا. بە پێچەوانەوە، ئەگەر گەشەپێدانەكە هەلی كار و خزمەتگوزاری بۆ هەمووان بەبێ جیاوازی دابین بكات، دەبێتە هۆی ئارامی، گەشە و قبووڵكردنی یەكتر.

 

•  پێنج هەنگاوی كردارەكی بۆ پەرەپێدانی ئابووری

لە ڕووی پراكتیكییەوە، دامەزراندنی پێشوەختەی قەوارەیەكی گەورەی وەك «بازاڕی هاوبەشی كوردی» ڕەنگە لەم قۆناغەدا واقیعی نەبێت. لەبری ئەوە، گونجاوترە كار لەسەر هەنگاوی بچووكتر بەڵام كاریگەرتر بكرێت:

1- پێكهێنانی ناوەندێكی چاودێریی ئابووریی سەربەخۆ: ئەم ناوەندە ئەركی كۆكردنەوەی داتا و ئامارە ڕاستەقینەكان دەبێت لەسەر بەرهەمهێنان، بازرگانی، دەروازە سنوورییەكان، نرخەكان و بەربەستەكانی بەردەم جووڵەی بازرگانی. ئێمە زۆر باسی تەواوكاریی ئابووری دەكەین، بەڵام بێبەشین لە زانیاریی ورد لەسەر قەبارەی بازرگانیی نێوان ناوچە جیاوازەكان.

2- دەستنیشانكردنی زنجیرەكانی بەها بۆ پڕۆژەی تاقیكاری: دەكرێت سەرنج بخرێتە سەر چەند كەرتی دیاریكراو وەك پیشەسازیی خۆراك، بەرهەمە شیرییەكان، ڕووەكی پزیشكی، یان خزمەتگوزارییە دیجیتاڵییەكان، تاوەكو دیاری بكرێت هەر بەشێك چ بەهایەكی زیادكراوی ڕاستەقینە پێشكەش دەكات.

3- دروستكردنی تۆڕە پیشەیییەكان: پێویستە تۆڕێكی كارا لە نێوان ژوورەكانی بازرگانی، زانكۆكان، یەكێتییەكانی جووتیاران و كۆمپانیاكانی گواستنەوەدا دروست بكرێت، بۆ ئەوەی پەیوەندییەكان تەنیا لە چوارچێوەی كۆبوونەوە و كۆنگرە سیاسییەكاندا كورت نەبنەوە.

4- سوودوەرگرتن لە كەرتی دیجیتاڵی: پێویستە لەو بوارانەوە دەست پێ بكەین كە كەمتر پێویستیان بە جووڵەی فیزیكیی مرۆڤ و پارە هەیە بەسەر سنوورەكاندا، وەك ڕاهێنانی دیجیتاڵی، پڕۆگرامسازی و بەستنەوەی گەنجان و پسپۆڕانی ناوخۆ بە ڕەوەندی نیشتمانییەوە (دیاسپۆرا).

5- پەیڕەكردنی یاسای ڕوون بۆ شەفافییەت: داڕشتنی ڕێسای توند بۆ ئاشكراكردنی خاوەندارێتیی ڕاستەقینەی پڕۆژەكان و كەمكردنەوەی قۆرخكاری، چونكە هەر دەستپێشخەرییەك كاتێك بكەوێتە ژێر سێبەری گەندەڵییەوە، متمانەی جەماوەری لەدەست دەدات.

لە كۆتاییدا، دەخوازم هەڵوەستە لەسەر ئەوە بكەمەوە كە بازاڕی هاوبەش پڕۆژەیەك نییە كە تەنیا بە بڕیارێكی سیاسی لە سەرەوە ڕابگەیەنرێت، بەڵكو پرۆسەیەكی درێژخایەنە كە لەسەر بنەمای متمانە، بەرژەوەندیی هاوبەش و بنیادنانی دامەزراوەی واقیعی گەشە دەكات. پرسیارە سەرەكییەكە ئەوە نییە چۆن سبەی سنوورەكان لابدەین، بەڵكو ئەوەیە چۆن ڕێگرییە سنوورییەكان كەم بكەینەوە بۆ گواستنەوەی ئازادانەی زانیاری، بەرهەم و بەرژەوەندییەكان.

ئابووری بە تەنیا ناتوانێت ناسنامە دروست بكات، بەڵام دەتوانێت ناسنامە لە چەمكێكی تیۆرییەوە بگۆڕێت بۆ شێوازێكی ژیانی ڕۆژانە، كاتێك جووتیارێك بازاڕ بۆ بەرهەمەكەی بدۆزێتەوە، خوێندكارێك زانكۆیەكی گونجاو بەدەست بهێنێت، كۆمەڵگەكانیش تێبگەن كە سەقامگیری و گەشەی هەر بەشێك، بەستراوەتەوە بە ئارامی و بووژانەوەی بەشەكانی دیكەی ناوچەكەوە. تەنیا لە دۆخێكی ئاوها و لێكتێگەیشتنێكی لەو شێوەیەدا، بازاڕی هاوبەش لە دروشمێكی بێ ناوەڕۆكەوە دەگۆڕێت بۆ بنەمایەكی ماددی بۆ متمانەی دوولایەنە و بنیادنانی داهاتوویەكی گەشتر.