لەمیا جەمال بۆ گوڵان:هونەر ئامرازێكی بەهێزە بۆ نزیككردنەوەی گەلان و نەهێشتنی ناكۆكییەكان
لەمیا جەمال، ئەو هونەرمەندە بەناوبانگە تونسییەی كە لە ساڵی ١٩٩٠ لەدایك بووە، وێڕای ئەوەی لە سەرەتای ژیانیدا ڕووبەڕووی نەهامەتی و هەژاری بووەوە، توانیویەتی لە ڕێگەی گۆرانییەكانییەوە ناوبانگێكی جیهانی بەدەست بهێنێت. یەكێك لە كارە دیارەكانی كە لە تونس پێشوازییەكی گەرمی لێ كرا، گۆرانی «پێشمەرگە» بوو.
پەیوەندیی لەمیا لەگەڵ كوردستان بە شێوەیەكی چاوەڕواننەكراو و بە ڕێكەوت دەستی پێكرد. لە ساڵی ٢٠١٢، تەنیا دوو هەفتە دوای بەشداریكردنی لە بەرنامەی بەناوبانگی (The Voice)، بانگهێشتنامەیەكی بۆ سازكردنی ئاهەنگێك لە شاری هەولێر پێگەیشت. ئەو سەردانە بووە دەستپێكی پەیوەندییەكی قووڵ و بەردەوام. لەمیا خۆشەویستیی خۆی بۆ گەلی كورد ناشارێتەوە و بە گەلێكی میواندۆست و خاوەن سەلیقەی هونەری وەسفیان دەكات. ئەو ددان بەوەدا دەنێت كە هاتنی بۆ كوردستان خاڵێكی وەرچەرخان بووە لە ژیانی هونەرییدا و ناوبانگەكەی بە شێوەیەكی بەرچاو زیاد كردووە.
لەمیا جەمال ئاماژە بەوە دەكات كە لەم ڕێگە هونەرییەدا، گەلی تونس و بەتایبەتیش دایك و باوك و خێزانەكەی، گەورەترین پاڵپشتی بوون. تا ئێستا خاوەنی نزیكەی ٤٠ گۆرانییە، كە بریتین لە ئەلبوومێك و چەندین گۆرانیی سینگڵ. بەهرەكەی فرەزمانە و بە زمانەكانی عەرەبی، كوردی، ئینگلیزی، فەرەنسی و ئیتاڵی گۆرانیی گوتووە.
بەشێكی گرنگی كارەكانی تەرخان كردووە بۆ مۆسیقای كوردی و تا ئێستا چەندین گۆرانیی كوردی پێشكەش كردووە، كە بەشێكیان كاری تایبەتی خۆین و بەشێكیان گۆرانیی فۆلكلۆرین، كە ناوبانگێكی زۆر زیاتری پەیدا كرد. پێشوازیی گەرمی خەڵكی كوردستان لە گۆرانییەكانی وای لێ كردووە هەست بەوەبكات لە وڵاتی خۆیەتی و هیچ جیاوازییەك لە نێوان تونس و كوردستاندا نابینێت. هەرچەندە لە زمانی كوردی تێدەگات، بەڵام بۆ ئەوەی بە باشترین شێوە گۆرانییەكان بڵێتەوە، هاوكاری لە شارەزایان وەردەگرێت.
پەیوەندیی لەمیا بە كەلتووری كوردییەوە بۆ منداڵیی دەگەڕێتەوە، لە تەمەنی نۆ ساڵییەوە ئەو باوەڕی وایە كە هونەری كوردی دەرفەتی گەشەكردنی لە جیهانی عەرەبیدا هەیە. ئەو دەڵێت: «پێش زیاتر لە دە ساڵ كاتێك لە تونس دەمگوت دەچمە كوردستان، بە سەرسوڕمانەوە لێیان دەپرسیم كوێیە؟ بەڵام ئێستا هەمووان دەیناسن». بڵاوبوونەوەی گۆرانیی كوردی لە نێو هونەرمەندانی عەرەبدا وەك هۆكارێك بۆ ناساندنی هونەر و زمانی كوردی دەبینێت.
لەمیا باس لە كارەكانی خۆی دەكات و دەڵێت: «كە بەراوردی ئەوەی دەكەم لە ماوەیەكی دیاریكراودا بەدەستم هێناوە لەگەڵ ماوەكانی پێشتر، بێگومان هەست بە ئەنجامە ئەرێنییەكە دەكەم، دەبینم كە پێشكەوتنێكی بەرچاو هەیە، و هەموو ئەوەی پلانی بۆ دادەنێم لەسەر ڕێچكەی دروستی خۆیەتی، دوور نییە هەندێك جار مرۆڤ لە هەندێك شتدا شكست بهێنیت ئەمەش شتێكی ئاساییە، بەڵام لە بەرامبەردا سەركەوتنی زۆریش هەیە.»
لەمیا لە بارەی سۆشیال میدیاوە دەڵێت: « لە ڕێگەی سۆشیال میدیاوە چێژێك لە پەیوەندیی هونەرمەند لەگەڵ جەماوەر و كارلێكیاندا هەیە، بەڵام لە ماوەی درێژخایەندا ئەنجامەكەی لە بەرژەوەندیی هونەرمەند نابێت. سۆشیال میدیا بنەما نییە، بەڵكو دەبێت بناغەیەكی هونەری هەبێت كە هونەرمەند لێیەوە دەست پێ بكات، ئینجا ڕۆڵی سۆشیال میدیا وەك هۆكارێكی تەواوكەر دێت».
هەروەها دەڵێت: «من لە تۆڕە كۆمەڵایەتییەكان دانابڕێم، بەڵام لای من گرنگتر نییە لە ڕاهێنانكردن لەسەر گۆرانییەكی نوێ، كە بە ئاوازە جوانەكەی جیا بكرێتەوە و لەژێر سەرپەرشتیی دەرهێنەرێكی شارەزادا كلیپ بكرێت. من بە شێوەیەكی دروست و بەپێی بنەماكان كار دەكەم و خۆم بە شێوازێكی باش پێشكەش دەكەم، تا كارەكانم بمێننەوە و بەردەوام بن و گەشە بكەن، هەتا لە قۆناغێكی داهاتوودا دەبم بە ئەستێرە. بەلامەوە گرنگ نییە گۆرانییەك بە هەر شێوەیەك بێت بڵاوی بكەمەوە و تەنیا بۆ ماوەیەكی دیاریكراو ببێتە «ترێند» لەسەر سۆشیال میدیا».
لەمیا لە كۆتاییدا پەیامێكی پڕ لە ڕێز و پێزانین ئاراستەی جەماوەرەكەی لە كوردستان دەكات و دەڵێت: «بەڕاستی ئەوان ژیانیان گۆڕیم، هونەر ئامرازێكی بەهێزە بۆ نزیككردنەوەی گەلان و نەهێشتنی ناكۆكییەكان، بەتایبەتی لە نێوان گەلی كورد و عەرەبدا».
