٢9ی ئەیلول/ سپتەمبەر(گولان میدیا)- پەرلەمانتاری مووش دەڵێ دەستپێكردنی دانوستان بۆ چارەسەر كردنی پرسێكی سەد ساڵە زۆر گرنگە، مەجلسی ئاشتی توركیا كۆبوونەوەیەكی لە ژێر ناوی\" لە كوێ قۆناغی چارەسەریدان\"" لە شاری دیاربەكر ساز كرد و كۆبوونەوەكە لە لایەن ئەندامی مەجلسی ئاشتی توركیا شەمسەدین كۆچەوە بەڕێوە برا.

لە سەرەتای كۆبوونەوەكەدا شەمسەدین كۆچ رایگەیاند: سی ساڵە لەم وڵاتە ئازاری زۆرمان بینیوە و حەفت مانگە قۆناغێكی نوێ دەستیپێكردووە.

ئاژانسی ئاندۆلی توركی بڵاویكردەوە كە لەم كۆبوونەوەیەدا نوێنەری مووش لە پەرلەمان ( سڕڕی ساكیك) گوتەیەكی پێشكەش كرد و گوتی: دەستپێكردنی قۆناغی گفتوگۆ كردن بۆ چارەسەری پرسێكی سەد ساڵە هەنگاوێكی زۆر گرنگە و بەو پەڕی هێز و ئیمكاناتی خۆمەوە پشتگیری لەم قۆناغە دەكەم.

ساكیك رایگەیاند: یەكەمینجارە حكوومەت لەگەڵ كورد لە سەر مێز دانیشتووە و دانی بە بێ ئەنجام بوونی توندوتیژی بۆ چارەسەر كردنی پرسەكان ناوە و گوتی: هەر چەند ئێمە لایەنی یەكەمی پرسی كوردن كەچی ئاگامان لە ناوەڕۆكی پاكێجی دیموكراتیزاسیۆن نییە و سەرەڕای ئەمەیش ئومیدی خۆمان بۆ ئاشتی دەپارێزین.

ساكیك باسی شەفاف بوونی قۆناغی چارەسەری كرد و گوتی: وەرن با ئەو شتانەی لە لایەن كۆمیتەی عەقڵمەندانەوە نووسرابوون جێبەجێ بكەین. 30 ئەیلوول پاكێجێكی دیموكراتیزاسیۆن ئاشكرا دەكرێ ئێمە ئاگامان لە ناوەڕۆكی نییە، لە سەر بنەمای ئاغا و كوێلە ئاشتی بەدەست ناخرێت."