دیمانە: رۆشنە عومەر


* بەڕێزت وەك خانمێكی ڕۆژنامەنووس و سەركردایەتی سیاسی، بۆئێمە جێگەی خۆشحاڵیە كە لێت بپرسین، ئایا چۆن ئاستی ڕۆژنامەگەری مێیینە لەكوردستان هەڵدەسەنگێنی، بەتایبەتی كە ئێستا خانمانی ڕۆژنامەنووس كەمتر لەدەزگاكانی ڕاگەیاندن دەردەكەون، دەزگاكانی ڕاگەیاندنی پارتیش لەم حاڵەتە بەدەرنین؟
- ڕۆژنامەنووسی كوردی پێشكەوتنی زۆری بەخۆیەوە بینیوە، چونكە ژمارەی كەناڵە ئاسمانیەكان و ڕۆژنامە و گۆڤار و ماڵپەری ئەنتەرنێت ئەوەندە زۆرن كە بەر لە10 ساڵ لەكوردستان ئەم دیاردەیە نەدەبینرا، ئەمە لەگەڵ ئەوەی هەتا ئێستاش لەهەندێك وڵاتی ناوچەكە ئازادی ڕادەبرین و ڕۆژنامەگەری ئۆنلاین قەدەغەیە، بەڵام لەبەر ئەو ئازادیەی لەكوردستان هەیە، جۆرەها ڕۆژنامە و گۆڤار و تەلەفزیۆن و ماڵپەری ئەنتەرنێت بەئازادی كاری ڕۆژنامەوانی خۆیان ئەنجام دەدەن، ئەمەش بۆتە هۆكاری ئەوەی هۆكارەكانی میدیا بەشێوەیەكی بەرچاو لەكوردستان بڵاو بێت، سەرەڕای ئەوەی كە كەموكوڕیش هەیە چ لەلایەنی حزب و حكومەتەوە بێت یان لەلایەنی خودی ڕۆژنامەنووسانەوەئەنجام نادەن، لەلایەنی حزبی و حكومەتییەوە ئێمە تا ئێستا فێری ئەوە نەبووین سیستم یان میكانیزمێك دابنێین كە چۆن زانیاری بدرێتە ڕۆژنامەنووسان، لەبەریتانیا كە زۆر پێشكەوتووە هەر وەزارتێك یان ئاژانسێكی حكومەت بەشی میدیای خۆی هەیە كە ڕۆژانە هەواڵ و چالاكییەكانی وەزارەتەكە دەنووسنەوە و بڵاو دەكەنەوە نەك تەنیا كارەكانی وەزیر یان بریكارەكەی، هەروەها سەركە‌وتنەكانی وەزارەتەكە بڵاو دەكەنەوە و زانیاری كۆدەكەنەوە و دەیدەن بەڕۆژنامەنووسان، لەكوردستان ئەمە هەیە، بەڵام نەگەیشتووینەتە ئەو ئاستەی كە زانیاری ڕێكوپێك و نوێ بەمیدیا بدرێت، ئەمەش زۆر جار خەتای حكومەت نییە، بەڵكو هەندێك جار ئامار و داتای ورد نییە، ئێمە سیستمێكمان نییە بۆ كۆكردنەوەی ئامار و داتاكان، بۆیە زۆر جار ڕۆژنامەنووس داوای هەندێك زانیاری دەكات كە لەلایەن حكومەتەوە نییە نەك وەك هەندێك كەس كە پێیانوایە حكومەت زانیاری دەشارێتەوە، بەڵام بەشێوەیەكی گشتی ئازادی هەیە و ڕۆژنامەنووسان بەئازادی هەموو شتێك دەنووسن دژی حكومەت و كەسایەتییەكان و خەڵك بەگشتی، بەڵام نووسینەكان بێ زانیاری و داتا و بێ دڵنیابوون لەڕاستی و دروستی نووسینەكان و هەبوونی بەڵگە لەسەریان كە لەئەوروپاش ئەم شتە قبووڵ ناكرێت، چونکە ئەوە دیاردەیەكی نا تەندروستە و دەبێتە هۆی چەواشەکردنی خەڵك و دوورخستنەوەیان لە ڕاستیەکان. لەكوردستان لەسایەی ئەو ئازادیەی کە دەستەبەر کراوە سەدەها ڕۆژنامە و هۆیەکانی تری ڕاگەیاندن هەیە لەکاتێکدا کە ژمارەی دانیشتوانیشی تەنیا 5 ملیۆن كەسە. بەڕای من ئەگەر هەر 3-4 دەزگای ڕۆژنامەوانی یەك بگرن لەناو یەك دەزگادا، ئەوا بەهێزتر دەبن و سوود لە شارەزاییەکان زیاتر وەردەگرن و ئەو بابەتانەی کە بڵاو دەکرێنەوە قازانجی زیاتری بۆ خوێنەر و بینەر دەبێت و دەبێتە مایەی ڕەزامەندیان. جۆرایەتی لەژمارە گرنگترە. لەلایەكی دیكە و سەبارەت بەو كەموكوڕیانەی كە پێوەندییان بەڕۆژنامەنووسانەوە هەیە بەڕای من ڕاهێنان لەكوردستان كەمە، ڕاستە زۆر لەڕۆژنامەنووسان دەرچووی كۆلێژن، بەڵام پێویستە دوای كۆلێژیش بەردەوام بن لەپەروەردەكردنی خۆیان لەبواری ڕۆژنامەگەری، ئەمەش لەكوردستان نییە و ئەگەر هەشبێت زۆر كەمە.


