ڤیتامین B6 كە بە پایریدۆكسین Pyridoxine ناسراوە، ڕۆڵی گرنگی لە گەلێك فرمانی لەشدا هەیە، بۆنموونە بەشدارە لە نزیكەی 100 كارلێكی ئەنزیمی تایبەت بە میتابۆلیزمی پرۆتین و كاربۆهیدرات و چەوری، هەروەها ڕۆڵی هەیە بۆ پاراستنی تەندروستیی سیستمی دەماری و هاندانی سیستمی بەرگریی لەش و دروستبوونی خڕۆكە سوورەكانی خوێن. نیشانەكانی كەمیی ڤیتامین B6: پەیدابوونی پەڵەی سوور لەسەر پێستی دەموچاو لەگەڵ تفركردندا، هەوكردنی ناوپۆشی دەم و قڵیشانی گۆشەكانی دەم Cheilosis، سووربوونەوە و هەوكردنی زمان Glossitis، هەستكردن بە تەزینی دەست و پێیەكان لە ئەنجامی هەوكردنی دەمارەكانی دەوروبەر، كەمخوێنی، كەمبوونەوەی ئاستی وزەی لەش و هەستكردن بە بێهێزیی گشتی، پەستی یان ناڕەحەتیی دەروونی، دابەزینی مەزاج و خەمۆكی، سەرسووڕان، هێڵنج و ڕشانەوە، دڵەكزێ، هەروەها زیاد هەستیاربوون بە ڕووناكی.