کەیوان محەممەدی، وێنەگری کوردی خەڵکی کامیاران لە ڕۆژهەڵاتی کوردستان، لە هەفدەمین خولی فێستیڤاڵی نێودەوڵەتی وێنەگری FOKUS Award 2026 لە ئەلبانیا، پلەی یەکەمی بەشی بابەتی *«هەناسە» (BREATH)*ی بەدەستهێنا.

بەرهەمەکەی بە ناوی «Synthetic Respiration» ــ «هەناسەدانی دەستکرد»، بە زمانی وێنە باس لە پیسبوونی ژینگە، بەکارهێنانی لەڕادەبەدەرەی سەرچاوە سروشتییەکان، پیشەسازی و کاریگەرییەکانی لەسەر مافی مرۆڤ بۆ هەناسەدانی هەوای پاک دەکات.

لەو پێشبڕکێیەدا ٥٦٠ وێنەگر لە ٥٢ وڵات بەشدار بوون و کاری کەیوان محەممەدی لە کۆتاییدا توانی پلەی یەکەم بەدەستبهێنێت. بەپێی ڕاپۆرتی 7Roj، خەڵاتی پلەی یەکەم ١٠٠٠ یۆرۆ بوو.

کەیوان خوێندکاری هونەرە بینراوەکان بووە و وەک مامۆستای هونەر کار دەکات؛ کارەکانی پێشتر لە چەند پێشانگە و گەلەرییە نێودەوڵەتییەکانیش پیشان دراون.