گوزەرانی ئابووریی هەرێمی كوردستان لە دوای ٢٠٠٣وە، بە هۆی نەبوونی پلانێكی نیشتمانیی تۆكمە و گشتگیر، تووشی ناهاوسەنگییەكی گەورە لە دابەشكردنی سەرمایە و پڕۆژە خزمەتگوزارییەكان بووەوە. جیاوازیی بەرچاو لە جێبەجێكردنی ڕێنماییە دارایی و گومرگییەكان لەنێوان دەروازە سنوورییە جیاوازەكاندا، بووە هۆی دروستبوونی كەلێنێكی سیاسیی قووڵ لە نێوان ناوچە جیاوازەكان و لاوازبوونی یەكڕیزیی نیشتمانی. ئەم ناڕەزایەتییە داراییە، لەگەڵ بەرزبوونەوەی بێكاریی گەنجان لە دوای ٢٠١٥، زیانی قورسی بە ئینتیمای نەتەوەیی نەوەی نوێ گەیاند.

هەرێمی كوردستان، بەپێچەوانەی دەوڵەتانی سەربەخۆی دوای هەڵوەشانەوەی سۆڤیەت، نەیتوانی ژێرخانێكی ئابووریی سەربەخۆ دابڕێژێت و تەنیا پشتی بە سێكتەری خانووبەرە و ئاوەدانكردنەوەی ڕووكەش بەست لەسەر حیسابی سێكتەرە بەرهەمهێنەرەكان. بۆ تێپەڕاندنی ئەم قەیرانە قووڵە، پێویستە هەرێم سوود لە ئەزموونی دەوڵەتانی هاوشێوەی قەتەر و ئێران وەربگرێت، ئەمەش لە ڕێگەی هەمەجۆركردنی داهات، پێشخستنی كەرتی كشتوكاڵ بۆ دابینكردنی ئاسایشی خۆراكی ناوخۆیی، و ڕێكخستنەوەی سیستمی باجی دادپەروەرانە لەسەر بنەمای زانستی بێت كە داهاتەكەی بگەڕێتەوە بۆ خەزینەی گشتی. لە ڕاستیدا، بەبێ سیستمێكی دارایی یەكگرتوو و دادپەروەر، مەحاڵە بتوانرێت گوتارێكی سیاسیی هاوبەش و نیشتمانێكی سەقامگیر لە ئایندەی نزیكدا بونیاد بنرێت.