* ڕۆژ بەڕۆژ لەكوردستان ژمارەی ئافرەت لەڕاگەیاندن كەم دەبێت، ڕای جەنابت چیە؟
- ئەمەش دیاردەیەكی نا تەندروستە، چونكە ڕۆژنامەوانی كارێكە ئافرەت و پیاو دەتوانن ئەنجامی بدەن، قەڵەم و كیبۆردێكە، لەئەوروپا بۆ نموونە (بی بی سی و سی ئێن ئێن) زۆربەیان پێشكەشكاری بەرنامه و نووسەر و دیزاینەر و گرافیك و تەنانەت فۆتۆگرافەریش ئافرەتن، بەڵام لەوێش ئەگەر بچیت بۆ چینی سەرووتر ژمارەی ئافرەت كەمە، بەدەگمەن ئافرەت دەبێتە سەرنووسەر، ئەمەش دیاردەیەكی نا تەندروستە، من ماوەی 17 ساڵ ڕۆژنامەنووس بووم لەئەوروپا و كاتێك گەڕامەوە‌ لەكوردستانیش بۆ ڕۆژنامەكانی ئەوروپا لەسەر بارودۆخی كوردستان دەمنووسی، بۆیە دەڵێم كارێكی زۆر زەحمەت نییە كە ئافرەت نەتوانێت ببێت بەسەرنووسەر، ڕەنگە‌ لەكوردستان تا ئێستا ئەم جۆرە متمانەیە‌ بەئافرەت دروست نەبووبێت جا چ لەلای خودی خۆیانەوە بێت یان لەلای چینەکەی تر کە دەتوانێت ئەو کارە سەرکەوتووانە ئەنجام بدات، لەوانەیە پێویستی بە كات بێت.


* تۆ وەكو خانمێك كە كاری ڕۆژنامەوانیت بۆ ماوەیەكی زۆر كردووە بەنیازنیت لەكوردستان دەزگایەكی ڕاگەیاندن بۆ ئافرەت بكەیتەوە؟
- من زۆر خۆشحاڵ دەبم كە كارێكی لەو جۆرە ئەنجام بدەم، بەڵام من لە بەریتانیا نوێنەری حكومەتم، بۆ ئەنجامدان و سەرخستنی كارێكی لەم جۆرەش پێویستە خۆم لێرە بم بۆئەوەی سەرپەرشتی ئەو پڕۆژەیە بکەم و هانی ئافرەتان بدەم تا بێنە پێشەوە، بەڵام وەكو بیرۆكە شتێكی باشە.


