مەشقی وەرزشی یەكێكە لە باشترین رێگاكان بۆ خۆپاراستن لە نەخۆشیی خوێنبەرەكانی دڵ. مەشقی وەرزشی و زیادكردنی چالاكیی فیزیكی رۆژانە هەنگاوێكی كاریگەرە بۆ رێگرتن لە رەقبوونی خوێنبەرەكانی تاجی دڵ، هەروەها هەنگاوێكی كاریگەرە بۆ خۆپاراستن لەو حاڵەت و نەخۆشییانەی كە ئەگەری تووشبوون بە نەخۆشی دڵ زیاد دەكەن وەكو زیادبوونی كێش و قەڵەوی، بەرزبوونەوەی ئاستی كۆلیستیرۆل لە خوێندا، بەرزبوونەوەی پەستانی خوێن. كاریگەرترین مەشقی وەرزشی بۆ پاراستنی تەندروستیی دڵ بریتییە لە مەشقی هەوایی Aerobic exercise چونكە ماسولكە گەورەكان بە ریتم دەجوولێنرێن، بۆ نموونە رۆیشتن یان لێخوڕینی پایسكل. مەشقی هەوایی توانای دڵ بۆ گەیاندنی ئۆكسجین بە ماسوڵكەی دڵ زیاد دەكات بەوەی كە دڵ و سییەكان چوستتر لە حاڵەتی حەسانەوە كاردەكەن، دەرەنجام دڵ بەهێزتر دەبێت و باشتر كاری خۆی دەكات و بەرگە و لیاقەی زیاتر دەبێت. بە پێی رێنمایی كۆمەڵەی ئەمەریكی بۆ تەندروستیی دڵ، هەفتانە بەلای كەم 150 خولەك مەشقی وەرزشی مامناوەندی پێویستە، یان هەفتانە 75 خولەك مەشقی وەرزشی توند. هەر چەند مەشق بۆ ماوەیەكی زیاتر بێت، هێندە سوودەكانی زیاتر دەبن. مەشقی مامناوەندی وەكو رۆیشتن دەبێتە هۆی كەمێك زیادبوونی تێكڕای هەناسە و لێدانەكانی دڵ، كەچی مەشقی توندی وەكو راكردن تێكڕای لێدانەكانی دڵ و هەناسە گەلێك زیاتر دەكات. واباشترە كە مەشقی مامناوەندی بۆ ماوەی 30 خولەك لە زۆربەی رۆژەكانی هەفتەدا ئەنجام بدرێت یان لە 5 رۆژ كەمتر نەبێت.