خوێندنەڤە یا پەیوەندی یێن ئالۆز یێن د ناڤبەرا سێگۆشە یا (ئەمریکا، ئیسرائیل و ئیران) دا، پێدڤی ب تێگەهشتنەکا کویر هەیە، کو ژ چوارچۆڤێ سادە یێ "شەڕ یان ئاشتی" دەربکەڤیت، ئەڤرۆ جیهان نە ب لۆژیکێ بڕیارێن ئێکلاکەر، بەلکو ب ستراتیژییا "برێڤەبرنا قەیرانان" دهێتە برێڤەبرن، ئەوا ئەڤرۆ روی ددەت، پتر هەڤڕکییا ئیرادەیانە نە هەڤڕکییا سوپایان؛ د ڤێ یارییا سیاسی دا، دانوستاندن و گەفێن سەربازی، هەردو وەکو ئامرازێن فشارێ و زمانێ دیپلۆماسی بۆ دەستکەفتێن ستراتیژی دهێنە بکارئینان.

ئەمریکا باش دزانیت کو هەر ڕووبەڕووبوونەکا ڕاستەوخۆ ل گەل تارانێ، دێ تێچوونەکا مەزن یا مرۆڤی، سەربازی و ئابووری ل سەر ئاستێ جیهانی هەبیت، ژبەر هندێ بژاردە یا "فشارا کۆنترۆلکری" پێ باشترە، ل بەرامبەر دا، ئیسرائیل بەرنامێ ئەتۆمی یێ ئیرانێ وەک هەڕەشەکا هەبوونی دبینیت، لێ بڕیارا وێ یا توند یا گرێدایی لێکدانەڤە یێن واشنتۆن و هەڤسەنگی یێن دەڤەرێ یە، خالەکا سەرەکی د ڤێ هەڤکێشەیێ دا، دووبەرەکییا ناڤخۆیی یە ل هەردو بەرەیان؛ ل ئەمریکا ململانێیەكا ئاشکرا د ناڤبەرا بەرەیێ "کۆترێن" دیپلۆماسیخواز و بەرەیێ "بازێن" شەڕخواز دا هەیە، ل ئیرانێ ژی، رەوتێ پراگماتی یێ خوازیارێ سڤککرنا سزایان، بەرامبەر رەوتێ توندڕەو یێ پارێزەرێ شکۆ یا هەرێمایەتی راوەستیایە، کو ئەڤە ژی هەلویستێ تارانێ ل ناڤبەرا گەفێن ئاشکرا و نەرمییا پشت پەردەیان دا هەلاویستی هێلایە.

ل سەر ئاستێ نێڤدەولەتی، ڕوسیا و چین ب چەکی پشتەڤانییا ئیرانێ دکەن و بەشداری یاریێنە، دا کو هەژمۆنا ئەمریکا لاواز بکەن، بێی کو ئابوورێ جیهانێ بکەڤیتە د مەترسییا شەڕەکێ گشتگیردا.

وڵاتێن کەنداڤی ژی، ژبەر ترسا ل سەر ئاساییشا خۆ و بەرژەوەندی یێن ئابووری، رێکا دیپلۆماسی و کێمکرنا گرژیێ هەلبژارتییە، ب رێکا ڤەکرنەڤەیەکا هەستیار ل سەر تارانێ د گەل پاراستنا هەڤپەیمانییا خۆ ل گەل واشنتۆن.

دەرەنجام ئەوە، کو ئەم د قۆناغا "نە شەڕ و نە ئاشتیێ" دانە، ئەگەر شەڕ ژی روی بدەت، ئیران دێ ب شێوازەکێ نە ئاسایی و ب رێکا بریکارێن خۆ ل دەڤەرێ و هەڕەشەکرن ل رێڕەوێن وزێ بەرەڤانیێ کەت، دا کو شەڕی بگوهڕیت بۆ شەڕەکێ درێژخایەنێ پڕ تێچوون، ژبەر کو ئەمریکا خودان باڵادەستییا تەکنۆلۆژی یە و ئیران خودان پێگەهەکێ ب هێز یێ جوگرافی و ستراتیژی یە، چ لایەن نەشێن سەرکەفتنەکا ئێکجاری ب دەست ڤە بینن، لەوا، دانوستاندن وەک بژاردەیەکا ئێکانە و بێ مەفەر دێ هەر مینیت.

ل دوماهییێ، دەڤەر نە ل سەر لێڤا شەڕی یە، بەلکو د ناڤ دڵێ هەڤکێشەیەکا توندی یا بەردەوام دایە، کو تێدا شەڕ و ئاشتی هەردو یێن هاتینە پاشئێخستن، لێ ئەو لایەن بۆ هەر بڕیارەکێ و رەوشەکێ ئامادەنە.