دەزگای خێرخوازیی بارزانی، دەزگایەكی ناحكوومییە و لە ساڵی 2005ـەوە لەلایەن مەسرور بارزانی سەرۆكی حكومەتی هەرێمی كوردستانەوە دامەزرێنراوە و هەر خۆیشی سەرۆكی بۆردی ئەم ڕێكخراوە خێرخوازییەیە. دەزگای خێرخوازیی بارزانی هەر لە سەرەتای دامەزراندیەوە بەسەدان كاری خێرخوازی لە كوردستان و عێراق و ناوچەكە و جیهان ئەنجام داوە و بە دەیان پڕۆژە و خزمەتگوزاریی جۆراوجۆری گەیاندووەتە ئاوارە و پەنابەران، لێقەوماوان و كەسانی خاوەن پێداویستیی تایبەت، خەڵكی كەمداهات و منداڵانی ئازیز (بێباوك) و ئافرەتانی بێسەرپەرشت، ئەمە وێڕای بەڕێوەبردنی 16 كەمپ و نۆژەنكردنەوەی چەندین قوتابخانە و دەیان پڕۆژەی دیكەی دروستكردنی خانەی بەساڵاچووان و سەنتەری ڕۆشنبیری و پیشەیی و كەمپ و بنكەی تەندروستی و ئەنجامدانی چالاكیی كۆمەڵایەتی.

لەنوێترین پڕۆژەیدا و لەژێر چاودێریی سەرۆكی حكومەتی هەرێمی كوردستان، دەزگای خێرخوازیی بارزانی، «هەڵمەتی نیشتمانیی ڕووبەرووبوونەوەی ماددە هۆشبەرەكان»ی لەژێر دروشمی «بەیەكەوە بەرەو كۆمەڵگەیەكی بەهێز و ساخڵەم» ڕاگەیاند. بۆ قسەكردن لەسەر ئەم هەڵمەتە گرنگە و پڕۆژە و كارە خێرخوازییەكانی ئەم دەزگایە، دیمانەیەكی تایبەتمان لەگەڵ موسا ئەحمەد سەرۆكی دەزگای خێرخوازیی بارزانی ئەنجام دا.

 

* سەرەتا پێش ئەوەی باسی پڕۆژە نوێیەكەتان بۆ بەرزكردنەوەی ئاستی هوشیاریی كۆمەڵگە بەگشتی و گەنجان بەتایبەتی بكەین لەسەر مەترسییەكانی ماددە هۆشبەرەكان، بە پێویستی دەزانین جەخت لەسەر پوختەیەكی كاروانی بەخشین و كارە خێرخوازییەكانی دەزگای خێرخوازیی بارزانی بكەینەوە. ئایا ئاستی كارە خێرخوازییەكانتان بە كوێ گەیشتووە؟

- دەزگای خێرخوازیی بارزانی لە ئاكامی كاری خێرخوازی و كار و پڕۆژە بەردەوامەكانیەوە، بووەتە یەكێك لە ڕێكخراوە ناسراو و بەناوبانگەكان لەسەر ئاستی نێوخۆ و عێراق و جیهان، بووەتە دەزگایەكی ئومێدبەخش بۆ دڵی هەر مرۆڤێك لەهەر شوێنێكی دنیا كە تووشی كارەسات بێت، ئەمەش بۆ ئەوە دەگەڕێتەوە دەزگای خێرخوازیی بارزانی بە شێوەیەكی پێشكەوتووانە و بە ستانداردە نێودەوڵەتییەكان و بێ جیاوازی كار و چالاكییەكانی ئەنجام داوە. ئێمە وێڕای ئەوەی هیوادارین دیمەنی تراژیدیا لە ژیانی كەس و هیچ خێزانێكدا نەبینین، بەڵام كاتێك تراژیدیایەك ڕوو دەدات، لە ماوەیەكی كەمدا ئومێدێكی گەورە بۆ كوردستانییان و سەرجەم لێقەوماوان دروست دەكەین و وەك كارێكی مرۆیی بەبێ جیاوازیی (نەتەوە و ئایین و وڵات) دەستی هاوكاریمان پێ گەیاندوون و بە هانایانەوە چووین.

هەموو ئەو كارە خێرخوازی و چالاكییانەی كە ئەنجاممان داون، مەرج نییە لە میدیاكانەوە بڵاومان كردبێتەوە، ئەوەی بڵاویشمان كردووەتەوە، بۆ ئامادەكردنی ڕاپۆرتی ساڵانە و زانینی ئەو ئاژانس و كەسانەیە كە تەمویلی دەزگاكەمان دەكەن.

