وەزارەتی گواستنەوە و گەیاندن سەرەڕای ئەوەی بە یەكێك لە وەزارەتە گرنگ و هەستیارەكانی حكومەت دادەنرێت، پەیوەندیی راستەوخۆشی بە ژیانی خەڵكەوە هەیە. هەروەها رێكخستنەوەی هێڵەكانی گواستنەوەی گشتی (تەكسی و پاس) لایەنێكی گرنگی كارەكانی ئەم وەزارەتەیە، كە لەم رووەوە گرفت و كەموكورتیی یەكجار زۆر هەیە، هەربۆیە وەزارەت لە رێگەی بەرنامە و چەند پڕۆژەیەكەوە سەرقاڵی دووبارە رێكخستنەوەی ئەم سێكتەرە گرنگەیە، لە رووی هێڵەكانی ئەنتەرنێتیشەوە كە هاونیشتمانیان گلەیی و رەخنەی زۆریان لە لاوازیی كوالێتی هێڵەكان هەیە، وەزارەت دەیەوێت چاودێری و لێپرسینەوەی توند لەسەر كۆمپانیاكانی ئەنتەرنێت دابنێت، هەردوو سێكتەری گواستنەوە و گەیاندن و چەند پرسێكی پەیوەندیدار تەوەرەی سەرەكیی دیمانەی ئەم جارەی گۆڤاری گوڵانن لەگەڵ ئانو جەوهەر عەبدولمەسیح وەزیری گواستنەوە و گەیاندن، لێرەدا پوختەی قسەكانی بڵاودەكەینەوە.

* لەگەڵ ئەوەی گواستنەوە و گەیاندن سێكتەرێكی زۆر گرنگە و راستەوخۆ پەیوەندی بە ژیانی خەڵكەوە هەیە، بەڵام هەتا ئێستا وەك پێویست پێناسە و رەهەندی كارەكانی ئەم سێكتەرە لای هاووڵاتی روون نییە، ئایا ئەم سێكتەرە گرنگە چەند بوار دەگرێتەوە؟
- وەزارەتی گواستنەوە و گەیاندن بە یەكێك لە وەزارەتە گرنگ و خزمەتگوزارییەكانی حكومەتی هەرێمی كوردستان دادەنرێت، كە لە سەرتاسەری هەرێمی كوردستاندا كار دەكات، چونكە سەرپەرشتی و ئەركی رێكخستنی گواستنەوەی هێڵەكانی گشتی و ئەنتەرنێت و پۆستە لە ئەستۆ دەگرێت، هەموو ئەمانەش پەیوەندیی راستەوخۆیان بە ژیانی هاووڵاتیانەوە هەیە. دەتوانین بڵێین كاری وەزارەتی گواستنەوە و گەیاندن لە ناو دەوڵەت و حكومەتدا وەكو دەمارەكانی جەستەی مرۆڤ وایە، ئەگەر هاتوو دەمارەكان لاواز بن، ئەوا نەك هەر خوێنبەرەكان ناتوانن بە ئەرك و كارەكانی خۆیان هەڵسن، بگرە مرۆڤ دوچاری جەڵتەش دەبێت، هەر لەبەر گرنگی و هەستیاریی ئەم سێكتەرە خزمەتگوزارییانەیە كە حكومەتی عێراق ناچار بووە، كارەكانی ئەم وەزارەتە راسپێرێتە سەر دوو وەزارەت و دەستەیەك، كە ئەوانیش ( وەزارەتی گواستنەوە و وەزارەتی گەیاندن و دەزگای CMCی عێراقی) یە، بە شێوەیەكی گشتی دەتوانین بڵێین وەزارەتی گواستنەوە و گەیاندن پەیوەستە بەم كارانەی خوارەوە:
یەكەم: كاری گەیاندن، سەرپەرشتیكردنی كاری هێڵەكانی ئینتەرنێت، ئەگەر لە دواڕۆژدا یاساكانیش بگۆڕدرێن ئەوا سێكتەری هێڵەكانی مۆبایلیشی دێتەسەر.
