لە ڕوانگەیەكی مێژووییەوە، ئابووری لە هۆكارێكی سەرەكیی جەنگ و ململانێوە، گۆڕاوە بۆ ئامرازێكی بەهێز بۆ دروستكردنی هاوپەیمانی و بەرژەوەندیی هاوبەش. پەیڕەوكردنی ئەم تێڕوانینە نوێیە بۆ گەلی كورد، كە بەسەر چوار پارچەدا دابەش بووە، گرنگییەكی ستراتیژیی هەیە. بەستنەوەی بازاڕەكان و دروستكردنی تۆڕێكی بازرگانیی هاوبەش لە نێوان هاووڵاتییانی سەرجەم ناوچەكاندا، دەبێتە هۆی تێكەڵاوبوونی فەرهەنگی و كۆمەڵایەتی، ئەمەش دیدگایەكی هاوبەش بۆ پاشەڕۆژی نەتەوەیی دەخوڵقێنێت. مێژووی دەوڵەتە گەشەسەندووەكان نیشانی دەدات كە یەكگرتوویی سیاسی لەسەر بنەمای بازاڕی هاوبەش بونیاد دەنرێت. ئابوورییەكی گەشەسەندوو، متمانە لەنێوان كەرتی گشتی و تایبەتدا دروست دەكات، كە هاووڵاتییان هان دەدات پاڵپشتیی قەوارەیەكی سیاسیی هاوبەش بكەن. بۆیە، ئابووریی هاوبەش تەنیا پڕۆژەیەكی دارایی كاتی نییە، بەڵكو ستراتیژییەتێكی نەتەوەییە بۆ تێپەڕاندنی سنوورە دەستكردەكان و بونیادنانی هۆشیارییەكی بەكۆمەڵ. ئەم پڕۆسەیە زەمینەیەكی گونجاو بۆ متمانەی دوولایەنە و سوودی گشتی دەڕەخسێنێت، كە لە كۆتاییدا ڕێگای گەیشتن بە سەقامگیریی سیاسی، یەكگرتوویی نیشتمانی و بونیادنانی دەوڵەتێكی نەتەوەیی كارامە و سەردەمیانە بۆ گەلی كورد لە ناوچەكەدا زۆر ئاسانتر دەكات، بە شێوازێك كە گەشەپێدان ببێتە بنەمای سەرەكیی پاراستنی ئاسایشی نیشتمانیی هاوبەش.