هونەرمەند حەسەن شەریف بۆ گوڵان:حەز دەكەم هەندێك گۆرانی فۆلكلۆری بەشێوازێكی نوێ پێشكەش بكەم و بە پاكی رایانبگرم

حەسەن شەریف دەربارەی سەرکەوتنی لە تێکستە کلاسیکییەکان دەڵێت:

شیعرە كلاسیكییە كوردییەكان بە هەردوو شێوەزارەکە تا رادەیەك لە یەكتر نزیكن، چونكە توانیویانە تەنانەت تێكەڵێك لە شیعری عەرەبی و فارسی و توركیش بەكاربهێنن لە شیعرەكانیاندا، من چۆن شیعری كرمانجیم كردووە بە گۆرانی بەو شێوەیەش حەز دەكەم شیعرەكانی شێوەزاری سۆرانیش بكەم بە گۆرانی و لەگەڵ چەند برادەرێك وەك ئەمین بۆتانی هەوڵمداوە سوود لە شیعری سۆرانی وەربگرم، شیعرە كلاسیكییەكانی حاجی قادری كۆیی و دڵدار و شاعیرانی پێش ئەوانیشم زۆر خوێندۆتەوە و شارەزاییم لێیان هەیە، بەڵام فۆنەتیكی ئەم شیعرانە پێویستیی بە هاریكاری هەیە، بەڵام لە بەرنامەمدایە شیعری هەورامانی و زازاكی و ئەوانیش تریش بكەم بە گۆرانی بە هاوكاری چەند برادەرێك.

هەروەها باس لە گۆرانی وتن بە شێوەزارە جیاجیاکان دەکات و دەڵێت:

ئەم دیاردەیە زۆر كۆنە و پێشتریش چەندین هونەرمەند ئەم كارەیان كردووە هەر لە محەمەد شیخۆ و تەحسین تەهاو تایەر تۆفیق و پێش ئەوانیش محەمەد عارف ئەم كارەیان كردووە ئەویش لە عەشقیان بۆ لێك نزیك كردنەوەی دیالێكتە كوردییەكان ئەگەر بەشێوەیەكی سادەش بێت جۆرێك تاموچێژی تایبەتی هەیە، بەڵام نەك بەشێوەیەكی نەنگ بێت.

دواتر باسی لە هەڵسەنگاندنی کارەکانی خۆی کرد و وتی:

بەراستی ئەم جۆرە كارانە لە دڵ و ویژدانی میللەتاندا دەمێننەوە و رادەی حەز كردنیان بۆ گۆرانییەكە، ئەم بڕیارە پێویستە میللەت بیدات، لە شێوەی دەنگ و چۆنییەتی هەڵبژاردنی تێكستەكان، پێموایە ستایلی من جیاواز و تایبەتە لە دەڤەری بادینان، توانیومە هەندێك كار بكەم لە خەباتی هونەری شۆڕشگێڕی، هەروەها لە بواری فۆلكلۆر چەندین بەرهەمی كۆنم نوێ كردۆتەوە و پێشكەشی جەماوەرم كردووە، بە جۆرێكی وا هەست دەكەم خۆم دروستم كردووە هەرچەندە خۆیان فۆلكلۆرین ئەمەش لە ئەنجامدانی هونەرێكی بێگەردەوە خۆی دەبینێتەوە، لەلایەكی دیكەوە كاتێك هونەرمەند دەبینێت گەنجان گۆرانییەكانی دەڵێنەوە هەست دەكات كە جۆرە كاریگەرییەكی هەبووە لەسەر جەماوەر، سەرەڕای ئەوەش ئەو مافە بەخۆم نادەم و میللەت دەبێ بڕیاری لەو جۆرە بدات.

لە وەڵامی ئەو پرسیارەی ئایا چ کاتێک باشە بۆ ئەوەی هونەرمەند واز لە کاری هونەری بهێنێت، حەسەن شەریفی هونەرمەند دەڵێت:

-ئەو كەسەی كە بەهرەمەند بێت لە هونەر زۆر زەحمەتە ئەو بڕیارە بدات، چونكە تەنانەت ئەگەر لە ماڵی خۆیشی كاری هونەری بكات هەر دەبێـت، بەڵام هونەرێكی بێگەرد نەك لاسایی و تەنیا بۆ دەركەوتن بێت، پێموایە كە هونەرمەند كارێكی دەگمەن و ناوازەی پێشكەش كرد كە هەموو تاكەكانی كۆمەڵ بە دڵیان بوو و لێی رازی بوون و بزانێت ئایا تا چەند دەتوانێت بەردەوام بێت، چونكە هیچ كەسێك تا هەتایە لە یەك ئاستدا نابێت، ئەو كات هونەرمەند دەتوانێت بەشێوازێكی دیكە كاری هونەری بكات، ئێستا هەندێك هونەرمەند هەن پێموایە ئەگەر بە شێوازێكی دیكە كاری هونەرییان بكردایە و دەستی هونەرمەندە گەنجەكانیان بگرتایە بە ئاواز و هۆنراوە باشتر بوو بۆیان، من خۆم حەز دەكەم هەندێك گۆرانی فۆلكلۆری بەشێوازێكی نوێ پێشكەش و نوێیان بكەمەوە یان كارێكی دیكەی هونەری ئەنجام بدەم بەجۆرێك ئەو هونەر پاك و بێگەردەی پێشكەشم كردووە هەر بە پاكی رایبگرم و وەك سەروەتێك بۆ میللەت بەجێ بهێڵێت و دەست لە كارەكانی دیكە بەردات بۆ ئەوەی هەر بە پاكی بمێنێتەوە.

سەبارەت بەو هونەرمەندانەی چەندین ساڵ کاریان کردووە و ئەو هونەرەی پێشکەشیان کردووە دەڵێ:

من وادەبینم کە هونەرمەندە کۆنەکان و هونەری کوردی کۆن گەنجینەیەکی گەورەن، ئەرشیڤێکی زەبەلاح و دەوڵەمەندیان بۆ ئێمە بەجێهێشتووە کە پێویستە هونەرمەندانی ئەمڕۆ کاری لەسەر بکەن، و نوێکردنەوە و زیندووکردنەوەی گۆرانییە فۆلکلۆرییەکان کارێکە دەبێت ئەنجام بدرێت، ئێمە پێویستیمان بەوەیە هونەرەکەمان بە نەوەی لاوەکانمان و نەوەی نوێمان بناسێنین، و ئەمەش ئەرکێکە دەبێت هەموو هونەرمەندێک هەڵیبگرێت».