پرسی ئازادكردنەوەی شاری موسڵ و هەماهەنگیی نێوان سەرۆك بارزانی و هاوپەیمانان و هاوپەیمانی نێوان پێشمەرگە و سوپای عێراق لە قۆڵی مەخموورەوە بوونەتە رۆژەڤی نێو میدیاكان و زۆر بە گەرمی باسی لێوە دەكرێت، بەڵام پرسیاری سەرەكی لەسەر ئەم پرسە ئەوەیە ئایا ئەم پرۆسەیە كەی و چۆن دەست پێدەكات؟ ئایا ئەو هێزانە كامانەن كە بەشداری لەو پرۆسەیە دەكەن؟ ئایا ئەو مەرجانە چین كە لایەنی كوردستانی لە پرۆسەی ئازادكردنەوەی موسڵ هەیەتی؟ بۆ قسەكردن لەسەر پرسی ئازادكردنی موسڵ و وەڵامدانەوەی ئەم پرسیارانە سەردانی فەریق جەمال محەمەد سوپاسالاری هێزی پێشمەرگەی كوردستانمان كرد و لەم دیمانە تایبەتەی گوڵاندا بەمجۆرە وەڵامی داینەوە.

* ئێستا ئامادەباشییەكی زۆر هەیە بۆ ئازادكردنەوەی موسڵ، دیارە هەمانگییەكی زۆریش لە نێوان سەرۆك بارزانی وەك فەرماندەی هێزە چەكدارەكانی كوردستان لەگەڵ هێزەكانی ئەمەریكا هەیە، هەروەها هەماهەنگییەكیش لە نێوان پێشمەرگە و سوپای عێراق هەیە. ئایا تاچەند ئازادكردنەوەی موسڵ گرنگە و تاچەند بە ئازادكردنی موسڵ دوایین پێگەی داعش لە عێراقدا كۆتایی دێت؟
- دیارە مەسەلەی هەماهەنگی لە نێوان سەرۆك بارزانی وەك فەرماندەی گشتی هێزە چەكدارەكانی كوردستان لەگەڵ دەوڵەتانی هاوپەیمانی دژی داعش، هەر لەسەرەتای شەڕەكەوە هەتا ئێستاش ئەو هەماهەنگییە بەردەوامە، هەربۆیە بەردەوامیش بەرپرسان و وەزیرانی بەرگری و ژەنڕاڵە سەربازییەكانی ئەمەریكا و دەوڵەتانی هاوپەیمان سەردانی بەرەكانی هێزی پێشمەرگەیان كردووە، هەتا ئێستاش هەماهەنگییەكی باشیان لەگەڵ هەموو میحوەرەكانی پێشمەرگە هەیە، سەبارەت بە پرۆسەی ئازادكردنی شاری موسڵیش، دیارە ئێستا ئەم بابەتە زۆر بە فراوانی لە میدیاكاندا باسی لێوە دەكرێت، ئامادەباشی بۆ ئەم پرۆسەیە دەستی پێكردووە و لە رێگەی هاوپەیمانانەوە هەماهەنگی لە نێوان هەرێمی كوردستان و عێراق دروستكراوە، بۆ ئەمەش سەربازگەیەك بۆ ئامادەباشی (معسكر تحشد) لە ناوچەی مەخموور دروستكراوە كە هەردوو لیوای 15 و 16ی سوپای عێراقی لێ جێگیركراوە، بڕیارە لەوێوە دەست بە پرۆسەی ئازادكردنەوەی شاری موسڵ بكرێت. ئەم پرۆسەیەش قۆناخ بە قۆناخ دەبێت، بەڵام هەتا ئێستا وردەكاری ئەم پلانە بە تەواوەتی نەگەیشتۆتە دەستی وەزارەتی پێشمەرگە، ئەگەر وردەكاری ئەم پلانەش گەیشت ئەوكاتە وەك دەڵێن بۆ هەموو رووداوێك قسەی خۆمان دەبێت.



