ئەندریس راسمۆسن سكرتێرى گشتیى پەیمانى باكورى ئەتڵەسى (ناتۆ) راى گەیاند، ناتۆ بەنیاز نییە دەست وەربداتە سووریا تەنانەت ئەگەر نەتەوە یەكگرتووەكانیش بۆ پاراستنى مەدەنییەكان ئەو دەسەڵاتەى بداتێ، داوایشى لە وڵاتانى رۆهەڵاتى ناوەڕاست كرد رێگەیەك بۆ كۆتاهێنان بە توندوتیژى لە سووریا بدۆزنەوە.

راسمۆسن دوێنێ هەینى لە سەردانەكەیدا بۆ توركیا بە ئاژانسى رۆیتەرزى راگەیاند، ناتۆ بەنیاز نییە پاڵپشتى بۆ هیچ رێڕەوێكى مرۆیى بۆ گەیاندنى كۆمەكیی مرۆیى بە شارەكانى سووریا كە بەدەست هێرشى هێزەكانى ئەسەد بۆ سەر نەیارانى لە دۆخێكى نالەباردا دەژین، دەستەبەر بكا.

ناتۆ بەپێى رێگەپێدانى نەتەوە یەكگرتووەكان و پاڵپشتیى ژمارەیەك دەوڵەتى عەرەبی دەستى لە لیبیا وەردا و لەرێى هێزى ئاسمانییەوە پاڵپشتیى لە هێزى شۆڕشوانان لەدژى رێژیمەكەى موعەمەر قەزافى كرد، بەڵام راسمۆسن ئاماژەى بەوە دا ئەو دوو مەرجە لە دۆخى سووریادا بەدى نەهاتوون.

لەبارەى ئەوەى ئەگەر نەتەوە یەكگرتووەكان سەرپشكى بكا بۆ دەستوەردان لە سووریا ئاخۆ وەست وەردەدا، راسمۆسن گوتى \"نا، نا، پێم وانییە ئەوە رووبدا، لەبەرئەوەى سووریا كۆمەڵگەیەكى جیاوازە و لەرووى ئەتنى و سیاسی و ئاینییەوە ئاڵۆزترە، هەر بۆیە پێم وایە دەبێ لە ناوچەكەدا چارەسەرێكى بۆ بدۆزرێتەوە\""."