دووەم: كاری پۆستە
سێیەم: سەرپەرشتیكردنی هێڵەكانی گواستنەوەی ئۆتۆمبێل و داخڵبوونی ئۆتۆمبێل لە دەروازە سنوورییەكانەوە.
* لە ماوەی دەستبەكاربوونی كابینەی نۆیەم هەتا ئێستا، وەزارەتەكان بەرنامەی چوار ساڵی داهاتوویان بۆ كاری وەزارەتەكەیان دیاری كردووە، ئایا رەهەندە گشتییەكانی بەرنامەی چوار ساڵی داهاتووتان چییە؟
- بەرنامە و كارەكانی وەزارەتی گواستنەوە و گەیاندن وەكو سەرجەم وەزارەتەكانی دیكە پەیوەستە بە هێڵە گشتییەكانی كارنامەی رێزدار مسرور بارزانی سەرۆكی حكومەتی هەرێمی كوردستان، ئەو كارنامەیەی لە بەردەم پەرلەمانی كوردستان پێشكەشی نوێنەرانی گەلی كرد و متمانەی خەڵكی كوردستانی بەدەست هێنا، هەربۆیە ئیش و كارەكانمان لە چوارچێوەی ئەو بەرنامە گشتییەی حكومەتدا رێك دەخەین، كە رەهەندی گشتیی خزمەتكردنی هاووڵاتیانی كوردستان و بووژانەوەی ئابووری و سێكتەرە جۆراوجۆرەكان لەخۆ دەگرێت، بە خۆشحاڵییەوە وەزارەتەكەمان یەكێك بوو لەو وەزارەتانەی لە پێشكەشكردنی بەرنامە چوار ساڵییەكەیدا پێشەنگ بوو، ئێمە لە وەزارەت بەرنامەیەكی تێروتەسەلمان پێشكەشی فەرمانگەی هەماهەنگی و بەدواداچوون لە ئەنجومەنی وەزیران كردووە و لە چاوەڕوانی پەسەندكردن و رەزامەندیی سەرۆكی حكومەتی هەرێمی كوردستانداین، بۆ ئەوەی لە چوارچێوەی ئەو بەرنامەیەدا كارەكانمان دەست پێ بكەین. هەڵبەتە هەر وەزارەتێكیش بەپێی ئەو ستراتیژ و ئەركەی پێی راسپێردراوە، جەخت لەسەر كۆمەڵێك بەرنامە و كار دەكاتەوە، ئێمەش وامان كردووە، لەوانە: گواستنەوەی گشتی تەكسی و پاس و هێڵی ئاسنین و ترام و بواری گەیاندنی ئینتەرنێت، لەگەڵ كاروباری پۆستە.
* ئەم سێكتەرانە گرنگن، با سەرەتا لە سێكتەری گواستنەوەی گشتییەوە دەست پێ بكەین، ئایا بۆ پێشخستنی گواستنەوەی گشتی چ بەرنامەیەكتان هەیە؟
- لەگەڵ ئێوەدا هاوڕام، من ناڵێم گواستنەوەی گشتیمان نییە، بەڵام گرفت و كێشەی گەورەی تێدایە، هەمووان رۆژانە ئەو جەنجاڵییەی ناوشارەكان و بێسەروبەریی سێكتەری گواستنەوەی گشتی (النقل العام) دەبینن، لێرە تەكسی و پاسی زۆرمان هەیە، كەچی كێشەی گواستنەوە چارەسەر نەكراوە و بگرە بوونەتە هۆكاری جەنجاڵیش، خۆ ئەگەر بەراوردێك لە نێوان شارێكی وەكو ئەستەمبوڵ و هەولێردا بكەین، جیاوازییەكە بە روونی دەبینین، لە ناو سەنتەری شاری هەولێردا 35 هەزار