* ئەی سەبارەت بە بەشداریكردنی هێزی پێشمەرگەی كوردستان بۆ چوونە ناو شاری موسڵ، ئایا پێشمەرگە دەچێتە ناو شاری موسڵ بۆ ئازادكردنەوەی تەواوی شارەكە؟
- مەسەلەی چوونی هێزی پێشمەرگە بۆ ناو شاری موسڵ، ئەوە پەیوەستە بە بڕیاری سەرۆك بارزانی-یەوە، هەر بۆیە جارێ نازانرێت سەرۆك بارزانی ئەو بڕیارە دەدات، یان نە، بەڵام سەبارەت بە دەوروبەری شاری موسڵ، بۆ نموونە وەك دەوروبەری قەرەقوش، ناوچەكانی بەڕتەڵە، بەعشیقە، شەلالات هەتاكو تەلكێف، دیارە ئەم ناوچانە هەتا بەرواری 2ی ئابی 2014 كە تیرۆریستانی داعش هێرشیان بۆكردووە، لە ژێر دەستی پێشمەرگەدا بوون، بۆیە ئەگەر پرۆسەی ئازادكردنی موسڵ دەستی پێكرد، ئەوا دەبێت پێشمەرگە ئەو ناوچانە رزگار بكاتەوە و پێشڕەوی بكات و بچێتەوە ناوچەكانی خۆی، دیارە ئەم ناوچانە زۆر نزیكن لە ناو شاری موسڵەوە، بەڵام لە باشووری موسڵەوە هێزەكانی عێراق زۆر دوورن لە موسڵەوە، بۆ نموونە نێوانی بێجی تا موسڵ 120 كیلۆمەترە، هەروەها ناوچەكانی حەویجە و فەتحە كە زۆر هەستیارن، هەتا ئێستا ئەم ناوچە فراوانە بە دەست تیرۆریستانی داعشەوەیە، ئەم ناوچانەش كاریگەری تەواویان لەسەر پرۆسەكە دەبێت، بۆیە دەبێت لە باشوورەوە ئەو ناوچانە هەموویان ئازادبكرێنەوە، هەتا دەگەنە ناوچەی حەمام عەلیل و نزیكی موسڵ لە باشوورەوە، پێشمەرگەش لە باكوور و رۆژئاوا و رۆژهەڵاتەوە دەوری موسڵی داوە و ئەو ناوچانەی كۆنتڕۆڵكردووە، هەتا ئێستاش هەر ماوە ماوە بەردەوامە لە ئازادكردنەوەی ئەو ناوچانەی لە ژێر دەستی تیرۆریستانی داعش ماون.


* دیارە پرۆسەی ئازادكردنەوەی شنگال لەسەر دەستی هێزی پێشمەرگە و بە هاریكاری هێزە ئاسمانییەكانی هاوپەیمانان، گرنگییەكی گەورەی هەبوو بۆ پرۆسەی ئازادكردنەوەی موسڵ، ئایا تاچەند ئازادكردنەوەی شنگال، توانای داعشی سنووردار كردووە؟
- بە ئازادكردنەوەی شنگال لەسەر دەستی پێشمەرگە و بەهاوكاری هاوپەیمانان، شەڕی دژی داعش چووە قۆناخێكی دیكە و ئەمەش دەنگدانەوەیەكی گەورەی لەسەر ئاستی ناوچەكە و جیهان دروستكرد، ئازادكردنەوەی شنگال گرنگییەكی لە رادەبەدەری هەبوو، لەبەر ئەوەی ئەو رێگە ستراتیژیەی داعشی لە دیوی عێراق لە موسڵەوە بە داعشی لە دیوی سووریا بە رەقەوە گرێدەدایەوە، پێشمەرگە ئازادی كرد، بە ئازادكردنەوەی ئەم رێگەیەش پێوەندی داعشی دیوی عێراق بە داعشی دیوی سووریاوە قورس بووە، بەڵام دیارە ئەو ناوچەیە دەشتاییەكی فراوانە و تیرۆریستان دەتوانن رێگەی دیكە پەیدا بكەن، بەڵام هاتوچۆی نێوانیان قورس بووە، بۆیە ئازادكردنەوەی شنگال بایەخێكی زۆر گرنگی هەبوو بۆ سنوورداركردنی تواناكانی داعش لەم شەڕەدا. هەر بۆیە هێزی پێشمەرگەی كوردستان و سەركردایەتی حەكیمانەی سەرۆك بارزانی لەم شەڕەدا بۆ جیهانی سەلماند كە پێشمەرگە تەنیا هێزە لەسەر زەوی كە دەتوانێت ئەفسانەی تیرۆریستانی داعش بە تاڵ بكاتەوە، بۆیە ئێستا هاوپەیمانیش گەیشتوونە ئەو قەناعەتە كە هەر بەرەیەك پێشمەرگە بەشداری تێدا بكات و سەرۆك بارزانی راستەوخۆ سەرپەرشتی بكات، سەركەوتنی مسۆگەرە. من دڵنیام لە پرۆسەكانی داهاتووشدا تەنانەت ئەگەر پرۆسەی ئازادكردنی موسڵیش دەست پێبكات لە هەر قۆڵێكەوە پێشمەرگە هێرش بكات، جەنابی سەرۆك بارزانی راستەوخۆ لەسەر خەت دەبێت و لە ژێر سەرپەرشتی ئەودا شەڕەكە بەڕێوەدەچێت.




