ئەمڕۆ سیشەممە ١٧ی٩ی٢٠١٩ لە بینای پارێزگای هەولێر، بە ئامادەبوونی ڕێبەر ئەحمەد، وەزیری ناوخۆی حکوومەتی هەرێمی کوردستان، فرسەت سۆفی وەک پارێزگاری نوێی هەولێر بە فەرمی دەستی بە کارەکانی کرد.



لە ڕێوڕەسمی ئاڵۆگۆڕکردنی پۆستی پارێزگاری هەولێردا کە هاوکات نەوزاد هادی پارێزگاری پێشووی و فرسەت سۆفی پارێزگاری نوێ ئامادەی بوون، ڕێبەر ئەحمەد، لە وتارێکدا وێڕای سپاس و پێزانین لە کار و چالاکییەکانی نەوزاد هادی لە پۆستی پارێزگاری هەولێر، هاوکات پیرۆزبایی لە فرسەت سۆفی کرد.



وەزیری ناوخۆی حکوومەتی هەرێمی کوردستان گوتیشی: "هەمووشمان وەک تیمێک پشت و پەنای یەکتر دەبین لە هەر کار و ئەرکێک کە پێمان بپسێردرێت و هاوکات پیرۆزبایی لە کاک دکتۆر فرسەت سۆفی دەکەم کە ئەویش وەک کادریێکی ئەکادیمی و شارەزای یاسا و کاری جەماوەی لەناو خەڵک پێ گەیشتووە و ئێستاش ئەرکێکی نوێی پێ سپێردراوە کە وەکوو هەموو ئەرکەکانی دیکەی چاوەڕوانی دەکەین سەرکەوتوو بێت".



هاوکات نەوزاد هادی پارێزگاری پێشووی هەولێر گوتی: "بێگومان پارێزگاری هەولێر کە پایتەختی هەرێمی کوردستانە، بەرپرسیارێتییەکی گەورەیە و شەرەفێکی گەورەشە کە مرۆڤ بتوانێ خزمەتی ئەو خەڵکە خۆشەویستە و ئەم ئەزموونە دەوڵەمەندەی حوکمڕانیی هەرێمی کوردستان بکات".



گوتیشی: "بێگومان بەشێکی زۆر لە کار و بەنامەکانی کابینەی نوێ بە سەرۆکایەتیی بەڕێز مەسرور بارزانی سەرۆکی حکوومەتی هەرێمی کوردستان، لەڕێگەی پارێزگاری هەولێرەوە کە وەکوو باڵاترین دەسەڵاتی جێبەجێکار کە سەرپەرشتیی فەرمانگەکانی حکوومەت و جێبەجێکردنی بڕیارەکان و سەرجەم وەزارەتە پەیوەندیدارەکان دەکات و ئەمەش بەرپرسیارێتییەکی گەورە و ڕەنگدانەوەی تەواوی سەرکەوتنی کارەکانی حکوومەتە".



هاوکات فرسەت سۆفی پارێزگاری هەولێر لە وتەیەکدا گوتی: "پێش هەموو شتێک دەبێ ستایشی ڕۆڵی کاک نەوزاد هادی بکەین، کەلە ماوەی زیاتر لە ١٥ ساڵ لەم پارێزگایە ماندوونەناسانە و لێبڕاوانە شەونخوونی کرد لەپێناوی ئەوەی کە هەولێر پێشکەوتووتر و جوانتر و ئاوەدانتر بێت و پیرۆزبایی ئەرکی نوێی لە سەرۆکایەتیی ەهرێم لێ دەکەین، بەو هیوایەی هەموو کات سەرکەوتوو بێت".



ڕاشی گەیاند: "لێرەوە سپاسی ئەو ستافە دەکەین کە لەگەڵ کاک نەوزاد بوون و ئەوانەش کە ماون و ئەوانەش کە پێشتر کاریان کردووە، لە جێگرەوە بگرە هەتا قایمقام و بەڕێوەبەری قەزا و ناحیەکان کە وەک تیمێکی هاوکار کاریان کردووە، ئێمە سوپاسیاند دەکەین".



پارێزگاری هەولێر ڕاشی گەیاند: "دڵخۆشین کە ئاڵۆگۆڕی ئەم پۆستە ئەمڕۆ بەم شێوازە دەکرێت و هیوادارم هەروەک لە قۆناغی رابردوودا تیمێکی باش بوون، ئێستاش بە هەمان ڕۆحیەت و بگرە بەرزتریش ئێمە پێکەوە تیمێکی کارا و ڕێکوپێک بین، چونکە کەسمان بەتەنیا هیچ نین، چونکە ئەگەر هاوئەهنگ و یەکدەنگ نەبین ناتوانین خزمەتی خەڵکی ئەم پارێزگا خۆشەویستە بکەین".



فرسەت سۆفی گوتیشی: "لێرەوە دەمەوێ دڵنیاتان بکەم، هەروەک دوێنێ لەبەردەم جەنابی سەرۆکی هەرێمی کوردستان و بە ئامادەبوونی وەزیری ناوخۆ سوێندی یاساییمان خوارد و تێیدا جەخت لەسەر چوار پرسنیپی گرنگ کراوەتەوە و دەمەوێ لەبەردەم ئێوە و لەم ڕێوڕەسمەدا جەخت لەو چوار پرەنسیپە بکەمەوە کە ئەوانیش دڵسۆزی، ڕاستگۆیی، دەستپاکی و بێلایەنییە و دڵنیا بین کە ئێمە لەم پۆست و پێگەیەدا بە بێلایەنی خزمەتی هەموو هاووڵاتیانی پارێزگای هەولێر بە هەموو قەزا و ناحیەکانی دەکەین بەبێ لەبەرچاوگرتنی تێڕوانینی سیاسی و حزبی و دینی".



ڕاشی گەیاند: "دەمانەوێ هەموو پێکهاتەکانی ئەم پارێزگایە بە هەموو پێکهاتە ئایینی، قەومی و هەموو ئەو خەڵکانەش وەک ئاوارە لێرەن، هەولێر ماڵێکی گەورە بێت بۆ هەموان".







باسنیوز