ئۆتۆمبێلی تەكسی هەیە و دانیشتووانەكەی یەك ملیۆن و 500 هەزار كەسن، كەچی لە شارێكی وەكو ئەستەمبوڵ كە دانیشتووانەكەی 15 ملیۆن و 700 هەزار كەسن، تەنیا 17 هەزار ئۆتۆمبێلی تەكسی هەیە، ئەمە جیاوازییەك نییە تەنیا لە ژمارەی تەكسییەكاندا، بەڵكو جیاوازییەكی گەورەشە لە كوالێتی و ئاستی پێشكەشكردنی خزمەتگوزارییەكاندا، ئەم گرفت و بێسەروبەرییە پێویستی بە رێكخستنەوە هەیە، یەكەمین كاریشمان لە وەزارەت دوای رێكخستنەوەی ئیشوكارەكانی تەكسی، دامەزراندنی سیستمێكی رێكوپێكی مۆدێرنی سیتی پاس دەبێت، سیتی پاس پڕۆژەیەكی وەزارەتمانە و پێشكەشی ئەنجومەنی وەزیرانمان كردووە و لە دوای رەزامەندی راستەوخۆ لە رێگەی كەرتی تایبەتەوە بەبێ جیاوازی لە سەنتەری پارێزگاكانی هەولێر و سلێمانی و دهۆك و هەڵەبجە و سەرجەم قەزاكانی دیكەی كوردستان جێبەجێی دەكەین، ئەگەر هاووڵاتیانی كوردستان بەفەرمانبەر و قوتابی و كاسبكارەوە وێستگەیەكی مۆدێرنی لە هاوین فێنك و لە زستان گەرمیان هەبێت و كاتەكانی هاتن و رۆشتنی پاسەكانیان لا روون بێت، ئیتر چ پێویست دەكات بۆ چوونیان بۆ فەرمانگە و كار و زانكۆ و بازاڕ ئۆتۆمبێلی شەخسی بەكاربهێنن و ئەو هەموو جەنجاڵییەی لێ بكەوێتەوە، خۆ جگە لە كەمكردنەوەی جەنجاڵیی ناوشار و باشتر رێكخستن و گەیشتن بە دەوام و ئیشوكارەكان، رووداوەكانی هاتوچۆش كەم دەبنەوە و ژینگەكەمان لەو هەموو دووكەڵ و گازە ژەهراوییەش پارێزراو دەبێت، لەكۆتاییشدا هاووڵاتی لە رووی دارایی و كەمبوونەوەی خەرجییەكانی بەكارهێنانی بەنزین سوودمەند دەبن، ئێمەش وەكو كۆمەڵگە پێشكەوتووەكان و شارە گەورەكانی جیهان دەبینە خاوەن سیستمێكی مۆدێرن و پێشكەوتوو جوانی گەیاندن. جگە لە سیتی پاس پڕۆژەی گەورەی دیكەشمان لە بەردەستدایە و كاری جددی لەسەر دەكەین، لەوانە پڕۆژەی هێڵی ئاسنین و ترام و پڕۆژەی تەكسی، سەبارەت بە هێڵی ئاسنین ئەمە لە قۆناغی دیراسەتدایە بەوەی چۆن بتوانین كوردستان ببەستینەوە بە هێڵی شەمەندەفەری عێراقەوە كە لە ئێستادا گەیشتۆتە شارۆچكەی بێجی، تا بۆ پارێزگاكانی كوردستان رایبكێشین و هەرچوار پارێزگای كوردستان هەولێر و سلێمانی و دهۆك و هەڵەبجە بەو هێڵە ئاسنینەوە ببەستینەوە، لە قۆناغی كۆتاییشدا لە رێگەی دەروازە نێودەوڵەتییەكانمانەوە هەڵی ئاسنین ببەستینەوە بە وڵاتانی دەوروبەر و ئەوروپاوە.