* ئەگەر باس لە پارێزگای نەینەوا بكەین، دیارە هێزی پێشمەرگەی كوردستان لە هەر چواردەوری موسڵ بوونی هەیە كە لە هەندێك شوێن چەند كیلۆمەترێك لەناو شاری موسڵ دوورە، ئایا تاچەند پێشمەرگە رۆڵی دەبێت لە ئازادكردنەوەی موسڵ؟
- وەك پێشتریش ئاماژەم پێكرد، هەتا ئێستا ئەو بڕیارە نەدراوە كە هێزی پێشمەرگە بەشداری لە شەڕی ناو موسڵ دەكات، یان نە، بەڵام ئەو ناوچانەی ئاماژەم پێكردن وەك بەعشیقە و شەلالات و بەڕتەڵە و گوگجلی، زۆر لە موسڵەوە نزیكن، تەنانەت ناوچەی گوگجلی ئێستا بۆتە یەكێك لە گەڕەكانی شاری موسڵ، بۆیە پێشمەرگە دەبێت بۆ ئەم ناوچانە پێشڕەوی بكات و ئازادیان بكاتەوە، بەڵام بۆ چوونە ناو موسڵ ئەوە سەرۆك بارزانی بڕیاری لەسەر دەدات، یان ئایا هێزەكانی هاوپەیمانان داوا لە سەرۆك بارزانی دەكەن پێشمەرگە بەشداری بكات؟ هەتا ئێستا ئەم وردەكارییە دیار نییە و نەگەیشتۆتە وەزارەتی پێشمەرگە.
* لەم ماوەیەدا فەرماندەی ناوەندی هێزەكانی ئەمەریكا و هەروەها وەزیری بەرگری فەرەنسا سەردانی هەرێمی كوردستان و بەرەكانی شەڕی دژی داعشیان كرد، ئەمەش نیشانەی ئەوەیە وڵاتانی هاوپەیمان بەنیازن هاوكارییەكی زۆر باشی پێشمەرگە بكەن، ئایا ئێوە بەئومیدن چۆن هاوكاری پێشمەرگە بكرێت؟
- دەوڵەتانی هاوپەیمان بە بەردەوامی نوێنەرەكانیان لە كوردستان و هەردوو هەفتە جارێك لە وەزارەتی پێشمەرگە لەگەڵیان كۆدەبینەوە، دیارە داوای هەمیشەیی ئێمە بۆ ئەوان ئەوەیە هاوكاری پێویستی هێزی پێشمەرگە لە چەكی پێشكەوتوو، تەقەمەنی هەمەجۆر، پێداویستییەكانی خۆپاراستن لە چەكی كیمایی، ئەندازەی سەربازیمان بكەن، دیارە نوێنەرەكانیشیان خۆیان لە نزیكەوە دەزانن پێداویستییەكانی هێزی پێشمەرگە چین و خۆیان رۆژانە لە بەرەكانی شەڕن، بۆیە ئەوەی بە پێویستی بزانن مەرجەعەكانی خۆیانیانی لێ ئاگادار دەكەنەوە، بەم دواییەش فەرماندەی ناوەندی هێزەكانی ئەمەریكا ژەنڕاڵ گۆستن و ژەنڕاڵ رۆئیل هاتن و سەردانی سەرۆكی هەرێمی كوردستانیان كرد، ئامانج لە سەردانەكەیان بۆ ئەوە بوو، فەرماندەی ناوەندی هێزەكانی ئەمەریكا تازە ئەو پۆستەی وەرگرتبوو، بۆ ئەوە هاتبوو دەستخۆشی سەركەوتنەكانی پێشمەرگە لە جەنابی سەرۆك بارزانی بكات و هەروەها ئەو هاریكاری و هەماهەنگییەی پێشتر لەگەڵ فەرماندەی پێشوو هەبووە، لەگەڵ ئەمیشدا بەردەوام بێت. لەم سەردانەیدا ئەوەی راگەیاند كە