بۆچوونەكانی بەڕێز ستۆران ستیفنسۆن بەو پێیەی سەرۆكی شاندی پەرلەمانی ئەوروپایە بۆ پێوەندی لەگەڵ عێراق، تاڕادەیەكی زۆر رەنگدانەوەی پەرلەمانی ئەوروپا و یەكێتی ئەوروپایە سەبارەت بە هەڵوێستی پەرلەمان و یەكێتی ئەوروپا بەرامبەر بە عێراق و هەرێمی كوردستان، ئەمەش لەبەر ئەوەیە پەرلەمانی ئەوروپا لەبەر رۆشنایی ئەو راپۆرتانە هەڵوێستی خۆی دیاری دەكات، كە ستۆران ستیڤنسۆن و شاندەكەی لەمیانەی سەردانە مەیدانییەكانی بۆ بەغداو هەولێر ئەنجامی دەدەن، لەم چوارچێوەیەدا و بۆ زیاتر تێگەیشتن لە هەڵوێستی پەرلەمان و یەكێتی ئەوروپا سەبارەت بە بارودۆخی عێراق، گوڵان پێوەندی بە سەرۆكی شاندی پەرلەمانی ئەوروپا بۆ پێوەندی لەگەڵ عێراق لە برۆكسل كردوو بەڕێز ستۆران ستیڤنسۆن بەمجۆرە وەڵامی پرسیارەكانی گوڵانی دایەوە و رای خۆی بەمجۆرە دەربڕی.

* بە رەوچاكردنی ئەو رووداوانەی بەم دواییە روویاندا، ئایا بەڕێزت وەك سەرۆكی شاندی پەرلەمانی ئەوروپا بۆ پێوەندی لەگەڵ عێراق، بە شێوەیەكی گشتی چۆن سەیری بارودۆخەكە دەكەن لە عێراقدا؟
- ئەمە پرسیارێكی جێی سەرنجە، لەبەر ئەوەی من دوێنی(مەبەستی رۆژی 12/6/2014یە)، لەدوای دەست بەكاربوونی كۆمەڵەی ئەوروپی و عێراقی بۆ ئازادی ((The European Iraqi Freedom Association)) كۆنگرەیەكی رۆژنامەنووسیم گرێدا، بیرۆكەی پشت دروستكردنی ئەم رێكخراوە نوێیەش بریتییە لە رەخساندنی دەرفەت بۆ عێراقیەكان بۆ گەیاندنی دەنگی خۆیان، ئەو عێراقیانەی نەهامەتیەكی زۆریان بینیوە و تا ئێستا بە دەست دوو دیكتاتۆرەوە ناڵاندویانە و دەناڵێنن، جاری یەكەم بە دەست سەددام حوسێنی دیكتاتۆرەوە ناڵاندویانە و ئێستاش بە دەستی دیكتاتۆریەتی مالیكیەوە و بە دەست هەڵمەتە كومەڵكوژیەكانەوە «Genocidal Campaign» لە فەللوجە و روممادی و، بەدەست گەندەڵیەوە دەناڵێنن، چونكە بانكی جیهانی رایگەیاندووە كە لە عێراقدا داهاتی تاكەكەسی لە ساڵێكدا تەنیا 1000 دۆلارە، ئەمەش عێراق دەكاتە یەكێك لە هەرە هەژارترین وڵاتانی جیهان، ئەمە سەرەڕای ئەو راستیەی لە دوای رووخانی سەددام حوسێنەوە زیاتر لە 520 ملیار دۆلار لە سامانی نەوت بەدەست هێنراوە، لەبەر هەموو ئەم هۆكارانە جێی سەرسوڕمانی من نەبوو كە راپەڕینی گەورە روویداوە، ئەمەش واتە ئەوەی لە فەللوجە و روممادی و پارێزگای ئەنبار دەست پێبكات، كە بەرەو موسڵ درێژبۆتەوە و نیوەی پارێزگاری سەڵاحەددین بگرێتەوە، و ئێستاش ئەو خەڵكانە و ئەو هۆزانەی لە دژی مالیكی راپەڕیون بەرەو بەغدا دەڕۆن و ئێستا تكریتیان كۆنتڕۆڵ كردووە، پێموایە ئەمە پرۆسەیەكی مەترسیدارە. بەڵام ئایا ئەمە مەترسی بۆ كوردستان و سەقامگیری كوردستانیش دروست دەكات؟ من پێموایە مایەی نیگەرانیەكی گەورەیە و مەترسی بۆ كوردستانیش هەیە، بە تایبەتی كە ئێستا كەركوك بەو هێزانە گەمارۆ دراون.
