حەسەن عەلی ئەو هونەرمەندەی لەگۆڕەپانی ئەدیابین گرەوی بەختی بردەوە
ئەحمەد سالار
شانازیم دەكرد بمتوانیبایە بەشداریی ئەو بەرهەمە نازدارە شاكارە بكەم، بەڵام ئاڵۆزیی باری تەندروستیم ڕێگەی نەدام، ئەگەر یەزدانی مەزن بە میهری گەورەیی ڕێگەم پێ بدات ئەوا لە ئایندەدا هەر بەشداری دەكەم.
هەرچۆن پیرەمێرد واتەنی:
دەمێك بوو چاوەڕێی بەفرێكی وابووم مووژدە بێ باری
سەرم بەفرە كەچی هێشتا شەڕە تۆپەڵمە بۆ یاری
سوپاس بۆ خوا، سوپاس بۆ گشت ئەوانەی بوونە هۆ بۆ ئەوەی نەمرم و چاوم بەدرامای (ئەدیابین)بكەوێ، كە لە كەناڵە نازدارەكەی (كوردستان تیڤی)یەوە پەخش كرا.
دیارە دەپرسن چۆن سینارێست و دەرهێنەر و هونەرمەند حەسەن عەلی گرەوی بەختی ڕۆژگارەكەی بردەوە؟ لە وەرامدا دەڵێم هەرچۆن (گۆرگی)دەنگی دلێری چەوساوەكانی جیهان و ڕۆژگارەكەی لە شانۆیی(ئەوانەی لەژێرەوە دەژین) لەسەر زاری كەسایەتی ساتین دەپرسێ: بۆچی مرۆڤ دەژی؟ لە وەڵامدا دەڵێت: بۆ ئەوەی ژیان شایستەتر بكات بە مرۆڤ.
واتە بە پێچەوانەی ئەوانەی دوای باوبژی بێهوودەیی كەوتوون، ئەمان هەمان پەیام و ئەركێكی مەزنیان لەئەستۆدایە و ئەویش جوانكردنی ژیانە.
جوانكردنەكەی ئەم كارە لەوەدایە بەشێك لە مێژووی پڕ كۆشش و گیانفیدایی گەلی كوردستانی كردووەتە كرۆكی زنجیرەكە، مان و نەمانی گەلێك لە پێناوی ژیانێكی سەربەرزانەدا بەوپەڕی هۆشیارییەوە مامەڵەی هونەرمەندانەی لەگەڵ بابەتەكەدا كردووە.
دیارە خۆشەویستی و عەشقی پاكی بۆ گەل و نەتەوە و شۆڕشەكەی، ئەو توانایەی پێ داوە كە بەوپەڕی تواناوە، دەست بەرێت بۆ كارێكی بەم شێوەیە، كە بتوانێت یەكانگیری لە نێوان مێژوویەكی نزیك و بەرجەستەكردندا بگونجێنێت، جگە لە هەبوونی دەسەڵاتی بیر و بۆچوونی ورد و ئارام و ئاگایی لە داڕشتندا.
بەوپەڕی دڵنیاییەوە دەبێ ئاماژە بۆ چاوگی سەرەكی و سەرچاوەی بابەتەكە بكرێت كە پتر هەڵهێنراوی نوسینەكانی سەرۆكی هێژایە سەبارەت بە بزاڤی ئازادیخوازی گەلی كورد.
لایەنی ڕاستگۆیی هونەرمەندەكە لەتەك كەرەسەكان و سەرجەم بارودۆخەكان مایەی بردنەوەی كۆی گەمەكەیە، یەكێك لە خاسیەتە گرنگەكانی كاری سەركەوتوو ئەو كارەیە بتوانێ لەیەك كاتدا سەرجەم هەستەكان ببزوێنێ، چ هەستی بینین بێت یان بۆنكردن و ... بۆیە لەم (ئەدیابین)ەدا لەگەڵ هەر گرتەیەكیدا سەرجەم ئەو هەستانە لەلای بینەر دەبزوێنێ و كاری خۆی بۆ خزمەتی مەبەستە سەرەكییەكە دەكات.
لەلایەكی دیكەوە كارەكە ئەو گونجاندنەیە كە سەرجەم پێكهاتەكانی دراماكە لە یەك مەبەستدا یەكانگیر دەكات كە هەر توخمەیان تەواوكەری ئەوی دیكەیانە.
لە ڕووی (لۆكەیشنەوە) هەر لەیەكەم هەڵبژاردنییەوە بۆ قەڵا كە ئەو جۆرە تەلارسازی و گرنگییە مێژوویەیە كەپتر لە شەش هەزار ساڵە، مایەی بزواندنێكی گەورەیە، كە هیچ گومان لەوەدانییە كە هەرشوێنێك لەو شوێنانەی بۆ وێنەگرتن دەستنیشانی كردوون، بە تەواوەتی لەگەڵ بابەت و ڕووداوەكاندا لەبارە و بۆن و بەرامەی بابەتەكەی لێ دێت، من بەش بەحاڵی خۆم جگە لە بەشداریم لە شۆڕشی مەزنی ئەیلول شارەزاییم لە شوێن و بنكەكانی شۆڕشدا هەبووە، بۆیە گەواهی ئەوە دەدەم كە بە چاكی هەڵبژێردراون لەڕووی نواندنەوە، سەرجەم ئەكتەرەكان پڕ بە پێستی ڕۆڵەكانیان بوون.