ئەمەریكا ئەو بەڵێنەی دایبووی كە هاوكاری دارایی پێشمەرگە بكات، ئەو بەڵێنە جێبەجێ دەكرێت و بە جەنابی سەرۆكی راگەیاندبوو ئەو كاتەی وەزیری بەرگری ئەمەریكا سەردانی عێراق دەكات، خۆی بە شەخسی سەرۆك بارزانی ئاگادار دەكاتەوە، هەروەك بینیتان وەزیری بەرگری ئەمەریكا هاتە عێراق و بە تەلەفۆن لەگەڵ سەرۆك بارزانی قسەی كرد و دووپاتی كردەوە كە هاوكاری دارایی پێشمەرگە دەكەن و بڕی هاوكارییەكەش 415 ملێۆن دۆلارە، بەڵام هێشتا ئەوە دیاری نەكراوە ئەم بڕە پارەیە بە چ میكانیزمێك بۆ پێشمەرگە خەرج دەكرێت. بۆ ئەمە پێویستە حكومەتی هەرێمی كوردستان بۆ شێوازی خەرجكردنی ئەو پارەیە لە رێگەی دامەزراندنی لیژنەیەكەوە هەماهەنگی دروست بكات.



* تیمی گوڵان لە میانەی بەسەركردنەوەی بەرەكانی شەڕدا، زۆر جار لە فەرماندە سەربازییەكان ئەوەمان گوێ لێ بووە، چەند پێشمەرگە ناوچەی دیكە ئازاد بكاتەوە، ئەوە بەرەی شەڕەكەی فراوانتر دەبێت و پاراستنی ناوچە ئازادكراوەكان قورستر دەبێت، بێگومان لە پرۆسەی ئازادكردنەوەی موسڵیشدا، بەرەی پێشمەرگە فراوانتر دەبێت، ئایا پرسی پاراستنی ناوچە ئازادكراوەكانتان لەبەر چاو گرتووە؟
- سوپاس بۆ خوا و بۆ ئیرادەی پۆڵایینی هێزی پێشمەرگەی كوردستان، هەتا ئێستا ئەو ناوچانەی ئازادمان كردوون، هەموویان پارێزراون، ئیرادە و توانای ئێستای هێزی پێشمەرگە لەگەڵ سەرەتای شەڕەكە جیاوازییەكی زۆری هەیە، لە سەرەتای شەڕەكە پێشمەرگە رانەهاتبوو لە بەرەیەكی فراوانی دەشتاییدا شەڕێكی وا گەورە بكات، بەڵام لە میانەی ئەم شەڕە توانای پێشمەرگە گۆڕانكاری بەسەردا هاتووە و فێری تاكتیكی شەڕی دەشتایی و تاكتیكی لێدانی تیرۆریستان بووە و هەروەها دەزانێت بەرنامە دابنێت چۆن تاكتیكی تیرۆریستان پووچەڵ بكاتەوە، هەروەها پێشمەرگە فێری شەڕی ناوشار و پاككردنەوەی تیرۆریستان بووە لە گوند و ناحیە و شارەكانیش. دوای ئەوەی چەكی دژەتانكیش گەیشتە دەستی پێشمەرگە، وەك چەكی میلان، بی ئێس، قازیفەی 18 ملم، ئەمانە رۆڵی كاریگەریان گێڕاوە لە تێكشكاندنی ئۆتۆمبیل و تانك و زرێپۆشە خۆكوژییەكانی داعش، لەمەش زیاتر ئێستا پێشمەرگە هەر ناوچەیەك ئازاد دەكات سەنگەری پتەو هەروەها خەندەق لێدەدات بۆ ئەوەی رێگە لە تانك و زرێپۆشە بۆمبڕێژكراوەكانی داعش بگرێت، بۆیە دەتوانم بڵێم هەر ناوچەیەك پێشمەرگە ئازادی بكات، توانای پاراستنیشی هەیە.
