۱۱ـی ئەیلولی ساڵی ۱۹٦۱ ئەو پڕیشکەی کە ڕەوتی مێژووی گەلی کوردی گۆڕی، کاتێک سەرکردەی نەمر مەلا مستەفا بارزانی، شۆڕشی نەتەوەیی لە دژی نادادپەروەری و پەراوێزخستن ڕاگەیاند، ئاڵای ئازادی و کەڕامەتی بەرزکردەوە. ١١ـی ئەیلول تەنیا ڕووداوێکی سەربازی نەبوو؛ بەڵکو ئیڕادەیەکی جەماوەریی هەمەلایەنە بوو کە سەرتاسەری خەڵکی کوردستان بە گشت پێکهاتە نەتەوەیی و ئایینییە جیاوازییەکانەوە تێیدا بەشداربوون.

ئەم شۆڕشە ئەوەندەی شۆڕشێکی دیپلۆماسی بوو، ئەوەندەش شۆڕشێکی مەیدانی بوو. توانی دۆزی گەلی کورد بە جیهان بناسێنێت و بیخاتە سەر مێزی دیالۆگی نێودەوڵەتی، شۆڕش پڕەنسیپی هاوسەنگی نێوان خەباتی چەکداری و خەباتی سیاسی و دیپلۆماسی بەرجەستە کرد، دووپاتی کردەوە کە ناکرێ و قبولکراو نییە مافە ڕەواکانی خەڵکی کوردستان پشتگوێ بخرێن.

شۆڕشی ئەیلول بناغەی دانپێدانانی هەبوون و مافە نەتەوەییەکانی دانا و زەمینەی بۆ ئەو دەستکەوتە دەستووری و سیاسییانەی کە ئەمڕۆ هەرێمی کوردستان بەهرەمەندە، خۆشکرد. ئەوەی بەدەست هات، دیاری نەبوو، بەڵکو بەرهەمی قوربانیدانی بێئەندازە و خوێنی شەهیدان و خۆڕاگری پێشمەرگە قارەمانەکان بوو، کە ناوی خۆیان بە بەرزی شکۆمەندی لە مێژوودا چەسپاندووە.

بیرهێنانەوەی شۆڕشی ئەیلول تەنیا گەڕانەوە نییە بۆ ڕابردوو بەڵکوو نوێکردنەوەی بەڵێننامەی پاراستنی ئەزمونی دیموکراسی کورد و پاراستنی دامەزراوەکانی و پابەندبوون بە یەکێتی نەتەوەیی و پتەوکردنی پەیوەندییە دیپلۆماسییەکان لەگەڵ هەموو وڵاتانی دۆستە لەسەر بنەمای ڕێزگرتنی یەکتر و بەرژەوەندی هاوبەش.

شۆڕشی ئەیلول وەک قوتابخانەی نیشتمانپەروەری و دیپلۆماسی و چرایەک دەمێنێتەوە کە نەوە دوای نەوە بەرەو ئازادی و دادپەروەری و خۆنەچەماندن ڕێنمایی دەکات و پەیامێکی ڕوونە کە ناتوانرێت ئیڕادەی گەل بشکێنرێت، هەرچەند کات بخایەنێت. شۆڕشی ئه‌یلول، جگە لە بەدەستهێنانى چەندین دەستکەوتی نەتەوەیی و نیشتیمانی، یەکێک لە دەستکەوتە مێژووییەکانی رێككه‌وتننامه‌ى ۱۱ـی ئادارى ۱۹۷۰ بوو کە دوژمنى ناچار کرد دان بە بەشێک لە مافە نەتەوەیی و نیشتمانییە ڕەواکان دا بنێت و هەستی نەتەوەیی و نیشتیمانی سەرتاسەری و یەکڕیزی و یەکگرتوویی گەلی کوردستانی دروستبکات.

ئەمڕۆ یادی شەست و چوارەمین ساڵیادی هەڵگیرسانی شۆڕشی مەزنی ئەیلوولە کە بەسەرکردایەتیی ڕابەری نیشتمانیمان مستەفا بارزانی نەمر هەڵگیرسا، مێژوو شاهید و سەلمێنەری ئەوەیە وەک هەمیشە پارتی دیموکراتی کوردستان، بە ڕابەرایەتی و سیاسەتی حەکیمانەی جەنابی سەرۆک مسعود بارزانی ڕۆڵی پێشەنگانەی خۆی لە ڕێبەرایەتیکردنی گەلی کوردستان و پارێزگاریکردن لەدەستکەوت و مافە دەستوورییەکانی خەڵکی کوردستان تێدەکۆشێت و بەردەوامە، ئەمەشیان وایکردووە پارتیمان ببێتە چاوگەی هیوای گەلی کورد لە هەموو پارچەکانی کوردستان و فاکتەرێکی بەهێزی دڵنیایی و ئارامی و ئاوەدانی، له‌م یاده‌ پڕشكۆیه‌دا یادی هەموو ئەو پێشمەرگە قارەمانانە و تێکۆشەرانەی کوردستان دەکەینەوە كه‌ بەشداربوون لە چەسپاندنی ئیڕادەی نەتەوەیی.
سڵاو بۆ ڕۆحی پاکی بارزانی نەمر و کاکە ئیدریسی هەمیشە لەیاد، سڵاو بۆ ڕۆحی هەموو شەهیدانی ڕێگەی ئازادی گەلەكەمان، سڵاو لەپێشمەرگە قارەمانەکانی کوردستان.
بژیت کورد، بەهێز و پارێزاو بمێنێت کوردستان.

حسیبە سعید گەردی
۱۱ـی ئەیلوولی ۲۰۲٥