دەزگای خێرخوازیی بارزانی بۆ ئەنجامدانی پڕۆژە جۆراوجۆرەكانی پشتی بە ستانداردی كاری ڕێكخراوەیی جیهانی بەستووە، بەپێی ئەو سێكتەرانەش كارمان كردووە كە لە جیهاندا سەركەوتوو بوون، هەروەها پلان و بڕیارەكانمان بەپێی ئەو بوارانە بووە كە كۆمەڵگەی ئێمە پێویستێتی لە كاری خێرخوازیدا كاری لەسەر بكرێت.

سنووری كار و چالاكییە خێرخوازییەكانی دەزگای خێرخوازیی بارزانی، بێجگە لە هەرێمی كوردستان و عێراق، زۆر وڵاتی دیكەشی گرتووەتەوە، لە وڵاتانی وەك بەریتانیا، ئەمریكا، مۆڵەتی فەرمیمان هەیە، لە هەوڵیشداین لە وڵاتانی توركیا و ئەڵمانیا و لە كۆمەڵێ وڵاتی دیكەشدا دەزگای خێرخوازیی بارزانی مۆڵەتی كاركردنی هەبێت. ئەوەتا بۆ سێ ساڵ دەچێت لە شاری عەفرینی ڕۆژئاوای كوردستان بەردەوام كار دەكەین و ئۆفیسمان هەیە، لە شوێنەكانی دیكەشدا ئۆفیس دەكەینەوە، تاوەكو ڕۆژانە كاری مرۆیی ئەنجام بدەین.

* بە هۆی ئەم كارە ستاندارد و فراوانەوە، بڕوانامە نێودەوڵەتییەكانتان بەدەست هێناوە. ئایا تا چەند بوونی ئەم بڕوانامە نێودەوڵەتییانە بۆ هەڵكشانی كارە خێرخوازەكانتان گرنگ بووە؟

- لە ساڵی 2016 لە هەردوو دەوڵەتی ئەمریكا و كوەیت مۆڵەتی كاركردنمان پێ دراوە و لە هەمان ساڵدا ئەنجومەنی كارگێڕی و هەماهەنگیی نەتەوە یەكگرتووەكان دەزگای خێرخوازیی بارزانی وەكو ئەندامی ڕاوێژكاری لە ئەنجومەنی ئابووری و كۆمەڵایەتیی (ECOSOC) قبووڵ كردووە. هەروەها لە ساڵی 2020 لەلایەن كۆمیسیۆنی ڕێكخراوە خێرخوازییەكانی بەریتانیا مۆڵەتی كاركردنمان پێدرا و لە چەندین وڵاتی دیكەش كارە خێرخوازییەكانی دەزگای خێرخوازیی بارزانی فراوان بووە، وەكو توركیا، سووریا، ئوسترالیا، سڕبیا، بەنگلادش، لوبنان، یەمەن، سوودان، مەغریب و.. تادوایی. هاوكات وەرگرتنی بڕوانامەی بەڕێوەبردنی سیستەمی كارگێڕیی جۆری (ISO)، بەڵگەیەكی دیكەیە بەوەی كارەكانمان چەند بە ڕێكوپێكی بەڕێوەدەچێت، ئەم بڕوانامە و ناوبانگییانەیە وای كردووە، پڕۆژەكانی دەزگاكە لە ڕێگەی (سپۆنسەر و دۆنەرەكان) پاڵپشتی بكرێن و خۆبەخشەكان ڕۆڵیان لەو هەموو چالاكییەكان هەبێت.

* باسی ئەوەت كرد كە دەزگای خێرخوازیی بارزانی لە چەندین سێكتەری جۆراوجۆر كار و پڕۆژەی ئەنجام داوە. دەكرێت بزانین گرنگترینی ئەو سێكتەرانە چین؟