* بەڵام زۆر جار باس لەوە دەكرێت كە تیرۆریستانی داعش پەنا بۆ بەكارهێنانی چەكی كیمیایی دەبەن، ئایا ئەم چەكەیان لەچەند شوێن بەكار هێناوە؟
- داعش دوای ئەوەی تاكتیكی ئۆتۆمبێلە زریپۆشە بۆمبڕێژكراوەكانیان پووچەڵ كرایەوە، پەنایان بۆ كەسە خۆكوژەكان برد، بەڵام ئەوەشیان بۆ نەچووەسەر بۆیە پەنایان برد بۆ هاوەن و ئەو رۆكێتانەی كە زیاتر دەستكردی خۆیانن، هەروەها پەنایان بۆ چەكی كیمایی برد، ئەو یش لە رێگەی بەركارهێنانی كلۆر و گازی خەردەل، ئەم چەكەیان لە شوێنێكی وەك شنگال و مەخموور تاقیكردۆتەوە، بەڵام سوپاس بۆ خوا تائێستا هیچ پێشمەرگەیەك بە كیمایی شەهید نەبووە، بەڵام حاڵەتی چاوسووربوونەوە و جەستە سووربوونەوە و رشانەوە هەبووە، بۆیە ئێستا بۆ بەرەكانی پێشەوەی شەڕ هەندێك دەمامكی گازمان ناردووە، بەڵام ئەوانیش كەمن و تەنیا 8000 دەمامكمان هەبووە، ئەمەش بەشی بەرەیەكی فراوانی شەڕ ناكات كە لە شنگالەوە تا جەلاولایە.
* دیارە باس لەوە دەكرێت كە هێزی سوننە بە ناوی حەشدی وەتەنی و سوپای عێراق و پێشمەرگە بەشداری لە پرۆسەی ئازادكردنەوەكە دەكەن، بەڵام هەندێك دەڵێن بەشێك لە حەشدی شەعبی بە ناوی سوپای عێراق بەشداری دەكات، ئایا ئەمە چۆن دەبینن، ئایا ناترسن بەهۆی حەشدی شەعبییەوە حەساسییەت دروست بیت؟
- ئەم پرسیارە لە لایەن كەناڵی جەزیرەشەوە لە چەند رۆژی رابردوو لە سەرۆك بارزانی كرا. بۆیە ئەو هێزانەی لەم شەڕە بەشداری دەكەن، لەلایەن خەڵكی موسڵ و سەرۆك هۆزەكانی ئەو ناوچانەوە بڕیار دەدرێت چ هێزێك بەشداری دەكات، موسڵ شارێكی زۆر ئاڵۆزە و هەموو پێكهاتەكانی تێدایە، وەك عەرەبی سوننە و شیعە، توركمانی شیعە و سوننە، كوردی موسڵمان و كوردی ئێزیدی و شەبەك و كریستیانەكانی تێدایە، بۆیە دەبێت لە پلانی ئازادكردنەوەی ئەو شارەدا هەموو ووردەكارییەك رەچاو بكرێت و بە وردی مامەڵە لەسەر هەستیاریی ئەم شارە بكرێت. نابێت هەڵەی پێشەوە دووبارە بكەینەوە كە هەندێك لە فەرماندەكانی موسڵ لە سەر بنەمای مەزهەبگەرایی دانرابوون كە ئەمە بووە هۆكاری سەرەكیی داگیركردنی موسڵ لەلایەن داعشەوە، هەروەها ناكرێت ئەوەی لە تكریت و دیالە لە سەر دەستی حەشدی شەعبی روویدا لە موسڵیش دووبارە بێتەوە، ئەمەش واتە دەبێتە شەڕێكی مەزهەبگەرایی نێوان شیعە و سوننە، بۆیە ئەمە پێویستی بە مامەڵەیەكی ورد هەیە و دەبێت خەڵكی موسڵ بڕیار بدەن چ هێزێك بەشداری بكات، یان بەشداری نەكات.
