لە مێژووی هەر نەتەوەیەکدا، چرکەساتگەلێک هەن کە ئاڕاستەی مێژوو دەگۆڕن. ١٤ـی ئاداری ١٩٠٣، یەکێکە لەو چرکەساتە مێژووییە درەوشاوانەی تێیدا پێشەوایەک لەدایک بوو، و دواتر بوو بە ناسنامەی شۆڕش و قەڵای بەرگری لە مافە ڕەواکانی گەلی کوردستان. ئەو ڕۆژە تەنها لەدایکبوونی سەرکردەیەک نەبوو، بەڵکو مژدەی سەرهەڵدانی ئیرادەیەکی پۆڵایین بوو کە چۆکی بە مەحاڵ دادا و پرسی کوردی لە پەراوێزی مێژووەوە گەیاندە ناوەندی بڕیاری جیهانی.
بارزانی نەمر، فەلسەفەی شۆڕشی لە چوارچێوەی تەنها خەباتی چەکدارییەوە گۆڕی بۆ قوتابخانەیەکی نەتەوەیی؛ قوتابخانەیەک کە تێیدا کوردایەتی واتە: خۆڕاگری، مرۆڤدۆستی و پێکەوە ژیان و سازشنەکردن لەسەر شکۆ. بارزانی نەمر لە چیا سەرکەشەکانەوە وانەی ئازادیی بە گوێی جیهاندا چرپاند و سەلماندی کە گەلی کورد وەک لوتکەکان ناچەمێتەوە. ئەمڕۆکە یادی ١٤ی ئادار، تەنها بیرهێنانەوەی ڕابردوو نییە، بەڵکو نوێکردنەوەی پەیمانی وەفادارییە بۆ ئەو ڕێبازەی کە هەمیشە وەک قیبلەنمایەکی ڕاستەقینە، بەرەو ئاسۆی سەرفرازی و سەربەخۆیی ڕێنماییمان دەکات.
سڵاو و دروود بۆ گیانی پاکی بارزانی نەمر و تەواوی شەهیدانی ڕێگەی ڕزگاری کوردستان؛ ئەو ڕێبازەی هەمیشە وەک قیبلەنمای ڕاستەقینە بەرەو ئاسۆی سەربەخۆیی ڕێنماییمان دەکات.