* لەدوای كۆنگرەی 13پارتی ڕێژەی ئافرەتان لەسەركردایەتی پارتی بوو بە پێنج ئافرەت، ئەم ڕێژەیەش بەكۆتابوو ئەمەش مانای ئەوەیە هێشتا لەنێو پارتی ئافرەت بەدەنگی خۆی ناگاتە سەركردایەتی، ئایا ئێوە وەك ئافرەتە سەركردەكانی ناو سەركردایەتی پارتی بەرنامەتان چیە بۆ بەرەوپێشەوەچوونی پرسی ئافرەت لەكۆمەڵگەی كوردستاندا؟
- ڕاستە (كۆتا)ی ئافرەت لە سەركردایەتی پارتی لە 10% بوو. بۆیە ئێمە پێنج ئافرەت بووینە ئەندامی سەرکردایەتی و یەكێكیش بە یەدەگ دەرچوو. بەڵام دوو لەو پێنج ئافرەتە بە دەنگی ئەندامانی کۆنگرە دەرچوون، ئەمەش سەركەوتنێكی گەورەیە و مایەی خۆشحاڵییە، چونكە زۆربەی دەنگدەران پیاو بوون. لە كۆنگرەدا زۆر گفتوگۆ لەسەر بوون و نەبوونی (كۆتا) هەبوو، تەنانەت هەندێك لە ئافرەتانیش دژی (كۆتا) بوون، چونکە ئەوان کۆتایان بە خێر دەزانی لەلایەن پیاوانەوە، لەجیاتی ئەوەی ئافرەتەکە بە توانای خۆی سەركەوێت، من لەگەڵ (كۆتا) بووم. بەڕای من لەسەرەتادا (كۆتا) پێویستە، چونكە كۆتا پاڵنەرێكی بەهێز و یاریدەدەرێکی باشە بۆ ڕێگە خۆشکردن بۆ ئافرەتان تا بێنە پێشەوە. سیستەمی كۆتا لە ئەوروپا سەركەوتنی بەدەستهێناوە و چەندین جۆری جیاوازی كۆتا هەیە لەوێ. پێموایە بۆ سەركردایەتی یەك دوو جاری دیكە پێویستیمان بە (كۆتا) دەبێت، بەڵام هیوادارم ڕۆژێك لە ڕۆژان ئافرەت خۆی سەركەوێ. زۆر كەس بە منیان دەگوت تۆ پێویستیت بە (كۆتا) نییە، خۆت لە پڕۆسەی دەنگدانەکە سەرکەوتوو دەبیت، وەڵامی منیش ئەوەبوو کە حەز ناكەم بە تەنیا بم و هەموو تەركیز لەسەر من بێت و هەڵەی بچووكم لێ گەورە بكرێت و كەسیش سەركەوتنەكانم نەبینێت. به ڕای من ئەگەر چەند ئافرەتێك بە یەكەوە كار بكەن پاڵپشتی یەكتری دەكەن و شت لە یەكتر فێر دەبن، چونكە ئافرەتی بە توانا لە ڕیزەكانی پارتیدا زۆرن، بەڵام لای خەڵك ناسراو نین. لەوانەیە هۆکارەکەی بۆ ئەوە بگەڕێتەوە کە تا ئێستا بواریان پێنەدراوە بێنە پێشەوە یاخود شەرم دەكەن، یانیش بڕوایان بە خۆیان نییە كە چۆن بێنە پێشەوە، جا لێرە (كۆتا) پێویستە، چونكە ئافرەت و پیاو قبوڵی دەكەن. ئافرەتە سەركەوتووەكان دەبن بە نموونە بە ئینگلیزی پێیان دەڵێن (role model) واتە دەبنە ڕەمز. ئەو ئافرەتە سەركەوتووانە لەوانەیە هەر یەكێکیان لە بوارێكدا زیرەك و بە توانا بن وەك بوارەكانی (كۆمەڵایەتی، سیاسی، دیپلۆماسی). ئەگەر ئەم ئافرەتانە لە کارەکانیاندا سەركەوتوو بن، ئەوا خەڵك متمانەی زیاتریان بە ئافرەت دەبێت. ئەوانەی لە کۆنگرەی 13ی پارتی سەرکەوتن و بوون بە ئەندامی سەركردایەتی هەموویان خاوەن بەهرە و توانان، با دەرفەتی زیاتریان پێ بدرێت بۆ ئەوەی ببن بە نموونە، چونکە ئەگەر ڕێگە بە ئافرەت بدرێت ئەوا هەنگاو بە هەنگاو سەردەكەوێت و بەرەو پێشەوە دەچێت.