- كاری خێرخوازیی دەزگاكە تەنیا لە بواری كارەساتە سرووشتییەكان و هاوكاریی كەمپەكانی ئاوارە و پەنابەران نییە. ئێمە جگە لەوەی كۆمەڵێ سەنتەر و كۆمەڵگەی تایبەتمان لە ناوچە دوورەدەستەكان دروست كردووە، ئاوڕێكی جددیمان لە خاوەن پێداویستیی تایبەت و بوارەكانی وەكو ئاسایشی خۆراك، ئاو و ئاوەڕۆ و پاكوخاوێنی، پەناگە، پەروەردە، تەندروستی و بەڕێوەبردنی خێوەتگەی پەرەپێدانی مرۆیی و كردنەوەی بەشی فریاكەوتنی نەخۆشخانە و گەیاندنی هاوكاریی تەندروستی و ئەنجامدانی نەشتەرگەریی و كردنەوەی سەنتەری ئۆتیزم لە هەولێر و كۆیە و دابینكردنی ئاوی خواردنەوە و چاندنی نەمام و یارمەتیی نەختینەیی و هاوكاریی خێزانی كەمداهات و پڕۆژەی ئازیزان و بێهاوژینان و فریاكەوتنی خێرا و پڕۆژەی دابەشكردنی 420 شوقە بەسەر خانەوادەی سەربڵندی شەهیدان و پڕۆژەی چاودێریی ئازیزان و .. تادوایی بووە. هەروەها دەزگای خێرخوازیی بارزانی (كۆمەڵگەی دایك)ی لە سۆران كردووەتەوە، كە پێش ئەو كۆمەڵگەیە بكرێتەوە، (نابیست، نابینا و ئەوانەی خاوەن پێداویستیی تایبەتن و بەساڵاچووان و ئۆتیزم..) شوێنێكی وایان نەبوو كە ڕووی تێبكەن. ئێمە ئێستا سەنتەرێكی زۆر پێشكەوتوومان بە هەموو ئەو بوارانەی كە ئاماژەم پێدا لە سۆران كردووەتەوە و دیسان لە زاخۆ لە ماوەیەكی نزیكدا سەنتەری ئۆتیزم دەكەینەوە. لە دهۆك پلانمان هەیە لە هەولێریش دیسان ئەو سەنتەرەی كە هەیە، ئومێدێكی زۆر باشی بۆ ئەو خانەوادانە دروست كردووە كە بەداخەوە كە منداڵەكانیان هەڵگری ئۆتیزمن. تا ئێستا لەو سەنتەرەی كە لە هەولێر هەیە، زیاتر لە 63 منداڵ گەڕاونەتەوە ناو خوێندنی ئاسایی. پێشتر بە هۆی بارگرانیی ئاوارە و پەناهەندە كەمتر لەو سێكتەرانە كارمان كردووە، هەر لەم سێكتەرانەدا لە پڕۆژەی چاودێریی ئازیزان كە بە سوپاسەوە لەگەڵ ڕێكخراوی مانگی سووری ئیماراتی لە ساڵی 2012ـەوە دەستمان بەم پڕۆژەیە كردووە، تا ئێستا نزیكەی 16 هەزار منداڵی ئازیز (بێباوك) لە هەموو كوردستان و بە پارێزگاكانی كەركووك و مووسڵ و شنگال و ئەنباریشەوە سوودمەند بوون و زیاتر لە 81 ملیۆن دۆلار كاش دراوەتە خانەوادەكانیان و لە چەندین بواری دیكەی تەندروستی و پەروەردە و تەرفیهی بەشداریمان پێكردوون. لە خوێندن گرنگیی زۆرمان بەم سێكتەرە داوە، لە گرنگیدان بە پەروەردەی كوردی لە ناوچە دابڕێنراوەكان و دابینكردنی پێداویستیی سەبەتەی خۆراك و نۆژەنكردنەوەی قوتابخانەكان، تاوەكو دانانی سیستەمی وزەی خۆر بۆ چەندین قوتابخانە، لە كارێكی گرنگ و گەورەدا بۆ سێكتەری پەروەردە پڕۆژەی نۆژەنكردنەوەی 203 قوتابخانە لە هەولێر و سلێمانی و دهۆك و كەركووك و هەڵەبجە و نەینەوا جێبەجێ كران. دوا پڕۆژەشمان لەبواری دەستپێكردنی هەڵمەتی نیشتمانیی ڕووبەرووبوونەوەی ماددە هۆشبەرەكانە.

