چێوەچاو (لاینەر)، بەشێكە لە ئارایشت و رازاندنەوەی چاو. سیمای ئەو جۆرە ماكیاژە جوانییەكی زیاتر بە چاو دەبەخشێ، ئەگەر چی پێشتر خانمان كەمتر چێوەچاویان دەهێنا، كەچی ئێستا ئەوان گرنگیەكی زیاتری پێدەدەن. چێوەچاو بریتییە لە هێڵێك كە بە دەوری برژانگدا دەكێشرێت، كە وادەكات چێوە چەرمی چاو گەشتر و زەقتر خۆی دەنوێنێ. زیاتر هێلێكی رەشە یان رەنگاوڕەنگە، كە گۆشەی لای ژووری چاو دەست پێدەكات بەرەو گۆشەی لاجانگی چاو دەكشێت، لە كاتی ماكیاژكردندا خانمان كەرەستەی چێوەچاو لە ژوورەوە بەرەو دەرەوە بە هێلێك دەكشێن، بەڵام كە چاو دەكەنەوە برژانگی سەرێ و خوارێی چاویان كەوتۆتە نێوان چێوەی دوو هێڵ كە شێوەی چاویان گەشتر پیشان دەدات، ئەم ئارایشتە چەندین جۆری هەیە، كە بریتیین لەمانەی دادێن:
-چێوەچاوی بەرز، ئاسانترین و باوترین جۆری چێوەچاوە، تا بتوانی ئەو چێوەچاوە بكەی، دەبێ لاینەری شل بەكاربهێنێ، بە فڵچەكە بەسەر برژانگتا تێپەڕێنە لە گۆشەی لا جانگدا بە كەوانەیی بەرەو سەرەوەی ببە.دەبێ لە بەكارهێنانی ئەو چێوەچاوەدا ورد بیت، مەرجە هێلەكە ئەستوور بێت، بەڵام نابێ راستە و راست بێ، واباشە هێلێكی لار بێت لە بەشی دەرەوەی چاو.
-چێوەچاوی فیرعەونی، ئەو جۆرە چێوەچاوە لە سەرەتای ژوورەوەی برژانگ دەستپێدەكات، بەرەو دەرەوە دەچێ، لە دەرەوەی برژانگیش شێوەیەكی سێگۆشەیی نیشان دەدات، بەڵام هێڵەكەی باریكە، ئەوەش دەبێ بە دوو هێڵی تەریب لە سەرەوە و خوارەوەی برژانگ هەبێت.
-چێوەچاوی ماسی، جۆرێكی دیكەی هێڵكاری چاوە، بۆ دانانی ئەم چەشنە، دەبێ قەڵەمی سپی بەكاربهێنی تا برژانگت بە ئەستووری دیار بێ، كە هاوتەریب لە تەنیشت هێلكارە رەشەكە دەبێ.
-چێوەچاوی باڵندە، ئەم هێڵەش لە شێوەی باڵی باڵندە وایە، كە هاوتەریبە لەگەڵ براژنگی چاو، بەڵام كورتترە، دەبێ ئەستووریش بێ، لە ناوەوە باریكە و لەدەرەوەش بە ئەستووری هێڵەكە بكێشە، تا هێڵی برژانگت وەك باڵی باڵندە خۆی نیشان بدات.
-چێوەچاوی رەنگاوڕەنگ- جووت رەنگ: ئەگەر چی هەردەم چێوەچاو لە رەنگی رەشە، بەڵام كچان و خانمان دەتوانن مۆدی هێڵ چاوی رەنگاوڕەنگ یان دوو رەنگە بەكاربهێنن، ئەوەش بە دانانی دوو رەنگ كە رەنگی دووەمیان یان لەسەر یان لە خوارووی رەنگەكەی دیكە بێ، بەڵام مەرجە رەنگەكان لە رووی هارمۆنییەوە لەگەڵ یەكدا بگونجێن، یان لە یەك بچن.