موسا ئەحمەد، سەرۆكی «دەزگای خێرخوازیی بارزانی»ـە و زیاتر لە بیست ساڵە لە ناوخۆ و دەرەوەی هەرێمی كوردستان، خزمەتی مرۆڤایەتی دەكات و ژیانی خۆی بۆ هاریكاریی مرۆیی تەرخان كردووە. لە گفتوگۆی ئەمجارەی «بازنەی گفتوگۆدا»دا (یەكبوونی كورد لەناو گۆڕانگارییەكانی ڕۆژهەڵاتی ناوەڕاستدا) بەمجۆرە دید و تێڕوانین و پێشنیارەكانی خستەڕوو.

 

 

سەرەتا زۆر سوپاسی بازنەی گفتوگۆی بەشی ڕۆشنبیری و ڕاگەیاندنی پارتی دیموكراتی كوردستان دەكەین كە لەسەر ئەم پرسە گرنگە «یەكبوونی كورد» ئەم گفتوگۆ ئاست بەرزەی ڕێكخستووە. هەروەها سوپاسی ئەو بەڕێزانە دەكەم كە لەم گفتوگۆیە ستایشی كارەكانی «دەزگای خێرخوازیی بارزانی»یان كرد.

لەم چوارچێوەیەدا كاتێك باس لە ناسنامەی نەتەوەیی و كولتووریی گەلی كوردستان دەكەین، زۆرجار ڕەهەندە سیاسی و مێژووییەكان زاڵ دەبن، بەڵام لە قووڵایی ئەم كۆمەڵگەیەدا، سامانێكی مەعنەوی و مرۆیی زۆر مەزن هەیە كە كەمتر وەك «سیستەم» تەماشا كراوە، ئەویش كولتووری بەخشین و دەستگرتنی لێقەوماوانە. ئەم خەسڵەتە كە لەناو جەرگەی مێژووی ئەم نەتەوەیەوە سەرچاوەی گرتووە، لە كاتی تەنگانە و قەیرانەكاندا وەك گەورەترین سەرمایەی كۆمەڵایەتی دەردەكەوێت. كوردستان خاوەنی كولتوورێكی دەوڵەمەندی وەسف نەكراوە لە بواری مرۆیی و بەخشیندا، كە ڕەنگە لە كەم وڵاتی دونیادا هاوشێوەی هەبێت. بەڵام پرسیارە جەوهەرییەكە لێرەوە دەست پێدەكات: چۆن توانراوە ئەم هەستە سرووشتییە و ئەم پەروەردە ڕەسەنە بگۆڕدرێت بۆ هێزێكی ڕێكخراو و كاریگەر كە سنوورە نیشتمانییەكان ببەزێنێت؟

بەداخەوە، یەكێك لەو گرفتە مێژووییانەی كە ڕووبەڕووی كۆمەڵگەی ئێمە بووەتەوە، پرسی ڕێكنەخستنی وزە و تواناكان بووە. لە دوای ڕاپەڕینە مەزنەكەی ساڵی ١٩٩١ و دروستبوونی قەوارەی هەرێمی كوردستان، چاوەڕوانییەكان وابوون كە هەموو كایەكانی ژیان ڕوو لە ڕێكخستن و دامەزراوەییبوون بكەن. كاری خێرخوازی و مرۆییش یەكێك بوو لەو بوارانەی كە پێویستی بە گۆڕانكاریی ڕادیكاڵ هەبوو. بۆ ماوەیەكی درێژ، بەخشین لای ئێمە تەنیا لە چوارچێوەی «هەستی كەسی» یان «خێرخوازییەكی كاتی» مابووەوە، كە ئەمەش نەیدەتوانی وەك پێویست وەڵامدەرەوەی قەیرانە گەورەكان بێت.

