25ی ئەیلول/ سپتەمبەر(گولان میدیا)- لە سەرەتای دەستپێكردنی پرۆسەی دیموكراتیزە كردنی توركیا و قۆناغیچارەسەری پرسی كورددا پارێزەرانی سەرۆكی پەكەكە عەبدوڵڵا ئۆجەلان بە مەبەستی تانەدان لە بڕیاری دادگای بەرایی داواكارییەكیان ئاراستەی دادگای باڵای توركیا كرد بەڵام دادگای باڵای توركیا ئەو داواكاریەی رەت كردەوە.

لەمبارەیەوە ماڵپەڕی حاكمییەت بڵاویكردەوە كە رۆژی سێشەممە دادگای سزای گرانی ژمارە 12ی ئەنقەرە وەڵامی داواكاری پارێزەرانی ئۆجەلانی داوەتەوە و رایگەیاندووە كە دادگا ناتوانێت بریاری دووبارە دادگایی كردنەوەی ئۆجەلان دەر بكات.

دادگای سزای گرانی ژمارە ژ12ی ئەنقەرە رایگەیاندووە كە لیژنەی دادوەرانی دادگا بڕیاری دادگای بەرایی ( دادگای سزای گرانی ژمارە 11)ی توركیایان هەڵسەنگاندووە و بۆیان دەركەوتووە بڕیاری دادگای ناوبراو بڕیارێكی دادمەند و عادلانە بووە و هیچ جۆرە بەڵگەیەكی یاسایی نییە بسەلمێنێت ئەو بڕیارە بڕیارێكی عادلانە نییە بۆیە دادگای سزای گرانی ژمارە 12 داواكاری پارێزەرانی ئۆجەلان بۆ دووبارە دادگایی كردنەوەی ناوبراو رەد دەكاتەوە.