ڕێکخراوی ژنانی نەتەوە یەکگرتووەکان (UN Women) ڕایگەیاند، ژنان لە سەرانسەری جیهان داوای دادپەروەری و یەکسانی دەکەن بۆ ئەوەی ژیانێکی باشتریان هەبێت.

ئەم ڕێکخراوە ئەمڕۆ سێشەممە، 03ـی شوباتی 2026، لە لاپەڕەی X جەختی لەوە کردەوە کە ڕێزگرتن لە ژنان و ڕەچاوکردنی مافەکانیان دەبێت لە پێشینەی کارەکان بێت.

لە پەیامەکەی ڕێکخراوەکەداهاتووە: "با بە جیهان بڵێین ژنان بەڕاستی چییان دەوێت".

نەتەوە یەکگرتووەکان ئاماژەی بەوەشکردووە، ژنان نەک تەنها دادپەروەری و یەکسانییان دەوێت، بەڵکو پێویستیان بە ڕێزگرتن و کەرامەتی مرۆڤایەتی و ئاسایش و ئارامی هەیە.

پێشتر ڕێکخراوی ژنانی نەتەوە یەکگرتووەکان ڕایگەیاندبوو، کە لە ساڵی ٢٠٢٦دا پشتیوانی لە سەرکردایەتی ژنان دەکات لە سەرانسەری جیهاندا و وەک مافێک بەدوای ئەمەدا دەگەڕێن.

ئەم جەختکردنەوە لە کاتێکدایە کە دۆخی ژنان لە وڵاتانی قەیراناوی و بە تایبەت ئەفغانستان جێگەی نیگەرانییە.

ژنانی ئەفغانستان لە سەرەتاییترین مافەکانیان وەک مافی خوێندن و دادپەروەری و یەکسانی بێبەش دەمێننەوە و بەردەوامن لە ڕووبەڕووبوونەوەی سنووردارکردنی بەرفراوان.

 

 

 

گوڵان: سەردار خەلیل