* ئەگەر سەرنج لە لێدوانی فەرماندەی هێزەكانی ئەمەریكا بدەین، ئەوان راشكاوانە رایانگەیاندووە، سوپای عێراق لە ئێستادا ئەو ئامادەباشییەی بۆ دروست نەبۆتەوە كە بە تەنیا بتوانن موسڵ ئازاد بكەنەوە. وەك سوپاسالاری پێشمەرگە چۆن سوپای ئێستای عێراق دەبینن؟
- سوپای عێراق زۆر هیلاكە و ماندووبوونێكی زۆر و بێ ورەییەكی زۆری پێوە دیارە، زۆر زەحمەتە هێزێكی ئاوا هیلاك و لە دوای شكست لە شوێنكەوە بهێنیت و بیخەیتە ناو شەڕێكی ئاواوە، بۆیە سوپای ئێستای عێراق ئەو ئیرادەیەی كە پێشمەرگە هەیەتی، ئەوا هێشتا ئەو ئیرادەیەی بۆ دروست نەبۆتەوە، مەبەستم ئەوە نییە بە چاوی كەم سەیری سوپای عێراق بكەم، بەڵام ئەوە واقیعە و پێش دوو هەفتە ئەوەی من بە چاوی خۆم بینیومە، ئەوە بووە ئەو دوو لیوایە دووجار زۆر هەوڵیاندا نەیانتوانی گوندی حەی نەسڕ رزگار بكەن، دیارە بوونی هێزێكی لەم جۆرە كاریگەری نەرێنی تەواوی لە سەر پرۆسەكە دەبێت، دەبێتە هۆكاری چەكدارانی داعش ورەیان بەرز ببێتەوە، بۆیە پێویستە هێزێكی باشتری زریپۆش بهێنن بۆ ئەوەی هێزەكە بتوانێت باشتر پێشڕەوی بكات و ناوچەكان ئازادبكاتەوە، بەڵام بەم هێزەی ئێستا هێناویانە كە ناتوانن گوندێك ئازاد بكەنەوە، پرسیار ئەوەیە چۆن شەڕی ئازادكردنەوەی شارێكی وەك موسڵی پێدەكرێت؟ ئەگەر بیانەوێت لە ئازادكردنەوەی موسڵ سەركەتوو بن، دەبێت نەك هەر هێزێكی باش، بەڵكو هێزێكی پشتگیری (اسناد)ی زۆر باشیش ئامادەبكەن، ئەگەر ئەم هێزە دەبێتە هۆكاری ئەوەی ورەی هەموو هێزەكانی تریش نەمێنێت و تا دەگاتە ئەوەی ببێتە هۆكاری ئەوەی لەشكرەكە بشكێت پێش ئەوەی ئامانجی سەرەكییەكە دەستی پێكردبێت.
