ئەمڕۆ پێنجشەممە لێپرسراوی ڕاگەیاندنی شارەوانی ڕانیە ڕایگەیاند كە دەستیان بە جێبەجێکردنی بڕیاری بڕینی مووچەیەکی ئەوانە كردووە كە پێشتر دوو مووچەیان وەردەگرت.

بەشدار حەمید لێپرسراوی ڕاگەیاندنی شارەوانیی ڕانیە ڕاگەیاند: پێشتر ئەگەر فەرمانبەرێک خانەنشین بوایە، دەکرا دواتر داوای گرێبەست بکات و لە فەرمانگەیەک دەستبەکار ببێتەوە و مووچەی خانەنشینی و مووچەی گرێبەستیشی وەرگرتبا.

گوتیشی بەڵام دوای ئەوەی بڕیارێکی حکوومەتی ھەرێمی کوردستان دەرچوو کە دەبێت مووچەخۆر یەک مووچە وەربگرێت، ھەستاین بە ھەڵوەشانەوەی گرێبەستی ھەموو ئەوانەی کە خانەنشین بوون و دووبارە گرێبەستیان لەگەڵ کرابووەوە.

بە پێی گوتەکانی بەشدار حەمید، ئەوە مووچە بڕین و دەرکرن نیە، بەڵكو جێبەجێکردنی بڕیارێکی حکوومەتە کە دەرفەت بە کەسانی دیکە دەدات بە گرێبەست شوێنیان بگرنەوە.