دەزگای خێرخوازیی بارزانی وەك وەڵامێكی ستراتیژی بۆ ئەم بۆشاییە هاتە كایەوە. یەكێك لە ئامانجە هەرە لەپێشینەكان ئەوە بوو كە بیسەلمێنێت دەكرێت «كولتوور» و «نەریتی بەخشین» بكرێتە «زانست و بەڕێوەبردن». لێرەوەیە كە چەمكی دامەزراوەییبوون دەبێتە خاڵی وەرچەرخان. كاتێك كارێكی مرۆیی لە ئاستی تاكەكەسەوە دەگوازرێتەوە بۆ ئاستی دامەزراوە، ئیتر نەك هەر كاریگەرییەكەی چەند هێندە دەبێت، بەڵكو دەبێتە جێگەی متمانەی كۆمەڵگەی نێودەوڵەتییش.

زۆرجار لە كۆمەڵگە پڕ كێشەكاندا، دامەزراوەكان تۆمەتبار دەكرێن بەوەی كە سەر بە لایەنێكی دیاریكراون، یان لە ناوچەیەكی تایبەتدا قەتیس ماون. ئەمە ئالنگارییەكی گەورەیە كە ڕووبەڕووی كاری مرۆیی دەبێتەوە. بەڵام ئەزموونی سەركەوتوو ئەوەیە كە بتوانێت لەوە تێپەڕێت و ببێتە موڵكی گشتی و سەرچاوەیەك بۆ هەمووان. لێرەدا دەبێت ئاماژە بەوە بكەین كە ئەگەرچی ڕەنگە زۆر دامەزراوە لە لایەنێكی سیاسییەوە پاڵپشتی بكرێن، یان سەرچاوەیان گرتبێت، بەڵام كاتێك دەبنە دامەزراوە كە بە واتا پیشەییەكەی، ئیتر دەبنە ناسنامەی نەتەوەیەك.

 

ئەو نموونە سەركەوتووانەی كە لە كوردستاندا هەن، توانیویانە لەو تۆمەتانە ڕزگاریان بێت و ببنە نوێنەری ویژدانی زیندووی خەڵكی كوردستان. ئەمە نەك هەر ئاسان نییە، بەڵكو پێویستی بە دیدگایەكی نیشتمانیی قووڵ هەیە. گرنگیی بوونی ئەم جۆرە دەزگا مرۆییانە لەوەدایە كە لە كاتی تەنگانەدا، جیاوازییە سیاسی و ناوچەییەكان دەتوێننەوە و تەنیا وەك دامەزراوەیەك دەمێنێتەوە كە بۆ خزمەتی مرۆڤایەتی كار دەكەن.

ئەو پێگەیەی كە ئێستا كاری مرۆیی كوردستان لە ئاستی جیهانیدا هەیەتی، بەرهەمی كارێكی ماندوویی نەناسی مەیدانییە. ئەندامبوون دەزگای خێرخوازیی بارزانی لە ئەنجومەنی كۆمەڵایەتی و ئابووریی نەتەوە یەكگرتووەكان (ECOSOC) نیشانەی ئەوەیە كە ستانداردە جیهانییەكان لەم دەزگایەدا پەیڕەو دەكرێن. ئەمە تەنیا ناو و ناونیشان نییە، بەڵكو بەرپرسیارێتییەكی گەورەیە. وەك دەبینین، دەزگایەكی وەك دەزگای خێرخوازیی بارزانی ئێستا لە زیاتر لە دە وڵاتی جیاوازدا ئامادەیی هەیە. ئەمە مانای چییە؟ ئەمە مانای ئەوەیە كە كوردستان تەنیا وەرگری هاوكاری نییە، بەڵكو بووەتە بەخشەرێكی كاراش لەسەر نەخشەی مرۆیی جیهان.

ئەم وەرچەرخانە لە «نەتەوەیەكی ئاوارە»وە بۆ نەتەوەیەك كە ئاوارە دەپارێزێت و هاوكاریی دەوڵەتانی دەوروبەریشی دەكات، گەورەترین دەستكەوتی مەعنەوییە. كاتێك ئێمە باس لە «سەرمایەی مرۆیی» دەكەین، مەبەستمان ئەو توانایەیە كە دەتوانێت لە كاتی بوومەلەرزە، لافاو، یان جەنگەكاندا، پێش دەزگای وڵاتە گەورەكان بگاتە شوێنی ڕووداوەكە. ئەم خێراییە و ئەم دڵسۆزییە، تێكەڵەیەكی سەمەرەیە لە نێوان «تەكنیك و ئۆرگانیزەكردنی سەردەمیانە» و «ڕۆحیەتی قوربانیدانی كوردی».

