تا ئێستا چەندین جۆری ریجیم لەبەردەستدان بۆ كۆنترۆڵكردنی كێشی لەش، بەڵام لە هەموویان باشتر كە ئامانجەكە دەپێكێت و نابێتە ئەگەری هیچ كێشەیەكی تەندروستی بریتییە لە ریجیمی كەمكردنەوەی كالۆری یان وزەی خۆراك بە هێشتنەوەی بڕی پێویستی رۆژانە لە ماددە خۆراكییە گرنگەكانی وەكو ڤیتامین و كانزا و ریشاڵ و ماددە دژەئۆكسانەكان. وشەی ریجیم Dieting واتە رێكخستنی بڕ و جۆری خواردن. بە گشتی چوار جۆری ریجیمی خۆراك لە ئارادان: ریجیمی كەمكردنەوەی چەوری Low-fat diets، ریجیمی كەمكردنەوەی كاربۆهیدرات Low-fat diets كە ئێستا زۆر بە كەمی پەیڕەو دەكرێت، ریجیمی سادەی كەمكردنەوەی وزە یان كەمكردنەوەی كالۆری Low-calorie diets كە دەتوانرێت رۆژانە 500-1000 كالۆری وزە لە خۆراكدا كەم بكرێتەوە بەمەشەوە هەفتانە نزیكەی نیو كیلۆگرام كێشی لەش دادەبەزێت یان تێكڕای بارستایی لەش بە رێژەی 8% لە ماوەی 3-6 مانگدا كەم دەبێتەوە، ریجیمی توندی كەمكردنەوەی وزە یان كالۆری Very low-calorie diets واتە رۆژانە تەنیا 200-800 كالۆری وزە لە خۆراك وەردەگیرێت بە كەمكردنەوەی چەوری و كاربۆهیدرات بە بێ كەمكردنەوەی پرۆتین، بەمەوە دەتوانرێت كە لەگەڵ مەشقی بەدەنی هەفتانە1- 2.5 كیلۆگرام كێشی لەش دابەزێنرێت، بەڵام زۆر پەسەند ناكرێت چونكە دەبێتە ئەگەری ونكردنی بارستایی ماسوڵكە و ئەگەری تووشبوون بە نەخۆشی بەگەكان Gout زیاد دەكات. پێویست دەكات كە ریجیم تەنیا لەژێر چاودێرییەكی نزیكی دكتۆر ئەنجام بدرێت بۆ رێگرتن لە روودانی ماكەكان، بێگومان مەشقی بەدەنی یان وەرزش بە یەكەوە لەگەڵ ریجیمدا ئەنجامی باشی دەبێت بۆ دابەزاندنی كێشی لەش.