* باسی پڕۆژەی تەكسیت كرد، لە رۆژانی رابردوودا لە كۆنفرانسێكی رۆژنامەییدا باسی ئەم پڕۆژەیەتان كرد و قسەو باسێكی زۆریش هەڵدەگرێت و پێویستی بە روونكردنەوەی زیاترە، ئایا دەكرێت وردەكارییەكانی ئەم پڕۆژەیەمان بۆ باس بكەیت؟
- پڕۆژەی تەكسی لە رووی رێكخستنەوە و بەرزكردنەوەی ئاستی خزمەتگوزاری و سەلامەتی هاووڵاتییانەوە گرنگییەكی زۆری هەیە، تەنانەت بۆ خودی شوفێرانی تەكسی و پاراستنی ناو و ناوباگیشیان گرنگە، چونكە شوفێرانی تەكسی توێژێكی باش و رێكوپێكن، خۆدەبێت ناو و ناوبانگیان لە كەسانی نەفس نزم و خراپ بپارێزین، شەش مانگ بۆ وادەی جێبەجێكردنی پڕۆژەكە دانراوە، لەو ماوەیەدا پێویستە هەموو شوفێرێكی تەكسی سەردانی بەڕێوەبەرایەتیی پۆلیسی هاتوچۆی شارەكەی بكات و فۆرمێك وەربگرێت و دواتر فۆرمەكە بباتە ئاسایش و فەرمانگەی بەنچەمۆر، ئەمەش بۆ ئەوەی بزانرێت ئەو كەسە تاوان و تاوانكاریی هەیە، ناكرێت كەسێك تاوانكاریی هەبێت و رێگەی بدەین بە ناوی شوفێری تەكسییەوە ژیان و نامووسی خەڵكی بخاتە مەترسییەوە، بۆیە دوای تەواوبوونی ئەو مامەڵانە ئەو كات لای ئێمە باج و كارتی زانیاری دەدەینێ، ئەو كارتە لە سێ جێگای (بەردەم سەرنشینەكە لە سەر داشبوڵی پێشەوەی ئۆتۆمبێلەكە و لە كوشنی بەردەم هەردوو سەرنشینەكەی پشتەوەی تەكسیەكەش) دادەنرێت و سەرنشینەكان راستەوخۆ هەموو زانیارییەكانی تایبەت بە (ناو و وێنەی شوفێر و ژمارەی تابلۆی تەكسیەكە و ژمارەی تەلەفۆنەكانی ئاسایش و پۆلیس و توندوتیژی دژ بە ئافرەتانی) تێدایە، لە كاتی هەر سەرپێچیەك دەتواندرێت راستەوخۆ ئاگاداری لایەنی پەیوەندیدار بكرێتەوە، تەنانەت كەسێك دەتوانێت وێنەیەكی فۆتۆی ئەو كارتە بە مۆبایل بگرێت و بۆ خانەوادەكەی بنێرێت، كە ئەو لەگەڵ فڵان تەكسیدا سەفەری كردووە، هەموومان ئاگادار بووین لە ماوەكانی رابردوودا لەلایەن خەڵكانی نەفس نزم و خراپەوە هەندێك كێشە دروست بوو، كە ناو و ناوبانگی شوفێری تەكسییان لەكەدار كرد، هەربۆیە پێش هەموو شتێك ئەم كارە خزمەتی شوفێران دەكات، سەبارەت بە شاری هەڵەبجە كە تا ئێستا ژمارەی تابلۆی تەكسیان نییە، بۆیە هەر كە دانرا بەو پەڕی سەربەرزییەوە ئەم پڕۆژەیە لە هەڵەبجەش جێبەجێ دەكرێت.
