سەرۆك وەزیرانی عیراق، پشتیوانی خۆی بۆ ئیدارەی پارێزگای كەركوك دووپاتكردەوەو پیرۆزبایشی لە هێزەكانی پێشمەرگە كرد، بەهۆی ئەو سەركەوتنانەی لە شەڕی چەكدارانی ڕێكخراوی تیرۆریستی داعشدا، لە باشووری كەركوك بەدەستیان هێناوە.

بەپێی بەیاننامەیەك كە لەلایەن نوسینگەی سەرۆك وەزیری عێراقەوە بڵاوكرایەوە: حەیدەر عەبادی سەرۆك وەزیرانی عێراق، لە پەیوەندییەكی تەلەفۆنیدا لەگەڵ نەجمەدین كەریم پارێزگای كەركوك، پیرۆزبایی لە پارێزگاری كەركوك و كەركوكییەكان كردووە، بەبۆنەی ئەو سەركەوتنە گەورانەی لەسەر دەستی هێزەكانی پێشمەرگە لە باشووری كەركوك بەسەر چەكدرانی ڕێكخراوی تیرۆریستی داعشدا، بەدەستیان هێناوە.

هەر لە بەیاننامەكەدا هاتووە: لەو پەیوەندییە تەلەفۆنییەدا، سەرۆك وەزیرانی عێراق، پشتیوانی خۆی بۆ پارێزگای كەركوك و سەركەوتنەكانی لە پتەوكردنی ئاسایش و پێكەوەژیان و رووبەڕبوونەوەی مەترسییەكانی ڕێكخراوی تیرۆریستی داعش و خزمەتكردن بە پێكهاتە جیاجیاكانی كەركوك، دووپاتكردوەتەوە.