* ئەوەی لەم بارودۆخە جێگەی هەڵوەستەیە، ئەوەیە مالیكی گەمارۆی خستۆتە سەر كوردستان و هەتا ئێستا بودجەی كوردستانی بڕیووە، لەم بارودۆخەشدا بە سەدان هەزار پەنابەر روودەكاتە كوردستان، ئایا ئەمە تاچەند بارودۆخی هەرێمی كوردستان قورس دەكات؟
- بە دڵنیاییەوە مالیكی تەحەددای مافی هەرێمی كوردستانی كردووە بۆ ئەوەی لە رێی توركیاوە نەوت بفرۆشێت، لە كۆتاییدا پەنا بردراوەتە بەر دادگا. پێموایە كوردستان مافی خۆیانە بەشێكی داهاتی نەوتیان پێبدرێت. من دەزانم كوردەكان بەپێی دەستوور مافی خۆیانە بەشێكی دیاریكراوی نەوتی خۆیان بۆ خۆیان بێت، بەڵام ئەمە لەلایەن مالیكی و حكومەتەكەیەوە رەتكراوەتەوە، لەبەر ئەوە پێم وایە ئەوەی كوردەكان كردویانە پاساوی خۆی هەیە، ئێستاش مەترسیەكە ئەوەیە كە ناسەقامگیری لە بەشەكانی دیكەی عێراقدا نەبێتە مەترسی بۆ سەر ئاشتی لە كوردستاندا.
* ئەگەر دەوڵەتی ئیسلامی لە عێراق و شام(داعش) سەركەوتوو بن لە داگیركردنی بەشێكی عێراق و سوریا، ئەوا دەوڵەتی ئیسلامی دادەمەزرێنن و ئایا ئەمە چ زەحمەتیەك دروست دەكات؟ چونكە ئەو كاتە ئەوان دەسەڵاتیان بەسەر مەدەنیەكانیشدا دەبێت، هەروەها ئایا تا چ راددەیەك مانەوەی مالیكی لە دەسەڵاتدا مەترسیە بۆ سەر ئاییندەی عێراق؟
- راستە لەم راپەڕینە گەورەیە دەوڵەتی ئیسلامی لە عێراق و شام (داعش)ی تێدایە، بەڵام بە هەمان شێوە خەڵكی موسڵ و ئەنباریشی تێدایە، كە ئەوان راپەڕینیان بە هاوكاری و سەركردایەتی داعش كردووە، لەبەر ئەوەی لە ژێر هەڕەشەی مالیكیدا بوون، جێی سەرسوڕمان نەبوو كە ئەمە لە چەند هەفتەیەكی كەمدا دوای هەڵبژاردنە پڕ لە ساختەكاریەكان روویدا، كە مالیكی ویستی ئەوە بە جیهان بفرۆشێتەوە كە چەند كورسیەكی زیاتری بەدەست هێناوە. بە بەراورد بە جاری پێشوو- چوار ساڵ پێش ئێستا-كە 89 كورسی هێنا. و ئێستاش 92 كورسی هێناوە. مەحاڵ بوو خەڵكی باوەڕ بكەن كە دوای چوار ساڵ لە كوشتن و ئەشكەنجە و پشێوی و هەڵمەتی كۆمەڵكوژی دژی سوننەكان و سەركوتكردنی تایەفەگەری و گەندەڵی، چۆن پارتێكی سیاسی- بەم تۆمارەوە- دەتوانێت كورسی زیاتر بەدەست بهێنێت لە هەر هەڵبژاردنێكدا، ئەمە هۆكاری ئەوەیە كە خەڵكی لە دژی مالیكی راپەڕین. من لە دەست بەكاربوونی ئەو رێكخراوە نوێیەدا دوێنی لە برۆكسل، باس لەوە كرا كە خەڵكی عێراق نەهامەتی زۆریان بینیوە و پێویستیان بە حكومەتێك هەیە دوور بێت لە تایەفەگەری، حكومەتێك كار بۆ خەڵك بكات و داهاتی ئەو سامانە دەوڵەمەندەی وڵاتەكە بە یەكسانی لە نێوان هەموو هاووڵاتیاندا بەش بكات، پێویستە رێز لە مافەكانی مرۆڤ و مافەكانی ئافرەتان بگرێت و كۆتایی بە سزای لە سێدارەدان بهێنێت، ئەمە تاكە رێگای كۆتایی هێنانە بە شەڕەكە. و سەركردایەتی مالیكی بەرپرسیارە لە دروستكردنی ئەم شەڕە و ئەو بانگەشەی ئەوە دەكات شەڕ لە دژی تیرۆر دەكات، بۆ ئەوەی هانی ئەمریكا و بەریتانیا و وڵاتانی ئەندامی دیكەی یەكێتی ئەوروپا بدات بۆ ئەوەی چەكی بۆ بنێرن بۆ یارمەتیدانی، هەروەها داوای لە دەوڵەتە دراوسێكان كردووە، لە ئێران، بۆ ئەوەی هێزی بۆ بنێرێت و هەندێ لە شەڕكەرە هەرە بە ئەزموونە سەرسەختەكانی بۆ بنێرێت بۆ ئەوەی یارمەتی بدەن، ئەمە بێڕێزیەكی تەواوە بە هەموو خەڵكی عێراق، كە ئێستا سەرباز و كارمەندی سەربازی و هێز لە ئێرانەوە هاتوونەتە عێراقەوە و بە ئاشكرا شان بە شانی هێزە عێراقیەكان شەڕ دەكەن. ئەمە قابیلی قبوڵ نییە و پێویستە رۆژئاواش باوەڕ بەوە نەكات كە ئەمە شەڕی دژە تیرۆریزمە، بەڵكو ئەمە شەڕە لە دژی راپەڕینێكی جەماوەری لە دژی دیكتاتۆریەتی مالیكی.
