لە شاری كەركووك، میلیشیاكانی حەشدی شەعبی دەیانەوێت دەست بەسەر (قەیسەری) دێرینترین بازاڕی شارەكەدا بگرن.

ئەمڕۆ دووشەممە 20/7/2020، هەژار تەحسین، یەكێك لە خاوەن دووكانەكانی قەیسەریی شاری كەركووك، ڕایگەیاند: "لە كۆتایی ساڵی 2018 دووكانەكانی قەیسەری كەركووك گڕیان تێبەر بوو و سووتان و خەڵكێكی زۆر لە دووكاندارەكان زیانی زۆریان كرد، دوای نزیكەی ساڵێك نۆژەن كرایەوە و پاشان لە ڕێورەسمێكدا دووكانەكانیان رادەست كردینەوە و ئینجا ئەوە نزیكەی پێنج مانگە بەهۆی كۆرۆناوە بازاڕمان نەبووە، ئێستا فەرمانگەی ئاسەواری كەركووك ئاماژە بۆ ئەوە دەكەن كە ئەو بازاڕە موڵكی ئەوانە و دەیانەوێت بیخەنە زیادكردنێكی ئاشكراوە لە كاتێكدا دەیان ساڵە ئەم دووكانانە هی ئەو كەسانەیە كە تێیدان".

گوتیشی: ئەو كردەویە دەستی حەشدی شەعبی و بەتایبەتی عەسائیبی ئەهلی حەقی تێدایە و دەیانەوێت دەست بەسەر ئەو دووكانانەدا بگرن و بیكڕن و دواتر بە پارەیەكی زۆر بیدەنە كرێ، چونكە دەزانن زۆرینەی خاوەن دووكانەكان كوردن، بۆیە دەیانەوێت كورد لەو بازاڕە نەمێنێت، بۆیە دوێنێ یەكشەممە گردبوونەوەیەكی ناڕەزاییمان ئەنجام دا لەسەر ئەو هەوڵە و بەردەوام دەبین لەسەر ناڕەزایەتییەكانمان".

بازاڕی قەیسەریی كەركووك دێرینترین بازاڕێ‌ شاری كەركووكە كە نزیكە لە قەڵای شارەكەوە لە ساڵی 1855 بونیات نراوە و لە ساڵی 1978 نۆژەن كراوەتەوە و لە 365 دووكان پێكدێت و حەوت دەرگای چوونەژوورەوەشی هەیە و زۆرینەی دووكاندارەكانیشی كوردن.











باسنیوز