ئێكسسوار و پۆشاك توانیبووی سەردەم و بارەكە لە گشت لایەنێكەوە بپێكێ، تەنانەت لە ڕووی ڕەنگ و جۆر و ستایلەكەشەوە هەڵبژاردنی درووست و بەجێ بوون.
وێنەگرتن زرنگی و هەستی سینەمایی دەرهێنەری پێوە دیار بوو، بەتایبەتی بینراوی جەنگ و پێكدادانەكان.
بابەتی ئارایشتی سینەمایی یان درامی بە سەلیقەیەكی هونەریی جوانەوە كرابوو.
بەهەر حاڵ لەم دەرفەتەدا بواری ئەوە ناڕەخسێ بەتەواوی بچینە ناو بنج و بنەوانی سەرجەم لایەنەكانەوە.
لەگەڵ ئەوەشدا دەبێت بڵێین كاری مێژوویی هەرچەندە مێژووی نزیكیش بێت، ئەوەندە گرفتی زیاترە، بەتایبەت كارێكی وەك ئەم درامایە، ئەوەی باری سەرنجی خۆمە زۆر بە وردی سەرنجم دەدا، بە هیچ جۆرێك لادان لە ڕۆژگارەكەی تێدا نەبوو. جگە لەوەی زمانی ئاخافتن كە تێكڕای ناوچەكانی لەخۆ گرتبوو، هەستمان بە هیچ نەنگی و كەموكوڕییەك نەدەكرد، هەرچۆن سەرجەم ناوچەكان بەتایبەت كوردستانی باشووری لەخۆ گرتبوو.
دەرهێنەرلە پشت هەر بەرهەمێكی درامییەوە كەسانێك هەن لە سەروو هەمووشیانەوە دەرهێنەر هەیە، لەم زنجیرەیەدا هونەرمەند (حەسەن عەلی) هەیە، كە هەڵگری ژمارەیەك خاسیەتی سەرەكییە لە كاری دەرهێناندا، دەمەوێ لەم خاڵانەدا ئاماژەیان پێ بكەم:
یەكەم: ئەزمووندارە و چەندین ئەزموونی سەركەوتووی لە بوارەكەدا هەیە و خاوەنی دەیان خەڵاتی سەركەوتنە، كە لە فێستیڤاڵە سینەماییەكاندا وەری گرتووە.
لەبارەی ئەزموونەوە كورد واتەنی «هەر عەقڵە و لە خەسارێ» یان «سوار تا نەگلێ نابێتە سوار».
دووەم: سەیوانی كۆكەرەوەی بەشداران لە سایەی سەیوانێكی خۆشەویستیدا، ئەوەی بە گوێی خۆم لە ژمارەیەك بەشدارانی دراماكەم بیستووە، خۆشەویستی هەموویانی لەئەستۆ گرتووە.
لە ڕۆژانی خوێندنم لە «ئەكادیمیای هونەرە جوانەكان» ڕۆژێ لە ڕۆژان لە مامۆستای دەرهێنانم پرسی كە خوالێخۆشبوو «جاسم ئەلعبودی» بوو، گوتم: مامۆستا گرنگترین خاڵ بۆ سەركەوتنی كار چیە؟ لە وەڵامدا فەرمووی: «خۆشەویستی كلیلی هەموو سەركەوتنێكە، خۆشەویستی لە بڕواپێبوونەوە درووست دەبێت». كەواتە دەرهێنەر ئەو كلیلەی لە تەنكەی باخەڵیدا هەبووە.
سێیەم: گونجاندن، گونجاندن و تەبایی لە نێوان گشت كەرەسە و توخمەكانی كارەكە و بە شێوەیەك كە هەر یەكێكیان تەواوكەری ئەوانی دیكەبێ.
چوارەم: دەسەڵاتی ڕۆشنبیری، ئەوەندە لەم هونەرمەندە شارەزابووم كەسێكی ڕۆشنبیری ئەنسكلۆپیدیای چاكە، واتە بەسەرجەم بوارەكان شارەزا و دەستڕۆیشتووە، بەتایبەت بزوتنەوەی ئازادیخوازی گەلی كورد لە كوردستانی باشووردا و دەتوانێ ڕای لەسەری هەبێ، بۆیە توانیویەتی بەوپەڕی دەستڕۆیشتووییەوە كاری تێدا بكات و لەتەكیدا ڕاستگۆبێ.
پێنجەم: تەكنیككاری، شارەزایی تەواوی بە هونەرەكەوە هەیە، بۆیە بەسەركەوتوویی چەندە بۆی كرابێ تەكنیككاریی لە خزمەتی بیرۆكەكەدا بەكار هێناوە.
لێرەدا نامەوێ زیاتر لەسەر ئەو لایەنە بڕۆم بۆیە دەبێ ئاماژە بۆ لایەنی گونجاندن و هاڕمۆنیكی كەرەسەكانی بكەم، كە یەكێكە لە هۆكارەكانی سەركەوتنی.
لە كۆتاییدا دەڵێمەوە: «بەڵێ بەم زنجیرەیە چ وەك ڕۆژگار و چ مێژووەكەشی، گرەوی بردووەتەوە، دەسا هەزار جار پیرۆز بێت».