* مالیكی هێشتا باسی بەرهەڵستی دەوڵەتی ئیسلامی لە عێراق و شام(داعش) دەكات، بەڵام داوای هاوكاری لە پێشمەگەر ناكات، ئەمە لە كاتێكدا سەرۆك بارزانی ئامادەیی پێشمەرگەی راگەیاندووە بۆ یارمەتیدانی سوپای عێراق، و باسی ئەنجامدانی كردەوەی گەورە دەكات، ئەمە لە كاتێكدا هەموو كەس دەزانێت كە هەر كاتێك داعش هێرش بكات سوپا چەك فڕێ دەدات و رادەكات، تا چ راددەیەك ئەم هەڵوێستەی مالیكی ئاییندەی عێراق و یەكێتی عێراق و ئاسایشی وڵاتەكە دەخاتە مەترسیەوە؟
- پێویستە سەرۆك بارزانی- كە دۆستێكی زۆر باشی منە- پێشمەرگە بۆ بەرگریكردن لە خۆ حكومڕانی(ئۆتۆنۆمی) كوردستان بەكار بهێنێت، و بۆ چەندین ساڵە خەڵكی كوردستان لە ئاشتی و سەقامگیریدا دەژین و نابێت رابكێشرێنە ئەم شەڕەوە و نابێت رابكێشرێنە ئەم شەڕە ناوخۆییەوە. پێشمەرگە جەنگاوەرێكی زۆر بووێرە و لە جیهاندا بە بووێری و ئازایەتی ناسراوە، بەڵام پێویستە بەرگری لە سنوری كوردستان بكەن و ناوبانگی كوردستان وەك هەرێمێكی ئارام بۆ سەدان هەزار پەنابەر بپارێزن، ئەو پەنابەرانەی لە موسڵ و كەركوكەوە دێن. لەبەر ئەوە من داوا لە بارزانی دەكەم پێشمەرگە بۆ ئەم مەبەستە بەكار بهێنێت، نەك بیانێرێت بۆ پاڵپشتی كردنی هێزە سەربازییەكانی عێراق كە لە ژێر فەرماندەیی مالیكیدان.
* پەیامت چییە بۆ كوردەكان؟
- من هاوسۆزیەكی زۆرم هەیە بۆ كوردەكان، ئێوە لە جیهاندا ناوبانگیتان هەیە كە جێی ستایشە، چونكە سنوری خۆتان بۆ ئاوارەكان كردۆتەوە، ئێوە ناوچەیەكی ئارامتان بۆ خەڵكی سوریا دابین كردووە، كە من چەند مانگێك پێش ئێستا لە هەولێر بووم و سەردانی هەندێ كامپی ئەو ئاوارانەی سوریام كرد. ئێستاش پێشوازی لە سەدان هەزار ئاوارەی دیكە دەكەن كە لە بەشەكانی دیكەی عێراقەوە بەهۆی ئەو راپەڕینەوە ئاوارە بوونە، لەبەر ئەوە من هەمیشە ستایشی راستگۆیی و بووێری خەڵكی كوردستان دەكەم، من بە راستی ترسم لە ئاییندەی ئێوە هەیە، تەنیا ئەوكاتە نەبێت كە پێشمەرگە سنورەكەتان بپارێزێت و رێگە نەدات ئەو راپەڕین و ئەم شەڕە بپەڕێتەوە بۆ هەرێمەكەی ئێوە.