* هەر سەبارەت بە كەمپەكان ئایا حكومەتی عێراق و وەزارەتی كۆچ و كۆچبەران، تا چەند بە ئەركی سەرشانی خۆیان هەڵساون و هاوكاریی و كۆمەكی ئاوارەكانی خۆیان دەكەن؟

- هێشتا 27 كەمپ لە هەرێمی كوردستاندا بۆ ئاوارە و پەنابەران ماوە و زیاتر لە 280 هەزار پەنابەری كوردانی ڕۆژئاواشمان هەیە، لە هەمان كاتدا كوردانی ئێزدی كە بەداخەوە بەهۆی ئەو بارودۆخەی كە هەیە و جێبەجێنەكردنی ئەو ڕێككەوتنەی كە حكومەتی عێراق لەگەڵ حكومەتی هەرێمی كوردستان هەیبوو، عێراق نەچووەتە ژێرباری ئەو بەندانەی كە ئەگەر جێبەجێ بكرایە، هیچ پەنابەر و ئاوارەیەك لێرە نەدەمایەوە، كە هێشتا نزیكەی 300 هەزار ئاوارەی كوردانی ئێزدی لە هەرێمی كوردستاندا هەن. چونكە لە ناوچەكانیان خزمەتگوزاریی و پێداویستییە سەرەكییەكانی وەكو ئاو و كارەبا و خوێندن و تەندروستی لە ئاستی پێویست نییە. بەداخەوە سەرباری ئەوەی كە تووشی كارەساتێكی زۆر گەورە بوون، بەڵام حكومەتی عێراق لەو ئاستەدا نەبووە كە بتوانێ بەشێكی كەم لە برینەكانی ئەو خەڵكە ساڕێژ بكات، كە بە هۆی ئەو كارەساتە تووشی بوون. ئێستاش لەناو كەمپەكاندان و بارودۆخی ژیانیشیان بەڕاستی لە ئاستێكی زۆر خراپدایە، هاوكاریی نێودەوڵەتی زۆر كەمی كردووە. بە هۆی ئەوەی كە بە قسەی بەرپرسان (لە سەرۆكی ئەنجومەنی وەزیرانی حكومەتی بەغداوە بیگرە، تا دەگاتە وەزیرە پەیوەندیدارەكان لە دارایی و كۆچ و كۆچبەران) ڕوویەك پیشان دەدەن، كە كۆمەڵگەی ئەوان هیچ كێشەیەكی تێدا نییە، لە كاتێكیشدا خۆشیان نایەن ئەو ئەركەی كە هەیانە بەرانبەر بە هاووڵاتییانی خۆیان خزمەتگوزارییان پێشكەش بكەن، بەمەش هەموو ئەو خەڵكە لەسەر ئەو ئیمكانیەتەی لە بەردەستی حكومەتی هەرێمی كوردستان هەیە، خزمەتگوزارییان پێشكەش دەكرێت. لە كاتێكدا ئێمە هەموو دەزانین كە لەو سێكتەرانەی كە لەناو بوودجەی حكومەتی عێراقیدا هەیە، هەموو تاكێك وەكو هاووڵاتیی عێراقی پشكی خۆی هەیە، لە پەروەردە، لە خۆراك و تەندروستیدا، بە واتا ئێمە دەزانین لە بودجەی وەزارەتی كۆچ و كۆچبەراندا هەموو ئەو خەڵكانە حیسابیان بۆ كراوە، بەڵام كە تەماشا دەكەین، لە 12 مانگ ئەو پاكێجە خۆراكییەی كە بۆ ئەوان دانرابوو، ساڵی وا بووە دوو مانگ و ساڵی وا بووە پێنج مانگ، تەنیا پێش وادەی هەڵبژاردنەكان هەندێك جار و بە كەمی حكومەتی عێراقی بە هانای ئەوانەوە دێت، لەكاتێكدا كێشەی ئەوان بە زۆرەملێ گەڕانەوە و دوو ملیۆنی هاوكاریی چارەسەر نابێت. ئەمە بە جۆرێك لە جۆرەكان فێڵكردنە لە خەڵك. ئومێدمان هەیە هاوپەیمانەكان و لایەنە پەیوەندیدارەكان و ڕێكخراوە نێودەوڵەتییەكان و كونسووڵخانەكان بێنە سەر هێڵ لەسەر ئەم بابەتەی پشتگوێخستنی ئەو ژمارە زۆرەی ئاوارە لەناو كەمپەكان كە بەڕاستی تاوانێكی گەورەیە، گوناحێكی گەورەشە كە حكومەتی ئیتحادی بەم شێوەیە مامەڵە لەگەڵ هاووڵاتیانی خۆی دەكات.

