28ی ئەیلول/ سپتەمبەر(گولان میدیا)- ھەموو ساڵێ لە ٢٨ی ئەیلوولدا یادی دامەزراندنی ئێزگەی \"دەنگی کوردستان\"" دەکەینەوە. رۆژگاری رابردوو، سەردەمی دامەزراندن و ساتە سەختەکانی بەردەوامی و ئەمڕۆی گەشاوەی ئەو دەنگە دلێرە، بەرزو بەڕێز رادەگرین و سەری نەوازش بۆ شەھیدانی ئەو ئێزگەیە و ماندووبوونی کادیران و نووسەران و پێشکەشکاران و تەکنیککارانی دادەنەوێنین و پەنجا جار ھێندەی پەنجا ساڵی تەمەنی دەنگی کوردستان دووپاتی دەکەینەوە کە لە رۆژگارێکدا، گەلی کوردستان رووبەڕووی ھێرشی زاڵمانەی رژێمی ئەو کاتەی عێراق و پیلانی دوژمنانی بۆتەوە و پێشمەرگە قارەمانەکانی ئەیلوول و شۆِڕشگێڕان و ئازادیخوازانی عێراق لە عەرەب و تورکمان و کلدان ئاشووری گورزی کەمەرشکێنیان لە شۆفێنییەت دەوەشاند، بەڵام گەمارۆی ئیعلامی سەر شۆڕش وەھای کردبوو کە ئازایەتی و نەبەردییەکانی پێشمەرگە و دەنگی رەوای کوردستانیان و ئازادیخوازانی عێراق نەگاتە گەلی کوردستان و عێراق و ناوەندە جیاجیاکانی ئیقلیمی و نێودەوڵەتی و لەوەیش زیاتر ئیعلامی دوژمنکارانە بەردەوام ئیشی لەسەر چەواشەکاری و ھەڵبەستنی درۆ و ناشرینکردنی رووی راستەقینەی شۆڕش و مافە رەواکانی گەلەکەمان دەکرد، بڕیاری رابەری بزووتنەوەی رزگاریخوازی گەلی کوردستان، رابەری شۆڕشی مەزنی ئەیلوول (مستەفا بارزانی نەمر)، بۆ دامەزراندنی ئەم ئێزگەیە، بڕیارێکی حەکیمانە و بوێرانە بووە. ئێزگەی دەنگی کوردستان لەو کاتەدا بووە دەنگی رەوایەتی و نەبەردی گەل و شۆڕش. بە دەنگ، چرایەکی داگیرساند و شەوەزەنگی شۆفینزمی رەواندەوە و بەرپێی پێشمەرگە و ئازادیخوازانی رۆشن کردەوە و، بووە تاکە سەرچاوەی متمانەپێکراو لەسەر ئاستی ناوخۆ و دەرەوە.
ئێزگەی دەنگی کوردستان ئێزگەی بەردەوامی شۆڕش و بەرخودانی گەلەکەمان بووە، لە شۆڕشی ئەیلوولی مەزنەوە بۆ شۆڕشی گوڵانی پێشکەوتنخواز و بۆ بەرەنگاربوونەوە و پووچەڵکردنەوەی نیازی شۆفێنیانەی شاڵاوی بەدناوی ئەنفال و کیمیاباران، تا راپەڕینی ئاداری ١٩٩١ و لە رۆژگاری ئەمڕۆماندا، لە سەردەمی بونیاتنانی کوردستانی دیموکراسی و گەشاوە و ئازاددا، کاروانێکی دەوڵەمەند و خەباتێکی ئیعلامیی لەیادنەکراوی ھەموو ئەو ھەڤاڵە تێکۆشەرانەیە کە بە خوێن و ئارەقە و ماندووبوون و شەونخوونییان، لاپەڕە گەشەکانی مێژووی راگەیاندنی کوردییان تۆمار کردووە و بۆ ھەتا ھەتایە جێی شانازی و تێڕامان و لێکۆڵینەوەی زانستیتییە.
ئەمڕۆ کە یادی یۆبیلی زێڕینی ئەم ئیزگە زێدە ئازیزەیە، پەنجا چەپکە گوڵی سەرکەوتنی پێشکەش دەکەین و بە پەنجا ئەستێرەی جوان ئاسمانی پەنجا ساڵەی دەدرەوشێنینەوە و بە پەنجا مۆمی داگیرساو یاد و یادەوەرییەکانی پیرۆز دەکەین و دەستی ماندووبوونی بەڕێوەبەر و ستافی نووسین و پێشکەشکاران و تەکنیککاران و یەکە بە یەکەی کارمەندانی دەگوشین.
ھەڵبەتە یادی یۆبیلی زێڕینی ئێزگەی \""دەنگی کوردستان\"" ئاھەنگ و بیرھێنانەوە و گردبوونەوەیەکی یەکجار گەورەی شایستەیە، بەڵام بە داخەوە لە ھەلومەرجی ئەم ماوەیەدا کە ھەموو لایەک لە چاوەڕوانی دەرەنجامەکانی ھەڵبژاردن و سەرقاڵی کاروبارەکانی دوای ھەڵبژاردنن، بۆ دەزگای رۆشنبیری و راگەیاندن نەلوا کە لە کات و رۆژی خۆیدا، لە ٢٨ ی ئەیلوولدا ئەو یادە بکاتەوە. بەڵام لە رۆژانی داھاتوودا و لە ھەلومەرجێکی شیاودا بە شێوەیەکی یەکجار شایستە بە گەورەیی ئەم بۆنەیە، ئاھەنگێک بۆ یادکرنەوەی ساز دەکات.
بەرزوبەڕێز بێ یادی یۆبیلی زێڕینی دەنگی کوردستان

دەزگای رۆشنبیری و راگەیاندنی
پارتی دیموکراتی کوردستان"