* كورد ئەزموونی تاڵی لەگەڵ حكومەتەكانی بەغدا هەیە، بۆیە ئێستا باس لەوە دەكرێت سەرۆك بارزانی بە مەرج هەماهەنگی لەگەڵ حكومەتی عێراق دەكات بۆ ئازادكردنەوەی موسڵ، ئایا بەپێی ئاگاداری ئێوە مەرجەكانی سەرۆك بارزانی چین؟
- دیارە موسڵ شارێكی ستراتیژییە بۆ هەرێمی كوردستان، بۆیە هەتا موسڵ بەدەست چەكدارانی داعش، یان هەر هێزێكی دیكەی دوژمنی كوردستانەوە بێت، ئەوا بەردەوام هەڕەشە لەسەر كوردستان دروست دەكات بەتایبەتیش لەسەر هەردوو شاری هەولێر و دهۆك كە لە موسڵەوە نزیكن، هەروەها موسڵ شارێكی ستراتیژییە بۆ كورد لە بەر ئەوەی پێشتر 30%ی دانیشتووانی موسڵ كورد بوون، بەشێك لە گەڕەكەكانی ناو موسڵ 90%ی دانیشتووانەكەی كورد بوون، بۆیە لەم روانگەیەوە جەنابی سەرۆك بارزانی هەموو كات جەخت لەسەر ئەوە دەكاتەوە كە ئایا دوای ئازادكردنەوەی موسڵ لەدەستی داعش بارودۆخەكە چۆن دەبێت؟ ئەمەش واتە ئایا دوای ئازادكردنەوەی، چۆن ئیدارەی ئەو شارە دەكرێت؟ ئەو ناوچە كوردستانیەكانی پارێزگای نەینەوا كە پێشتر لە چوارچێوەی ماددەی 140ی دەستوری عێراق بوون و ئێستا پێشمەرگە ئازادی كردوون، چۆن مامەڵەیان لەگەڵ دەكرێت و بە چ میكانیزمێك؟ ئەم مەرجانە زیاتر لەسەر ئاستی حكومەتی هەرێم و حكومەتی عێراق قسەی لەسەر دەكرێت و دەبێت بە ئامادەبوونی ئەمەریكا و هەردوو حكومەت لە سەری رێكبكەون، بۆیە نابێت هەمان هەڵەی 2003 دووبارە بكەینەوە و بچینە ناو موسڵ و دوای هەفتەیەك بڵێن فەرموو بكشێنەوە ئەو ناوچانە عەرەبین و نابێت پێشمەرگەی تیدا بێت، ئەمەیە كە سەرۆك بارزانی جەختی لەسەر دەكات و دەبێت پێشوەختە رێككەوتنی لەسەر بكرێت.
* بەڵام ئەگەر دواتر حكومەتی عێراقی بەو رێككەوتنە پابەند نەبوو، ئایا سوپای عێراق مەترسی لەسەر كوردستان دروست ناكات؟
- سەركردایەتی كوردستان خۆی لەسەر خەتە و ئاگادارە، دەزانین لە دوای 2003 باردۆخەكە چۆن بووە و چۆن نەبووە، شارەزاییەكی باش بۆ هەموو لایەك دروست بووە، ئەوەی ئەو كات روویدا، ئەمجارە رووناداتەوە، لەم پرسەدا ئەمەریكا بە هەموو هێزی خۆی هاتۆتە ناوەوە، هەروەك دەبینین بڕیاری دا هەلیكۆپتەری ئەپاچیش لەم پرۆسەیەدا بەشداری پێبكات، ئەمەش مانای ئەوەیە هەموو ئامانجی ئەمەریكا ئەوەیە ئەم پرۆسەیە سەركەوتوو بێت، ئەو رێككەوتنەشی بە ئاگاداری ئەمەریكا دەكرێت، دەبێت ئەمەریكا گەرەنتی جێبەجێكردنی بكات دوای تەواوبوونی پرۆسەی ئازادكردنەوی شاری موسڵ.
* دیارە رۆڵ و گرنگیی بەشداری سەرۆك بارزانی لە بەرەكانی شەڕ زۆر بە ئاشكرا دیارە، خۆت بەشداری هەموو شەڕەكانت كردووە بەگشتی و لە شەڕی ئازادكرنەوەی شنگالیش بوویت، ئایا سەرۆك بارزانی لەم پرۆسەیە بەشداری دەكات و سەكردایەتی شەڕەكە دەكات؟
ئەوەی گومانی تێدا نییە، ئەوەیە جەنابی سەرۆك بارزانی پێش هەموو شت خۆی بە پێشمەرگە دەزانێت و لە زۆربەی بەرەكانی شەڕ بەشداری كردووە، هەر بەرەیەكی شەڕیش كە جەنابی سەرۆك سەرپەرشتی كردبێت، رێژەی سەركەوتنی 100% بووە، ئەمەشمان لە شەڕی ئازادكردنەوەی شنگال و زوممار و رەبیعە بینی. بۆیە دڵنیام لەوەی لە هەر شوێنێكەوە پێشمەرگە هێرش بكات، جەنابی سەرۆك راستەوخۆ لەسەر خەت دەبێت و راستەوخۆش سەرپەرشتی دەكات، ئەمەش كلیلی سەركەوتنەكانی هێزی پێشمەرگەیە.