* ماوەیەكە هەڵمەتی نیشتمانی بۆ ڕووبەڕووبوونەوەی ماددە هۆشبەرەكانتان دەستپێكردووە. ئایا مەبەستتان لە ئەنجامدانی ئەم پڕۆژەیە چییە و دەتانەوێت چی بە گەنجان و لاوان بڵێن؟ ئەو لایەنە پەیوەندارانە كێن كە بەشداریی پڕۆژەكەتان دەكەن؟

- هەڵمەتی نیشتمانیی ڕووبەڕووبوونەوەی ماددە هۆشبەرەكان، پڕۆژەیەكی نیشتمانییە و هەڵمەتەكەش دوای گوتارێكی سەرۆك بارزانی دەستی پێكرد، كە تیشك دەخاتە سەر ئەوەی «شەڕی جاران زۆر ئاسانتر بوو لە شەڕی ئێستا، جاران شەڕی فرۆكە و تانك و تۆپ بوو، هەتا كیمیابارن و ئەنفال، بەڵام بڕوا بكەن، شەڕی ئێستا زۆر مەترسیدارترە، شەڕی بڵاوكردنەوەی ماددەی هۆشبەرە لەناو كۆمەڵگەی ئێمە، شەڕی نەهێشتنی بیڕ و باوەڕە، تاوەكو تاكی كورد بڕوای بەخۆی نەبێت. ئەم شەڕە زۆر سەختتر و مەترسیدارترە). بە نیسبەت ئێمەش وەكو دەزگای خێرخوازی بارزانی، هەمیشە فەرمایشتەكانی سەرۆك بارزانی بۆ ئێمە وەكو ڕێنمایی وایە و بەردەوام دەیخەینە چوارچێوەی كاركردنی خۆمانەوە و بە شێوازێكی زانستییەوە كاری لەسەر دەكەین.

لەم ڕوانگەیەوە دەزگاكەمان لە چوارچێوەی پڕۆژەیەكی نیشتمانی، هەڵسا بە ئەنجامدانی هەڵمەتێكی نیشتمانی بۆ بەرزكردنەوەی ئاستی هوشیاریی كۆمەڵگە ئەنجام دا، بەتایبەتی لای گەنجان و لاوان دەربارەی زیان و مەترسییەكانی ماددە هۆشبەرەكان. دەزگای خێرخوازیی بارزانی هەر پرسێك مەترسی بۆ سەر كۆمەڵگە و ئایینی پیرۆزی ئیسلام و كەلتووری پێكەوەژیانی كوردستان و ژیانی تاكی كۆمەڵگە هەبێت، بە جددی ڕووبەڕووی دەبێتەوە و كاری لەسەر دەكات، بۆ ئەم مەبەستەش چەندین لایەن و سێكتەری جۆراوجۆر بەشدار و هاوبەشن لەگەڵماندا، لە میدیا و سۆشیالمیدیا و ڕۆژنامەنووسان و مامۆستایانی ئایینی و مامۆستایانی قوتابخانەكان و پەیمانگە و زانكۆكان و هونەرمەندان و ڕێكخراوەكانی كۆمەڵگەی مەدەنی و وەزارەتە پەیوەندیدارەكانی وەكو پەروەردە و خوێندنی باڵا و تەندروستی و كاروكاروباری كۆمەڵایەتی و ناوخۆ و ئەوقاف و ڕۆشنبیری و كەناڵە میدیاییەكان و دژە تیرۆر و.. تادوایی، تاوەكو ئاژانسەكانی ڕێكخراوی نەتەوە یەكگرتووەكان.

سەرەتای هەڵمەتەكەمان بە دانانی بەردی بناغەی سەنتەری شیاندنەوەی تووشبوانی ماددە هۆشبەرەكان لە هەولێر بە ئامادەبوونی سەرۆكی حكومەتی هەرێمی كوردستان دەستمان پێكرد. بەو ئومێدەی بتوانین لە شارەكانی دیكەی كوردستانیش بەردی بناغەی دروستكردنی ئەم جۆرە سەنتەرانە دابنێین. ئەوە بوو لەپاڵ دانانی بەردی بناغەی ئەم سەنتەرە كە بە هاوبەشی لەگەڵ ئاژانسی (ئێڵ دی ئێس)ی ئەمریكی دروست دەكرێت، لە پسپۆڕییەكانیشدا ئێمە سوود لە ئەزموونی ئەوان و ڕێكخراوی دیكەش وەردەگرین، تاوەكو بتوانین كەسانی قوربانی و تووشبووی ئەم ماددە ژەهراوییە شیاندنەوەی تەواویان بۆ بكرێت و بگەڕێنەوە ناو كۆمەڵگە و خێزانەكانیان.