* سێكتەری گواستنەوە و گەیاندن لە عێراقدا، دەكەوێتە چوارچێوەی وەزارەتە سیادییەكانەوە، ئەمەش بەو مانایەی بەشێكی زۆری گواستنەوە و گەیاندن دەكەوێتە چوارچێوەی دەسەڵاتی فیدڕاڵییەوە، نەك هەرێمەكان، دیارە كۆمەڵێك كێشە لەم بوارەدا هەبوون، ئایا چارەسەرتان كردوون، یان بەرنامەتان بۆ چارەسەركردنی چییە؟
- لە سێكتەری گواستنەوە و گەیاندندا بە هاوشێوەی بوارەكانی دیكە زۆر گرفت و كێشە لە نێوان هەرێمی كوردستان و بەغدا هەیە و بە چارەسەرنەكراوی ماونەتەوە، بۆ نموونە: ئێمە لە كوردستان بە پێچەوانەی دەستوورەوە هیچ دەسەڵاتێكمان بەسەر كۆمپانیاكانی مۆبایلی (كۆڕەك و ئاسیاسێڵ و زین)دا نییە، ئەمە لە كاتێكدا بەپێی دەستوور هەرچی بڕیارەكانی سەردەمی پۆڵ بریمەرە دەبێت هەڵبوەشێتەوە، یەكێكیش لەو بڕیارانەی تایبەت بوو بە دامەزراندنی دەزگای cmc لە بەغدا و تائێستاش هەر ئەو دەزگایە كۆنتڕۆڵی تۆڕەكانی مۆبایل لە سەرانسەری عێراق بە كوردستانیشەوە دەكات، ئێمە لە هەوڵی ئەوەداین بە هەماهەنگی و هاوكاریی نوێنەرانی كوردستان لە بەغدا چارەسەری ئەو كێشەیە بكەین و ئەو مافەی خەڵكی كوردستان بەدەست بهێنینەوە، لە لایەكی دیكەوە باجێكی زۆر گەورە لە كۆمپانیاكانی مۆبایل وەردەگیرێت و هیچ مافێكیش لەم باجە بە خەڵكی كوردستان نادرێت، تەنانەت ئەو باجەی 20%ی كە لە ساڵی 2015 بەهۆی شەڕی داعش و دابەزینی نرخی نەوت بەپێی ماددەی 33ی یاسای بودجە خرایە سەر بەكارهێنانی كارتی مۆبایل، جگە لەوەی باجێكی زۆرە لەسەر هاووڵاتیان، رەچاوی ئەو جیاوازییەش نەكراوە كە لە نێوان مووچەی فەرمانبەرانی هەرێم و عێراقدا هەیە كە بە 50% مەزەندە دەكرێت، لەم حاڵەتەدا واتا رێژەی باجەكە لەسەر فەرمانبەرانی هەرێم 40% و لەسەر فەرمانبەرانی عێراق 20% بووە. بۆ ئەم مەبەستە چەند پێشنیارێكمان هەیە، لەوانە: دابەزینی رێژەی باجی بەكارهێنانی خزمەتگوزاری مۆبایل لە هەرێمی كوردستان بۆ 10%، یان هەڵگیرێت، یان لەسەر كۆمپانیاكە دابنرێت، بەڵام تا ئێستا لەم رووەوە لە بەغدا هیچ وەڵامێكمان وەرنەگرتووە.
* ئایا بۆ ئەم حاڵەتە لە بواری فڕۆكەخانەكانیشدا لەگەڵ بەغدا گرفتتان هەیە؟
- حكومەتی بەغدا لە بەركارهێنانی خزمەتگوزاریی هەردوو فڕۆكەخانی نێودەوڵەتیی هەولێر و سلێمانی و بەكارهێنانی ئاسمانی كوردستان، بە دەیان ملیۆن دۆلار قەرزاری ئێمەن و داوامان كردووە ئەو قەرزانە بدەنەوە، بەڵام تا ئێستا بە شێوەیەكی فەرمی وەڵامیان نەداوینەتەوە.
