ئەمڕۆ رۆژنامەکانی سعودیە رەخنەیەکی زۆریان لە لێدوانەکانی مالیکی سەرۆکی وەزیرانی عێراق گرت سەبارەت بە لێدوانەکانی لەسەر چەکدار کردنی ئۆپۆزسیۆنی سوریا.
دوای ئەوەی نوری مالیکی رەخنەی لە بڕیاری ھەردوو حکومەتی قەتەری و سعودی گرت بە چەکدار کردنی ئۆپۆزسیۆنی سوریا, ئەمڕۆ رۆژنامەکانی سعودیە رەخنەیەکی توندیان ئاڕاستەی لێدوانەکانی ناوبراو کرد.
لەمبارەیەوە رۆژنامەی شەرق ئەلئەوسەت نووسیویەتی , پێویستە وڵاتانی کەنداو بایکۆتی مالیکی بکەن و دەبێت سزای ھەموو ئەو کەسانە بدرێت کە پشتگیری لە رژێمی بەشار ئەسەد دەکەن لەسەرووی ھەمووشیانەوە حکومەتەکەی مالیکی.
ھەروەھا لەرۆژنامەکە ھاتووە, بایکۆتی مالیکی بکەن و رێگە مەدەن سەدامێکی نوێ یا بەشارێکی دیکە سەرھەڵبداتەوە.
ھەروەھا شەرق ئەلئەوسەت نووسیویەتی مالیکی کابرایەکی فێڵبازە و جێگەی متمانە نییە.
لایی خۆشیەوە رۆژنامەی ریاز نووسیویەتی مالیکی دەنگی ئێرانە یا حاکمی عێراقە؟! ھەروەھا دەنووسێت , پێشبینیمان دەکرد دوای لوتکەی عەرەبی مالیکی واقعیانە لەگەڵ دەوربەری خۆی و کەنداو مامەڵە بکات و لەژێر سێبەری ئێران بێتە دەرەوە و دوور کەوێتەوە لە دروستکردنی کێشە.
ھەر لەرۆژنامەی ریاز ھاتووە, گەلی سوریا لە دژی رژێمێک راپەری کە بەھەمان شێوەی سەدام زوڵم و زۆرداری دەکات , بەڵام ترسی مالیکی لەوەیە سووننەکان بێنە سەرحوکم و پشتگیری لە سووننەکانی عێراق و لوبنان بکەن.
لەلایەکی دیکەشەوە رۆژنامەی وەتەن نووسیویەتی ھێشتا مەرەکەبی بڕیارەکانی لوتکەی عەرەبی ووشک نەبووتەوە , مالیکی دەەستیکردوە بە بەرگری کردن لە رژێمی ئەسەد ئەمەش نەخۆشیەکە تەنیا لەلای مالیکی و حکومەتەکەی بەدی دەکرێت.
بۆیە داوای لەمالیکی کردوە خەریکی چارەسەرکردنی کێشەکانی عێراق بێت و وەزارەتە بەتاڵەکان پڕبکاتەوە و کێشەی نەوت لەگەڵ ھەرێم چارەسەر بکات , چونکە ئەمە لەبەرژەوەندی عێراق و ناوچەکەیە.