سەبارەت بەم هەڵمەتە نیشتمانییەی ڕووبەرووبوونەوەی ماددە هۆشبەرەكان، ئێمە دامانناوە لە چوارچێوەی ئەو هەڵمەتە نیشتمانییەدا، هیچ ناوەندێكی خوێندن نەمێنێت كە ئامۆژگاری و ڕێنمایی تەندروستی و زانستی پێنەگات، هەڵبەتە ئەمە بە كردنەوەی خول و شارەزاكردنی خەڵكی تایبەتە، وەرگرتنی پسپۆڕییە، بە شێوازێكی پسپۆڕییانە ئەم وانانە بدرێنە قوتابیان لە ناوەندەكانی خوێندن لە پەروەردە و وەزارەتی خوێندنی باڵا، لە هەمان كاتدا لە ڕێگای مامۆستایانی ئایینییەوە و بەتایبەتیش ئەو فیدراسیۆنەی كە هەیە تایبەت بە وتاری هەینی، پلاتفۆرمێك كە هەیە، ئێمە لە ڕێگای ئەوانەوە ئەو پەیامە بگەیەنین، هەروەها لە ڕێگای میدیاوە كە ئێستا بەربڵاوترین ڕێگایە بۆ گەیشتن بە هەركەسێك، یان چوونە ناو ماڵی هەر خانەوادەیەك. بە سوپاسەوە كە ئێمە مانگێكە ئەو پڕۆژەیەمان دەست پێكردووە، لە ماوەی ئەو مانگەدا وێڕای ئەو بارودۆخەی كە لە هەرێمی كوردستان و لە ناوچەكەدا هەیە، بەڵام تەركیزی میدیا و میدیایی لۆكاڵ و تۆڕە كۆمەڵایەتییەكان لەسەر ئەم بابەتە هەبووە، بۆیە هەماهەنگیی باش كراوە و چەندین پۆستەر و بروشور و پەیامی كورت كورتی نووسراو و ڤیدیۆیی پێشكەش كراون.

ڕووبەڕووبوونەوەی ماددە هۆشبەرەكان ئەركێكی زۆر گەورە و زۆر پیرۆزیشە، كاتێكیش سەرۆك بارزانی لەگەڵمان لەسەر هێڵ بێت، ئەوا چەندین دەزگا و كەناڵ و ڕێكخراوی دیكە هاتوونەتە سەر هێڵ، یەكێتیی ئافرەتان و یەكێتیی قوتابیان و لاوان و زانكۆی سلێمانی و مامۆستایانی ئایینی پیرۆزی ئیسلام و چەندین ڕێكخراو و دەزگای دیكە لەگەڵمان لەسەر هێڵن. تەمەنای ئەوە دەكەین، بە ناوەڕۆك ئەمە بكەینە هەڵمەتێكی نیشتمانی كە هەموو تاكی كوردستان خۆی بە بەشێك لەو هەڵمەتە بزانێت. بە تەئكید پلانی ئێمە ئەوەیە كە سات بە سات ئەم هەڵمەتە گەرمتر ببێت، نەك ئەوەی كە بە گەرمیی دەستی پێبكەین و هێدی هێدی سارد ببێتەوە. كۆنفڕانسەكەمان وەكو سەرەتایەك دەست پێكردووە و پلانی ئێمە بۆ ئەم هەڵمەتە ئەوەیە ڕۆژ بە ڕۆژ گەرمتر ببێت. ماددەی هۆشبەر مەترسییەكی زۆر گەورەیە بۆ سەر تاك و خێزان. ئەمە قسەی خەڵكی پسپۆڕە لەو بوارانەدا كە ژمارەی تووشبووان لە ساڵێكدا چۆن زیاد دەكات و چۆن دەمرن و دەبنە قوربانی، ئەمە مەترسییەكی زۆر گەورەیە، بۆیە سەرۆك بارزانی ئەوەندە بە بایەخەوە لەسەر ئەم بابەتە ڕاوەستا، ئێمەش تەمەنای ئەوە دەكەین، كە لە میانی ئەم هەڵمەتەدا، لە میانی ئەو كارانەی كە تایبەت دەكرێت بەو هەڵمەتە، بتوانین لە ئاستی ئەو بەرپرسیارێتییەدا بین كە جەنابی سەرۆك بارزانی بە ئێمە و بە كۆمەڵگەی ئێمەی ڕاسپاردووە.