وەزارەتی پێشمەرگەی حكومەتی هەرێمی كوردستان لێكۆڵینەوە لەو گرتە ڤیدیۆییە دەكات، كە دەگوترێ میلیشیاكانی حەشدی شەعبی بە شێوەیەكی دڕندانە لە پێشمەرگەیەك دەدەن.

جەبار یاوەر، ئەمینداری گشتی وەزارەتی پێشمەرگەی حكومەتی هەرێمی كوردستان لە لێدوانێكدا بۆ تۆڕی میدیایی رووداو، رایگەیاند، "ئێمە ئەو گرتە ڤیدیۆییەمان بینیوە و ئەم هەفتەیە ئاگاداری ئەو شوێنە دەكەینەوە، كە ئەوكارەی تێدا رووداوە، بۆ ئەوەی بزانین ئەو پێشمەرگەیە كێیە و ئەو رووداوە چی بووە".

ئەمینداری گشتی وەزارەتی پێشمەرگە هەروەها دەڵێت، "ئێمە لێكۆڵینەوە دەكەین بزانین ئەو گرتە ڤیدیۆییە چییە و دوای لێكۆڵینەوە ئەگەر راستیی گرتە ڤیدیۆییەكەمان بۆ دەركەوت، رێكاری یاسایی دەگرینە بەر و هەڵوێستمان دەبێت و كەی دەرەنجامی لێكۆڵینەوەكە ئاشكرابوو، رایدەگەیەنین و رای گشتی لێ ئاگادار دەكەینەوە".

لە گرتە ڤیدیۆییەكەدا كۆمەڵێك چەكدار، كە دەگوترێت چەكداری حەشدی شەعبی-ین، هەڵدەكوتنە سەر كەسێك، كە جلوبەرگی سەربازی لەبەردایە و بە دڕندانەترین شێوە لێیدەدەن و پاشان بە چاو بەستراوی و لەكاتێكدا پاڵیان خستووە، گولـلەبارانی دەكەن.










رووداو