هونەرمەند حەمە هاشم لە هەولێرەوە 52 تابلۆی دەباتە وڵاتی رۆمانیا
ئەگەرچی مانگی ڕابردوو لە شاری لەندەنی وڵاتی بەریتانیا لە پێشانگەیەكی هاوبەشی شێوەكاری بەشداربوو,لە ئێستادا نووسەر و هونەرمەندی شێوەكار (حەمە هاشم)نوێترین پێشانگەی تایبەتی شێوەكاری خۆی لە شاری “ئۆرادیا”ی وڵاتی رۆمانیا دەكاتەوە,كە پێشانگەكە كۆمەڵێك تابلۆی نوێی ئەم هونەرمەندە لەخۆدەگرێت و یەكەمجارە نمایشیان بكات.
(ڕووخسارەكانی دوای جەنگ)كە ناونیشانی نوێترین پێشانگەی تایبەتی شێوەكاریی حەمە هاشمە,بڕیارە لە ڕێكەوتی 27/6/2026 دەكرێتەوەو بۆ ماوەی دوو مانگ بەردەوام دەبێت,ئەم هونەرمەندە بەفەرمی لەلایەن یەکێتی هونەرمەندانی شێوەکاریی رۆمانیاوە بانگهێشت کراوە و بە سەرپەرشتیی راستەوخۆی ئەنجوومەنی شارەوانی ئۆرادیا پێشانگەیەکە بەڕێوەدەچێت.
لە پێشانگەكەیدا نووسەر و هونەرمەند حەمە هاشم 52 تابلۆی نوێی خۆی نمایش دەکات كە ماوەی سێ ساڵە ئەم هونەرمەندە كار لەسەر درووستكردنیان كردووە و تاوەكو ئێستا نمایش نەكراون,وە بەشێك لە تابلۆكان قەبارە گەورەن و هونەرمەند بە تەكنیكی ئەكریلیك لەسەر كانفاس كێشاویەتی, حەمە هاشم لە تابلۆكانیدا هەستەكانی وەك خەم,بێهیوایی و خۆڕاگری بە شێوەیەكی كاریگەر بەرجەستە كردووە.
كارەكان باس لەو کاریگەری و وێرانکارییانە دەکات کە بەهۆی جەنگەوە رووبەڕووی جیهان و کوردستان بوونەتەوە,هەروەها تابلۆكان گوزارشت لەو ڕووخسارە ماندوو و ئازارچەشتوانە دەكەن كە شوێنەواری تاڵی جەنگ,توندوتیژی و ڕووداوە نەخوازراوەكانی ژیان شوێنەواریان لەسەر جێهێشووە.
گوڵان-ئاسۆ كاكەیی