* ئێستا لەكوردستان عەقڵیەتی پیاو سالاری باڵا دەستە، ئەم عەقڵیەتە كۆمەڵێك كۆت و بەندی بەسەر ئافرەتان سەپاندووە، ئایا چۆن عەقڵیەتی پیاو سالاری دەگۆڕدرێت بۆ مرۆڤ سالاری؟
- ئەمە پێویستی بە كاتێكی زۆرە، ئێمە نامانەوێ شیرازەی كۆمەڵگەی كوردەواری تێك بچێت كە زۆر شتی باشی تێدایە، بەڵام لە هەمان كاتدا لەوانەیە ئەوە ئازادی ئافرەت سنوورداربکات، دەتوانین ئەمەش بگۆڕین. پەروەردە زۆر زۆر گرنگه. بۆیە ئەگەر ئەم نەوەی ئێستا خۆی پەروەردە و ڕۆشنبیر بكات لێرەش مەبەستم ئەوە نییە تەنیا بچێتە زانكۆ یان لە لایەنی ئەكادیمیەوە بێت، چونكە ئەوە لەبیر نەکەین کە ئافرەت دەبێتە دایك و دایكیش منداڵ پەروەردە دەكات و دەتوانێت كاریگەریی بەسەریانەوە هەبێت، كوڕەكانیان كە گەورە دەبن گرنگی بە ئافرەت دەدەن و ڕێزی زیاتری دەگرن، ئەمەش پێویستی بە بزاڤ و خەباتی زیاتری ئافرەتی كوردی هەیە، وەك ئینگلیز دەڵێن كەس دەسەڵاتت پێنادا پێویستە خۆت بە دەستی بهێنی، لە هەموو شوێنێك هەروابووە. لە بەریتانیا لە سەرەتای سەدەی بیستەم بزووتنەوەیەكی ئافرەتان هەبوو بەناوی (سۆفرەجێت) دژی نایەكسانی. ژمارەیەك لە ئافرەتانی ئەم بزووتنەوەیە زیندانی كران و گیانیان لە دەستدا، واتە لە ئەوروپاش ئافرەت وا بە ئاسانی مافەكانی خۆیان بەدەست نەهێناوە.


* ئەگەر تەماشا بكەین لەكوردستان تا ئێستا پێناسەی شەڕەف بەئافرەت گرێ دەدرێتەوە، ئایا بەڕێزت لەمبارەیەوە چی دەڵێیت؟
- پێویستە ئافرەت و پیاو بزاڤ بكەن بۆ ئەوەی توندوتیژی بە ناوی شەڕەف بنبڕ بكرێ. زۆر خۆشحاڵم كە جەنابی سەرۆك بارزانی و كاك نێچیرڤان بارزانی دژی توندوتیژین دەرهەق بە ئافرەت کە ئەمەش هەنگاوێكی زۆر گرنگە. لە هەمانکاتدا پۆلیسی کوردستان ئێستا ڕاهێندراون لەسەر چۆنیەتی مامەڵەکردن لەگەڵ ئەو ئافرەتانەی کە سکاڵا پێشکەش دەکەن بۆ پۆلیس لەسەر ئەوەی کە ژیانیان لە مەترسیدایە بۆ ئەوەی بتوانن ژیانی ئەو ئافرەتانە بپارێزن. لەهەمانکاتدا ئێستا‌ لە كوردستان شەلتەری تایبەت بە ئافرەتان هەیە، ئەو شتانە بەرلە دە ساڵ لە كوردستان نەبوون. ڕاستە كەموكوڕیش هەیە، بەڵام گرنگ ئەوەیە هەنگاوی باش نراوە. دیاردەی توندوتیژی بووەتە كەلتور کە بە ڕۆژێك و دووان ناگۆڕدرێت. پێویستە هەموو ئافرەتان و پیاوانی ڕۆشنبیر دژی دیاردەی توندوتیژی بوەستینەوە و هەموو لایەك فێری ئەوە بكەین كە ئەم دیاردەیە لە كۆمەڵگەی كوردەواری مایەی قبوڵ نییە.


