د پەیوەندی یێن نێڤدەولەتی دا، هێز بتنێ ب هژمارا چەکی ناهێتە پێوانەكرن، لێبەلێ ب شیانێن دەولەتێ بۆ گوهڕینا وێ هێزێ بۆ ئەنجامێن سیاسی، ململانێیا ئەمریكی-ئیرانی نموونەیەكا باشە بۆ تێگەهشتنا جوداهییا د ناڤبەرا خودانكرنا هێزێ و شیانێن بكارئینانا وێ دا.

ویلایەتێن ئێكگرتی هێشتا مەزنترین هێزا سەربازی و ئابووری و تەکنۆلۆژی یە ل جیهانێ و شیانێن وێ ب چەندین جاران ژ یێن ئیرانێ پترن، لێ ئەڤ راستییە ب وێ واتێ نینە كو واشنتۆن دشێت د هەر بارودۆخەكی دا ئیرادە یا خۆ ب وی شێوازێ وێ دڤێت بسەپینیت.

د بەرامبەر دا، ئیرانێ كار ل سەر ستراتیژیەتەكا جودا كرییە كو پشدانیێ ل سەر ئالۆزكرنا گۆڕەپانێن ململانێ یێ دکەت، شەڕێ ب بریکاری، و مفا وەرگرتن ژ هەڤسەنگی یێن هەرێمی دكەت، تارانێ پێ باشتر بوو كو دەڤەرێ بگوهڕیت بۆ تۆڕەكا تێكهەڵكێش ژ بەرژەوەندییان، دا كو هەر بڕیارەكا ئەمریكی بۆ بكارئینانا هێزێ، تێچوونێن بلند یێن سیاسی، ئەولەهی و ئابووری و هەژاندنا بازارێن وزێ د دویڤ خۆ دا بئینیت.

مرۆڤ دشێت ئەڤی دیمەنی ب بارهەڵگرەكا مەزن كو خودان بزوێنەرەکێ زەبەلاحە بئینتە بەرچاڤێن خۆ، لێ خۆ د ناڤ رێڕەوەكێ تەنگ دا دبینیتەڤە، كو رێكێ پێ نادەت ب ئازادی مانۆڕێ بكەت، هەرچەندی جهێ لڤینێ تەنگ ببیت، كاریگەری یا هێزێ كێم دبیت، ژ ڤی دەرگەهی دشێت مرۆڤ پشكەک ژ تەنگاڤییا رێڤەبەری یێن ئەمریكا یێن بەرێ و نها (وەک رێڤبەرییا ترامپی) تێبگەهیت؛ ئارمانج گوهۆڕینا رەفتارێن ئیرانێ بوو، لێ شەڕێ گشتگیر یێ ب تێچوویە، و فشارێن ئابووری ئارمانج تمام نەگەهاندن، و مەترسییا بەرفرەهبوونا شەڕی ژی یا هەی، ل دەڤەرەکێ کو دهێتە دانان ب هەستیارترین دەڤەر ل جیهانێ.

ل لایێ دی ڤە، نابیت زێدەگاڤی د شیانێن ئیرانێ دا بهێتە كرن وەک نیشانەكا دوماهی هاتنا هەژموونا هێزا ئەمریكا، ئیران بخۆ ژی رویبڕوی یێ تەحەدییاتێن مەزن یێن ئابووری، ناڕەزایەتی یێن ناڤخۆیی، و گۆشەگیرییا نێڤدەولەتی دبیتەڤە، ژبەر هندێ، ئاخفتن ل سەر سەركەفتنا رەها یا لایەنەکی ژ لایەنان، راستییا دیمەنێ ململانێیێ نیشا نادەت.

راستی ئەوە كو جیهان دناڤ گوهڕینێ دا دژیت؛ هێزا سەربازی یان زیرەكییا ستراتیژی ب تنێ بەس نینن بۆ ب دەستئێخستنا ئارمانجێن مەزن، ئێدی سەركەفتن ب شیانێن كۆمكرنا د ناڤبەرا هێز و نەرمیێ و بڕێڤبرنا هەڤسەنگییان دا هاتییە گرێدان، ئەڤ رویبڕویبوونەڤە یە تاقیكرنەڤەكا بەردەوامە؛ د ناکۆکی یێن وەها دا، پرسیار نە بتنێ ئەوە كا كی ب هێزترە، بەلكو ئەوە كا كێ پتر شیان هەنە بۆ كێشانا رێسا یێن یاریێ و لایەنێ دی نەچار بکەت كو د ناڤ وان رێسایان دا بلڤیت.