* ئەنتەرنێت بۆتە خزمەتگوزاریی سەرەكی بۆ هەموو هاووڵاتیانی كوردستان، بەڵام دەگوترێ كۆمپانیاكان هاووڵاتیان ئیستغلال دەكەن و خزمەتگوزارییەكان جیا لەوەی گرانن، لە هەمانكاتدا كوالیتییان نزمە، ئایا ئێوە لەئاستی ئەو كۆمپانییانە بێدەنگ دەبن، یان بەرنامەتان بۆ رێكخستنەوەیان هەیە؟
- هەر لە دەستبەكاربوونم لە وەزارەتی گوستنەوە و گەیاندن، یەكێك لە كارە سەرەكییەكانم دووبارە چاوخشاندنەوە و رێكخستنی كارەكانی كۆمپانیاكانی ئەنتەرنێت بوو، بەتایبەتی كە گلەیی و رەخنەیەكی زۆری هاووڵاتیانمان بە دەست گەیشتووە، هەڵبەتە زۆر لەو كۆمپانیانەی ئەنتەرنێت پێش دەستبەكاربوونم گرێبەستیان لەگەڵ وەزارەتدا هەبووە، بەڵام ئەمە ئەوە ناگەیەنێت كە بەدواداچوون و چاودێرییان نەكرێت و نەتوانین ئەم بوارە رێكبخەینەوە، هەر لەم چوارچێوەیەدا لە نووسینگەی تایبەتیی خۆم فەرمانبەرێكم تەرخان كردووە، تاوەكو راستەوخۆ لە رێگەی هێڵی گەرمی تەلەفۆن 07504761663 پەیوەندی هاووڵاتیان وەربگیرێت، هەر كەسێك گلەیی و رەخنەی هەبوو، دەتوانێت لە رێگەی نامەی مۆبایل، یان نامەی (فایبەر و واتس ئاب)ـەوە لە زۆنی جوگرافیا و كۆمپانیاكە و جۆری كەموكورتی خزمەتگوزارییەكان ئاگادارمان بكاتەوە، ئێمەش كۆمپانیاكە ئاگادار دەكەینەوە و تەنانەت بەدواداچوون و لێپرسینەوەشیان لەگەڵ دەكەین. خزمەتگوزاریی فایبەر ئۆبتیكی ئەنتەرنێت گەیشتۆتە ماڵان، ئەم خزمەتگوزارییە پێشكەوتووە و لە عێراق و وڵاتانی ناوچەكەش بەو شێوەیەی ئێمە نییە، ئەمەش بەو مانایە نایەت كە گلەیی و رەخنەمان نییە و خزمەتگوزاریی ئەنتەرنێت لە كوردستان بێ كەموكورتییە، ئێمە بەردەوام خواستمان زیاترە، تاوەكو خزمەتگوزارییەكی باشتر و كوالێتی بەرز و نرخێكی كەمتر پێشكەشی هاووڵاتیانی خۆمان بكەین.
* ئەو خزمەتگوزارییانەی دەكەونە چوارچێوەی كاری وەزارەتی گواستنەوە و گەیاندن، بەشی هەرە زۆریان كەرتی تایبەت جێبەجێیان دەكات، ئایا لەم بوارەدا چۆن كارەكانی كەرتی تایبەتتان رێكخستووە؟
- بەرنامە و كاری حكومەتی هەرێمی كوردستان بەرەو حكومەتی بچووك دەچێت(Small government)، واتا ئەو حكومەتە قەبەو گەورەیەی سۆشیالیستیمان ناوێت كە پێشتر حزبی بەعس ئیدعای بۆ دەكرد و كۆمەڵگەیەكی بێ بەرهەم و بەكارهێنەری لێ كەوتەوە، ئێمە لە حكومەتی هەرێمی كوردستان بڕوامان بە هاوبەشیی نێوان كەرتی حكومەت و تایبەت هەیە، پێمان وایە حكومەتێكی بەهێز واتا كەرتێكی تایبەتی بەهێزی نیشتمانپەروەر، پێویستە حكومەت بە رۆڵی چاودێری و ئاراستەكردن هەڵسێت و كەرتی تایبەتیش ئەو بارگرانی و بودجەیە لە سەرشانی حكومەت كەم بكاتەوە و بەشدارییەكی راستەقینەی لە بووژانەوەی ئابووریدا هەبێت و، كۆمەڵگەكەمان بەرەو كۆمەڵگەیەكی بەرهەمهێن ئاراستە بكات، نەك بەرەو كۆمەڵگەیەكی بەكارهێنەر. ئێمە لە وەزارەتی گواستنەوەو گەیاندن بڕوامان وایە دەبێت كۆمپانیاكانی گواستنەوە و گەیاندن لە رووی كەمیی نرخ و كوالێتی خزمەتگوزاریی باشەوە كۆمپانیا و كەرتێكی تایبەتی بەهێز بن، دەبێت بەرزترین ئاست و خزمەتگوزاری پێشكەش بە خەڵكی كوردستان بكەن و روو لە پڕۆژەی ستراتیژی و گەورە بكەن.