* ئافرەت چۆن خۆی ئامادە بكات بۆئەوەی ئەم هەنگاوانە ببڕێت؟
- لە كوردستان هەنگاوی زۆر نراوە، ئێستا ئەنجوومەنی خانمان هەیە كە كارێكی باشە و خاتوو پەخشان زەنگەنە ئافرەتێكی لێهاتوو و تێگەیشتووە، هەروەها ئافرەتانمان لە بواری پۆلیس و ئاسایش كار دەكەن، هەرچەند زیاتر ئافرەت ببێتە توخمێكی بەشدار و ئەكتیڤ و تێكەڵاو بێت لەگەڵ کۆمەڵگە ئەوا ئەنجامی باشتری لێدەکەوێتەوە. نابێت ئافرەت هەمیشە لە پشت پەردە و لە ماڵەوە بێت و نەبینرێت. بۆیە پێویستە ئەم هەنگاوانە بەردەوام بن و ئافرەتان بەهێزتر بن. دڵنیام ڕۆژێك بە ئامانجەكانمان دەگەین. لە بەریتانیاش توندوتیژی دژی ئافرەت هەیە، بەڵام لەوانەیە زۆربەی جارەکان بەناوی شەڕەف نەبێت. خانمە پەرلەمانتاریکی بەریتانیا کە ناوی (ماگ مان)ـە كە دۆستی كوردە و بەر لە پێنج ساڵ وەزیری ئافرەتان بوو، پێی ڕاگەیاندم كە لە بەریتانیا هەر حەفتەیەك ئافرەتێك دەكوژرێت بە دەستی هاوسەرەکەی یان هاوڕێیەکەی. كەواتە توندوتیژی لە هەموو شوێنێك هەیە و زۆر بە زەحمەت كۆتایی دێت، بەڵام دەتوانین کار بکەین بۆ کەمکردنەوەی ڕێژەکە تا بەیەکجاری بنبڕ دەبێت.


* پێشتر وتیان دەبیتە ڕاوێژكاری ڕاگەیاندنی مەكتەبی ڕاگەیاندنی پارتی، بەڵام دەنگوباسەكە بێدەنگ بوو؟ لەو بارەیەوە ڕۆڵی تۆ لەڕاگەیاندنی پارتی چیە؟
- من 17 ساڵ ڕۆژنامەنووس بووم لەڕۆژنامەكانی بەریتانیا لەو ماوەیەدا 6 ساڵ لەژاپۆن كاری ڕۆژنامەنووسیم كردووە و زۆر خۆشحاڵم ئەگەر لەڕاگەیاندنی پارتی كار بكەم، چونكە ئەزموونم هەیە دەتوانم كارێك بكەم كە لەخزمەتی پارتیدا بێت، بێگومان ئەگەر ئافرەتێك لەو شوێنە هەبێت ئافرەتانی دیكەش دێنە پێشەوە، ئینگلیزەكان دەڵێن ئافرەت كە بیەوێ سەركەوێ پێویستە دوو ئەوەندەی پیاو كار بكات لەڕاگەیاندنیش پێویستە ئافرەتانمان كاری زیاتر بكەن بۆئەوەی سەربكەون، ئەمەش مانای ئەوە نییە كە ناتوانن كار بكەن.


