مەشقی وەرزشی لەكاتی دووگیانیدا سوودێكی تەندروستیی زۆری هەیە لە زۆربەی ئافرەتاندا بە مەرجێك بە چاودێریی دكتۆردا بێت بەتایبەتی بۆ هەڵبژاردنی جۆر و ماوە و كاتی ئەنجامدانی مەشقەكە بەپێی مانگەكانی دووگیانی و كێشی لەش و تەمەن و لیاقەی پێش دووگیانبوون و تێكڕای تەندروستیی ئافرەت. ئەگەر هیچ ئاڵۆزییەكی پەیوەست بە دووگیانی رێگر نەبێت، ئەوا مەشقی وەرزشی بە درێژایی مانگەكانی دووگیانی ئەم سوودانەی هەیە: بەرزكردنەوەی ئاستی وزە لەگەڵ دەردانی ماددە ئیندۆرفینەكان Endorphins لە لەشدا كە مەزاج باشتر دەكەن، كەمكردنەوەی پشت ئێشە، بەهێزكردنی ماسوولكەكانی پشت و رانەكان، كەمكردنەوەی ئەگەری قەبزی، پاراستنی جومگەكان كە بە كاریگەری هۆرمۆنەكان لەكاتی دووگیانیدا سست دەبن، یارمەتیدانی خەوێكی ئارام بە هۆی كەمكردنەوەی سترێس و نیگەرانی پەیوەست بە دووگیانی و منداڵبوون، زیادبوونی هاتووچۆی خوێن لە پێستدا كە هانی گەشبوون و جوانیی پێست دەدات، زیادكردنی ئامادەباشی بۆ منداڵبوون پاش ئەوەی كە لیاقەی دڵ و تۆنی ماسوولكەكان باشتر دەبێت لەگەڵ زیادبوونی كۆنترۆلكردنی هەناسە و بەهێزكردنی توانای بەرگەگرتنی ئازار، خێرا گەڕانەوەی شێوەی لەش بۆ دۆخی پێش دووگیانی، كەمكردنەوەی ئەگەری تووشبوون بە ژاراویبوونی دووگیانی و شەكرەی دووگیانی Gestational diabetes.