* پۆستە لایەنێكی گرنگی خزمەتگوزارییەكانی وەزارەتەكەتان بوو، ئایا بە میكانیزمێكی نوێ بۆ ژیانەوەی كاروبارەكانی پۆستە لە كوردستان چ بەرنامەیەكتان لە بەردەستدایە؟
- بۆ بووژانەوەی كاروبارەكانی پۆستە لەگەڵ هێڵی فڕۆكەوانیی عێراقی گفتوگۆكانمان دەستپێكردووە، پێشتر پۆستە لە رێگەی هێڵی فڕۆكەوانیی ئوردونەوە بەڕێوەدەچوو، ئێستا لە چاوەڕوانی رەزامەندیی ئەنجومەنی وەزیرانین، تاوەكو گرێبەست واژوو بكەین و لەمەودوا لە رێگەی هێڵی فڕۆكەوانیی عێراقەوە پۆستە بنێرینە دەرەوە، لە ناوخۆی كوردستانیشدا بۆ بووژانەوەی ئەم سێكتەرە گرنگە بیروبۆچوون و پێشنیارمان هەبێت، چونكە دەكرێت بە میكانیزمێكی پێشكەوتوو پۆستە بكرێتە كەرتێكی زیندووی وا كە چیتر لە نێوان وەزارەت و دامودەزگاكانی حكومەت بە شێوە تەقلیدییەكە هاووڵاتیان مامەڵەكانی خۆیان هاتوچۆ پێ نەكەن، بگرە هاووڵاتیان دەتوانن لە رێگەی پۆستەوە مامەڵەكانی پارەی كرێی كارەبا و ئاو و باجەكانیان بدەن، هاوكات بووژانەوەی كەرتی پۆستە لە كەمكردنەوەی رۆتین و گەندەڵی هاوكار دەبێت.
* هەڵبەتە جێبەجێكردنی ئەم بەرنامە و پلانانە بودجە و توانایەكی دارایی باشی دەوێت، ئایا تاچەند بڕواتان بەوە هەیە كە لەم كابینەیەدا ئەو بەرنامە چوار ساڵەی پێشكەشی ئەنجومەنی وەزیرانتان كردووە، جێبەجێ بكرێت؟
- رێزدار مسرور بارزانی سەرۆكی حكومەتی هەرێمی كوردستان و بەڕێز قوباد تاڵەبانی جێگری سەرۆكی حكومەت و كابینە وەزارییەكەیان، هەمووان پێكەوە لێكتێگەیشتنێكی باش و ئەو ئیرادە بەهێزەیان هەیە، كە لەم كابینەیەدا بارودۆخی ئابووریی هەرێم بە سەرجەم سێكتەرەكانیەوە وەرچەرخانێكی باش بەخۆیەوە ببینێت، بەڵام منیش ئەو راستییە دەزانم كە رێزدار سەرۆكی حكومەت گۆچانەكەی مووسای بەدەستەوە نییە، تا بتوانێت بەرد بگوشێت و ئاوی لێ دەربهێنێت، بەڵام ئەو لێكتێگەیشتنە و ئیرادەیە هێزێكمان دەداتێ بۆ چاكسازیی و گۆڕانكارییەكان و جێبەجێكردنی بەڵێنەكانمان، دەبێت بۆ جێبەجێكردنی ئەم كارە هەموومان لە خزمەتی جەنابیان بین و جەنابیشیان لە خزمەتی هەموو هاووڵاتیانی كوردستاندان، بۆ ئەوەی بتوانین بە باشترین شێوە و بەوپەڕی هێزی خۆمانەوە باشترین و شایستەترین خزمەت پێشكەش بە خەڵكی كوردستان بكەین.