* پێگەی كورد لەبەریتانیا چۆن دەبینی و ئایا ئەكەر كورد دەوڵەتی سەربەخۆ ڕابگەیەنێ كاردانەوەی لەبەریتانیا چۆن دەبێ؟ پێتوایە بەریتانیا پشتیوانی كورد بكات لەو بارەیەوە؟
- تا ئێستا بەریتانیا دەیەوێ عێراق بەیەكگرتوویی بمێنێتەوە، بەڵام عیراقێكی دیموكراسی، ئێمە پێمان ڕاگەیاندوون كە ئێمە دەمانەوێ عێراق دیموكراسی و فیدرالی بێت كە هەموو عیراقییەكان قبووڵی بكەن، بەڵام ئەگەر عێراق بەرەو دیكتاتۆریەت هەنگاو بنێت وەك سەرۆك بارزانی فەرمووی ئێمە چۆن لەگەڵ عێراق بمێنێینەوە، حكومەتی بەریتانیا لەوە تێگەیشتوون، بەڵام لەئێستادا دەیانەوێ عێراق بەیەكگرتوویی بمینێتەوە بۆئەوەی ڕۆژهەڵاتی ناوەڕاست سەقامگیر بێت، هەرچەندە ئێستاش سەقامگیر نییە.


* ئایا لەماوەی ڕابردوو تۆ وەك نوێنەری حكومەتی هەرێم چیت كردووە لەبارەی گواستنەوەی ئەزموونی بەریتانیا لەبایەخدان بەئافرەت و كەمكردنەوەی توندتیژی كە ئەمە ببێتە پێوەرێك لەهەرێمی كوردستانیش حكومەت سوود لەوە ببینێت؟
- وەك ئافرەتێك كاتێك سەردانی پەرلەمانی بەریتانیا دەكەم یان لەگەڵ بیزنسمانەكانی بەریتانیا كۆدەبمەوە یان سەردانی زانكۆكانیان دەكەم، ئەوان دەبینن کە نوێنەری حكومەتی هەرێم ئافرەتە. ئەمە خۆی لە خۆیدا ئاماژەیەكە بۆ ئەوەی كە لە كوردستان ئافرەت كار دەكات و ڕۆڵی بەرچاو لە ژیانی ڕۆژانەدا دەبینێت. جگە لە من ئافرەتی دیكەش هەن كە نوێنەرایەتی حكومەتی هەرێم دەكەن لە فەرەنسا و ئیتاڵیا. لە هەمانکاتدا لە بەریتانیا چەند ڕێكخراوێكی کوردی هەن دژی توندوتیژی بەرامبەر بە ئافرەتان، ئێمە هەوڵ دەدەین پشتگیرییان بكەین و لە کاتی ڕێکخستنی كۆنفرانس و سیمینار و دیدار و کۆبوونەوەکان لەلایەن ئەو ڕێکخراوانە، ئێمە پەرلەمانتارانی بەریتانیا و لایەنە پێوەندیدارەکانی ئەو وڵاتە ئاگادار دەكەینەوە بۆ ئەوەی ئەوانیش ئامادە بن. بەر لە چەند ساڵێك ڕێزدار نێچیرڤان بارزانی یارمەتی هەردوو زانكۆی بریستل و ڕۆهامبتنیدا بۆ ئەوەی لێكۆڵینەوەیەك ئەنجام بدەن لەسەر توندوتیژی دژ بە ئافرەت لە كوردستان، منیش لە دوورەوە چاودێری ئەو بەرنامەیەم دەکرد تا پڕۆژەکە سەرکەوتووانە تەواو بوو. لەگەڵ ئەوەی ژمارەی کارمەندانی نوێنەرایەتیەکەمان تەنیا 5-6 کەسە، بەڵام کارەکانمان زۆر فراوانن، لەوانەش پێوەندی لەگەڵ پەرلەمان و حكومەتی بەریتانیا و و خزمەتکردنی ڕەوەندی كورد لەو وڵاتە و گەشەپێدانی لایەنەکانی بازرگانی و پەروەردە و كلتوور و ئافرەتیش بەشێکی بەرچاوی کارەکانمانە. حەزدەکەم ئاماژە بەو بەرنامە بەرفراوانەش بدەم کە ئێستا لەبەردەستماندایە بۆ حاشانەکردنی حکومەت و خەڵکی بەریتانیا بەوەی کە گەلی ئێمە دووچاری جینۆساید بۆتەوە لەسەر دەستی ڕژێمەکانی پێشووی عیراق، وەك‌ ئەنفال و كیمیا بارانی هەڵەبجە و بێسەروشوێن كردنی 8000 بارزانی. پێشتریش لە گوندەكانی كەركوك و كوردە فەیلییەكان جینۆساید کراون. لە ئەوروپا و ئەمریكا خەڵك زۆر كەم ئاشنایە بەو كارەساتانە، ڕەنگە بزانن لە هەڵەبجە چەكی كیمیایی بەكار هاتووە، بەڵام وەك هۆلۆكۆست و جینۆسایدی بۆسنیا و ڕاوەندا پێی ئاشنا نین، بۆیە ئێمە ئێستا لە هەوڵی ئەوەداین کە بەرنامەیەك ئامادە بكەین بۆ ئەوەی خەڵكی بەریتانیا لەم کارەساتانەی کە بەسەر گەلەکەمان هاتوون ئاگادار بكەینەوە.


