11ی ئادارێ سهركهفتنا ئیرادا كوردان
دەولەت دومان
رێكهفتنا 11ی ئادارێ یاكو سالا 1970ێ دناڤبهرا حوكمهتا وی سهردهمیا عێراقێ و سهركردایهتیا شۆڕشا كوردی هاتیه ئیمزاكرن ئێكه ژوان دهستكهفتێن ههری مهزن یێن گهلێ كوردستان د چهرخێ بۆری دا، چونكه بۆ جارا ئێكێ بوو دهولهتا عێراقێ بشێوهیهكێ فهرمی دانپێدانێ ب مافێن كوردان بكهت، پشتی چهندین سالێن شهڕی دناڤبهرا شۆرشا ئهیلوولا مهزن ب رێبهرایهتیا بارزانیێ نهمر و عێراقێ، و پشتی وهرگرتنا دهستههلاتێ ژلایێ بهعسیانڤه وان زانی نهشێن ب شهڕی شۆڕشا كوردان بێدهنگ بكهن، لهوڕا نهچاربوون رێیا دانوستانان ههلبژێرن و دهست ب دانوستانان كر دگهل شۆڕشێ، رژێمێن ئێك دویف یێن عێراقێ ههر دهمێ زانبیا نهشێن بشهڕی شۆڕشا كوردی بێدهنگ بكهن ئهڤه دهست ب دانوستانان دكر دگهل شۆڕشێ، بهلێ مخابن ههر دهمێ بهێز كهفتبان سۆزێن خۆ دشكاندن و دیسان هێرشی سهر كوردان دكر.
پشتی دو سالێن دانوستانێن بهردهوام سهركردایهتیا شۆڕشا ئهیلوولێ و دهستههلاتدارێن عێراقێ گههشتنێ رێكهفتنێ شهڕ بهێته راگرتن و لسهر چهندین خالان رێكهفتنا 11ی ئادارێ هاته ئیمزاكرن و رۆژا 11ی ئادارا سالا 1970 بشێوهیهكێ فهرمیی ئهو رێكهفتن دچوارچوڤێ بهیانهكێ دا ژلایێ ئهحمهد حهسهن بهكر سهرۆكێ وی دهمی یێ عێراقێ هاته راگههاندن، عێراقێ ددهمێ چوارسالاندا تهناهی بخۆڤه دیت و شهڕۆ ئالۆزی دناڤبهرا سهركردایهتیا كورد و دهولهتا عێراقێ هاتنه راگرتن، رێكهفتنا 11ی ئادارێ بهلگهیهك دیرۆكیه لسهر مافێن كوردان، چونكه بۆ جارا ئێكێ بوو حوكمهتهك ل عێراقێ دانپێدانێ ب مافێن كوردان بكهت، بێگومان بهریا رێكهفتنا بهێته ئیمزاكرن حوكمهتا عێراقێ چهند بڕیارهك دهركرن بۆ دهڤهرێن كوردی ژوانژی بڕیارا پارێزگههبوونا دهۆكێ.
دهستكهفتێن رێكهفتنا 11ی ئادارێ زۆرن، ژوانژی دانا مافێ ئۆتۆنۆمی بۆ كوردان وی سهردهمی دهستكهفتهكێ زێڕین بوو، ههروهسا كورد پشكداری حوكمهتا عێراقێ بكهن و زمانێ كوردی بوو زمانێ فهرمی ل عێراقێ و چالاكیێن كهلتووری و رۆشنبیری و جهماوهری بشێوهیهكێ بهر بهلاف هاتنه دهستپێكرن، مخابن پشتی چوار سالێن ئارامیێ مینا رژێمێن بهرێ رژێما وی سهردهمیا عێراقێ ب هاریكاریا چهندین ولاتێن دهڤهرێ گهلهكۆمهكی ل كوردان كرو رێكهفتنا خیانهتكاریا جهزائیر هاته ئیمزاكرن ئهوژی بۆ نههێلانا شۆڕشا كوردی، راسته شیان بۆ دهمهكێ كێم كوردان بێدهنگ بكهن، بهلێ هند پێنهچوو چریسكا شۆڕشا گولانێ جارهكادی بۆ دوژمنێن كوردان سهلماند چهندین رێكهفتن و دهولهت پێكڤه دژایهتیا كوردان بكهن دێ شۆڕش ههریا بهردهوامبیت ههتا كورد دگههنه ئارمانجێ.
