ته‌رمی گه‌نجێكی ته‌مه‌ن 17 ساڵان، له‌ گه‌ڕه‌كی كارێزی رۆژهه‌ڵاتی قه‌زای زاخۆ دۆزرایه‌وه‌، كه‌ شوێنه‌واری گوللـه‌ به‌ جه‌سته‌یه‌وه‌ دیاره‌.

زاخۆ : گه‌نجه‌كه‌ بە چەند گوللـەیەك کوژراوە و له‌ گەڕەکی کارێزی رۆژھەڵاتی شارەکە فڕێدراوه‌، بەڵام ھێشتا ناسنامەی دیاری نەکراوە کە کێیە و خەلکی کوێیە.

ئێستا ته‌رمی گه‌نجه‌كه‌ رەوانەی پزیشکی دادی زاخۆ کراوە و سه‌رچاوه‌یه‌كیش له‌ ته‌ندرووستی زاخۆ راگه‌یاند، شوێنی چوار گوللـە به‌ جه‌سته‌ی گەنجەكه‌وه‌ دیاره‌، كه‌ دووانیان لەسەری دراون و یەکێك لەدەست و یەکێكیش لە قاچی.

پۆلیسی زاخۆ رووداوەکەی پشتڕاستکردەوە و راشیگه‌یاند، گه‌نجه‌كه‌ له‌و شوێنه‌ نه‌كوژراوه‌، به‌ڵكو ته‌نها ته‌رمه‌كه‌ی له‌وێ فڕێدراوه‌، ئێستاش لێکۆڵینەوەیان لەو بارەیەوە دەستپێكردووه‌.