* بوونی ئافرەت لەكابینەی حەوتدا ڕێژەیەكی كەم لەئافرەت بەشداربوو ئێوە بۆچی هیچ هەوڵێكتان نەدا لەنێو پارتی بۆئەوەی ڕێژەی ئافرەت زیاد بكرێت؟
- من لەبەر ئەوەی لە بەریتانیا وەك نوێنەری حکومەت کاردەکەم هەندێك جار ناتوانم لە كۆبوونەوەكانی سەركردایەتیدا بەشدار بم، بەڵام سەرکردایەتی دەزانن کە من لەگەڵ ئەو ڕایەدام كە پێویستە ڕێژەی ئافرەت زیاتر بێت لە ناو حكومەت. بە ڕای من بوونی یەك ئافرەت بە تەنیا لە ناو حكومەت یان هەر دام و دەزگایەکی تر لە هەر شوێنێك بێت کارێکی ناخۆشە. تەركیزی هەموو لایەکی لەسەردەبێت و ئەگەر هەڵەیەكی بچووكیش ئەنجام بدات لێی گەورە دەكرێت، من هیچ بیانووەك نابینم بۆ كەمی ڕێژەی ئافرەت لە ناو حكومەت.


* بیستومانە پۆستەكەت دەگۆڕدرێ، ئەگەر پۆستەكەت بگۆڕێ بەرنامەت چییە؟
- مەبەستت لە نوێنەرایەتی حكومەتە لە ئەمریكا؟ منیش ئەو هەواڵەم لە ڕۆژنامەدا بیستووە، بەڵام بە فەرمی هیچ شتێك لە ئارادا نییە. ئەگەر كاك قوباد بگەڕێتەوە كوردستان بێگومان كەسێك لە شوێنی ئەو دادەنرێ، من ئامادەم لە هەر شوێنێك بێت خزمەتی پارتی و حكومەت و گەلی كورد بكەم.


* بۆ ئێستای كوردستان چ پەیامێكت هەیە بۆ خانمان؟
- پێیان دەڵێم بێ ئومێد مەبن، چونكە ئەوە زۆر پێویستە بۆ هەموو مرۆڤێك. لە کارکردن بۆ وەدەستهێنانی ئامانجەكانی خۆتان بەردەوام بن، ئەگەر ئەو ئامانجانەش دوور و سەخت بن، بەڵام بەردەوام کاری بۆ بکەن. ڕەنگە هەندێك كەس بڵێن ئەو سەركەوتنەی کە هەندێك لە ئافرەتان وەدەستیان هێناوە کارێکی ئاسان بووە. ئەگەر ئافرەت بەردەوام نەبێت لە كۆشش کردن و خۆ پەروەردەکردن و هەوڵدانی بەردەوام بۆ وەدەستهێنانی ئامانجەکان، ئەوا هەرگیز سەرکەوتوو نابێت. ڕاستە گەیشتن بە ئاوات ئاسان نییە، ئاستەنگت بۆ دروست دەبێت، خەڵكانێك ڕێگای سەركەوتنت لێدەگرن، ئەمەش ئاساییە و سروشتی ژیان وایە، بەڵام من دەڵێم بێ ئومێد مەبن و بڕواتان بە تواناكانی خۆتان هەبێت. لە هەمان كاتیشدا پێویستە ئافرەتان پشتیوانی یەكتر بن و پاڵپشتی یەکتر بکەن.