له‌سه‌ر فه‌رمانی‌ ره‌جه‌ب ته‌یب ئه‌ردۆغان، توركیا ستراتیژی‌ نوێ بۆ ئۆپه‌راسیۆنه‌ سه‌ربازییه‌كانی‌ له‌ ناوچه‌كانی‌ باكووری‌ كوردستان داده‌نێت كه‌ به‌پێی ستراتیژه‌كه‌ له‌مه‌ودوا ئۆپه‌راسیۆنه‌كان له‌بری پارێزگاره‌كان له‌لایه‌ن فه‌رمانده‌ی سه‌ربازییه‌وه‌ به‌ڕێوه‌ده‌برێت.

به‌پێی هه‌واڵی رۆژنامه‌ی حورییه‌تی توركی، له‌ ئۆپه‌راسیۆنه‌كانی شاری نسێبین له‌ بواری ئیداریه‌وه‌ ناكۆكی له‌نێوان والی ماردین و فه‌رمانده‌ی سوپادا ده‌ركه‌تووه‌و و داوای لابردنی والی ماردین كراوه‌.

به‌پێی هه‌واڵه‌كه‌، به‌و هۆیه‌وه‌ حكومه‌ت وه‌فدێكی‌ بۆ لێكۆڵینه‌وه‌ له‌ دۆخه‌كه‌ ناردووه‌ته‌ شاره‌كه‌ و بڕیار له‌سه‌ر جێبه‌جێكردنی ستراتیژێكی‌ نوێی سه‌ربازی دراوه‌ كه‌ له‌ ئۆپه‌راسیۆنانی له‌ ناوچه‌ و شاره‌كاندا ده‌زگاكانی هه‌واڵگری و ئه‌منی و سه‌ربازی ناوچه‌كان له‌لایه‌ن یه‌كده‌سته‌وه‌ به‌ڕێوەببرێت و به‌رزترین پله‌ی سه‌ربازی له‌و شارانه‌ فه‌رمانده‌ی ئۆپه‌راسیۆنه‌كان ده‌بێت، به‌هیچ شێوه‌یه‌ك والی ده‌ست له‌ ئۆپه‌راسیۆنه‌كان وه‌رنادات.

به‌هۆی ئه‌وه‌ی هێزه‌ ئه‌منیه‌كان و سوپای توركیا ژماره‌یه‌كی زور كوژراو و برینداری له‌ ئۆپه‌راسیۆنه‌كانی له‌ به‌رامبه‌ر په‌كه‌كه‌ ده‌دات له‌ شار و ناوچه‌كانی باكووری كوردستان ستراتیژیه‌كی سه‌ربازی نوێ دادەنێت و له‌مه‌ودوا ئۆپه‌راسیۆنه‌كان له‌بری پارێزگاره‌كان له‌لایه‌ن فه‌رمانده‌ی سه‌ربازییه‌وه‌ بەڕێوه‌ده‌برێت.

ئه‌م ستراتیژه‌ نوێیه‌ له‌سه‌ر فه‌رمانی ئه‌ردۆغان سه‌رۆك كۆماری توركیا بووه‌ كه‌ وتبووی‌ "له‌و ناوچانه‌ی كه‌ ئۆپه‌راسیۆنه‌كانی‌ لێ به‌رده‌وامه‌ و ئه‌و خانوو بینایه‌ی كه‌ به‌ ته‌قه‌مه‌نی بۆمبڕرێژكراون و له‌لایه‌ن ئه‌ندامانی په‌كه‌كه‌وه‌ به‌كاردێن ئه‌گه‌ر پێویست بكات له‌ دووره‌وه‌ خانوویه‌كان بته‌قێننه‌وه‌". له‌و باره‌یه‌وه‌ باس له‌ 200 خانوو و بینا ده‌كرێت.

به‌پێی هه‌واڵه‌كه‌ له‌ دوای شه‌ڕی ناوچه‌ی‌ سوور له‌ ئامه‌د و جزیره‌ له‌ شرناخ، په‌كه‌كه‌ ژماره‌یه‌كی زۆر له‌ شه‌ڕڤانانی بردووه‌ته‌ شاری نسێبینی پارێزگای ماردین و زیانی زۆری‌ گه‌یاندووه‌ به‌هێزه‌ ئه‌منیه‌كان و ژماره‌یه‌كی زۆر سه‌رباز و پۆلیس و هێزی تایبه‌ت كوژراون.

رۆژنامه‌كه‌ له‌زاری‌ چه‌ند سه‌رچاوه‌یه‌كی‌ ئه‌منییه‌وه‌ ئاشكرایكردووه‌، 700 بۆ 800 ئه‌ندامانی په‌كه‌كه‌ و شه‌ڕڤانانی یه‌كینه‌كانی پاراستنی سڤیل یه‌په‌سه‌ له‌ شاری نسێبین شه‌ڕ ده‌كه‌ن. هه‌روه‌ها له‌ شه‌ش گه‌ڕه‌كی شاری نسێبین 17 قه‌ناس به‌ده‌ست و شه‌ڕڤانان جێگیركراون ژماره‌یه‌كی زۆر له‌ كۆڵان و شه‌قام و بینا بۆمبڕێژكراون. به‌و هۆیه‌شه‌وه‌ ئۆپه‌راسیۆنه‌كانی هێزه‌ ئه‌منیه‌كان و سوپا به‌قورسی‌ به‌ڕێوه‌ده‌چێت و ژماره‌ی كوژراو و برینداره‌كان به‌رزبووه‌ته‌وه‌.

به‌پێی هه‌واڵه‌كه‌، له‌ 90 هه‌زار دانیشتووی‌ شاری نسێببین 60 هه‌زار ئاواره‌بوون و 30 هه‌زاریش له‌ شاره‌كه‌ ماون و شه‌ڕڤانان له‌ 200 بینای شاره‌كه‌ بڵاوبوونه‌ته‌وه‌و وه‌كو باره‌گه‌ به‌كارده‌هێنرێت و به‌و هۆیه‌وه‌ بڕیار دراوه‌ ئه‌و 200 بینایه‌ له‌ دووره‌وه‌ بته‌قێنرێته‌وه‌.








له خه‌ندان