یەكەتیی ئەوروپا رای گەیاند پێشوازی لەو رێككەوتنەی نێوان حكوومەتی عێراق و نەتەوە یەكگرتووەكان دەكات كە تایبەتە بە گواستنەوەی ئەندامانی گرووپی موجاهیدنی خەلق لە كەمپی ئەشرەف بۆ كەمپێكی نێزیك لە باڵەفڕگەی بەغدا كە لەوێوە دەگوازرێنەوە بۆ وڵاتی سێیەم.

كاترین ئەشتۆن بەرپرسی سیاسەتی دەرەوەی یەكەتیی ئەوروپا، دوێنێ دووشەم لە بەیاننامەیەكدا رای گەیاند: یەكەتیی ئەوروپا پشتیوانیی تەواو لەو رێككەوتنە دەكا كە بەهۆیەوە دانیشتوانی كەمپی ئەشرەف بەشێوەیەكی كاتی دەگوازرێنەوە بۆ ناو بەغدا و دواتریش لەوێوە كۆمسیۆنی باڵای كاروباری پەنابەرانی نەتەوە یەكگرتووەكان دەیانگوازێتەوە بۆ وڵاتی سێیەم.

ئەشتۆن زیاتر گوتی: یەكەتیی ئەوروپا دەخوازێ عێراق بە شێوەیەكی رێكوپێك و بێ زۆرەملێ دانیشتوانی كەمپی ئەشرەف بۆ شوێنە كاتییەكە بگوازێتەوە، هاوكات هیوای خواست دانیشتوانی كەمپی ئەشرەف رێز لە مەرجەكانی رێككەوتننامەكە بگرن و یارمەتیی سەكردەكانیان بدەن لە جێبەجێكردنی.

كەمپی ئەشرەف سەربازگەیەكی تایبەت بە ئەندامانی ڕێكخراوی موجاهیدینی خەلقی بەرهەڵستكاری ئێرانە كە زیاتر لە 3 هەزار كەسی تێدا دەژی و دەكەوێتە باكوری رۆهەڵاتی بەعقووبەی سەنتەری پارێزگەی دیالە.

ئەو كەمپە لە سەردەمی ڕێژیمی لێخراوی عێراقدا دامەزراوە، بەڵام لە ساڵی 2003 هێزەكانی ئەمەریكا سەربازگەكەیان لە چەك داماڵی و دوای ئیمزاكردنی رێككەوتننامەی تەناهیی نێوان ئەمەریكا و عێراق، حكوومەتی عێراق بەرپرسیارەتیی كەمپەكەی كەوتە ئەستۆ.