هێزی وەڵامدانەوەی خێرا: كات وەك فاكتەری ڕزگاركردنی ژیان

لە فەلسەفەی كاری مرۆییدا، «كات» تەنیا ژمارە نییە، بەڵكو هێڵێكی باریكە لە نێوان ژیان و مردندا. كاتێك كارەساتێكی سرووشتی وەك بوومەلەرزە ڕوو دەدات، یەكەمین چركەساتەكان دیاریكەری چارەنووسی هەزاران مرۆڤن. لێرەدایە كە جیاوازیی نێوان «كاری خێرخوازیی كلاسیك» و «كاری دامەزراوەیی مۆدێرن» دەردەكەوێت. دامەزراوەییبوون واتە داڕشتنی پلانێكی پێشوەختە، تیمێكی ئامادەباش و سیستمێكی لۆجیستی كە دەتوانێت لە كەمتر لە ٢٤ كاتژمێردا سنوورەكان ببەزێنێت و بگاتە چەقی كارەساتەكە.

ئەزموونی هەرێمی كوردستان لە بوومەلەرزە گەورەكەی توركیا و سووریادا، وەرچەرخانێكی مێژوویی بوو. گەیشتنی تیمەكانی فریاگوزاریی كوردستان بۆ ناوچە زیانلێكەوتووەكانی توركیا، تەنانەت پێش دەزگا ناوخۆییەكانی ئەو وڵاتە، تەنیا نیشانەی ئازایەتی نەبوو، بەڵكو بەڵگەی وەرچەرخانی كاری مرۆیی بوو بۆ سیستمێكی كارا. ئەمە ئەنجامی بوونی دامەزراوەیە، چونكە تەنیا دامەزراوەیەكی ڕێكخراو دەتوانێت لەو كورتە مەودایەدا میكانیزمەكانی جووڵە كارا بكات و بەربەستە ئیداری و سیاسییەكان تێكبشكێنێت بۆ گەیاندنی دەستی هاوكاری.

یەكێك لە پڕشنگدارترین لاپەڕەكانی كاری مرۆیی كوردستان، گەیشتنی كاروانە گەورەكانی هاوكاری بوو بۆ ڕۆژئاوای كوردستان لە ساتەوەختە هەرە تاریكەكاندا. كاتێك باس لە گەیشتنی پتر لە ١٠٠ ئۆتۆمبێل و تیمێكی ١٥٠ كەسیی شارەزا دەكەین بۆ ناو قامیشلۆ و شارە كوردستانییەكانی دیكەی ڕۆژئاوا، تەنیا باسی خۆراك و دەرمان ناكەین. لێرەدا ڕەهەندێكی دیكەی كاری مرۆیی دەردەكەوێت كە ئەویش «پشتیوانیی دەروونی و نەتەوەییە».

لەو ئانوساتەدا كە خەڵكی ڕۆژئاوا لەوپەڕی بێئومێدیدا بوون و خەریكی ئامادەكاری بوون بۆ جێهێشتنی ماڵ و حاڵیان و كۆچكردنێكی دیكەی بەكۆمەڵ، بینینی ئاڵای كوردستان و دەزگا مرۆییەكانی هەرێم لە ناو جەرگەی شارەكانیاندا، وەك موعجیزەیەكی دەروونی كاری كرد. ئەمە ئەو خاڵە جەوهەرییەیە كە زۆرجار ڕێكخراوە نێودەوڵەتییەكان ناتوانن دروستی بكەن. ئامادەیی مەیدانیی دەزگایەكی نیشتمانی لەو كاتەدا، ڕێگری لە كارەساتێكی دیكەی كۆچكردن كرد. كاتێك مرۆڤ هەست دەكات «مەرجەع»ێك هەیە، سەرۆكێك هەیە كە خەمیەتی و دەزگایەك هەیە كە دەتوانێت لە نیوەشەودا سنوورەكان ببڕێت و پێداویستییەكان بۆ خەڵكی لێقەوماو دابین بكات، ئیتر ئیرادەی مانەوەیان بەهێز دەبێت.

بۆ تێگەیشتن لە گەورەیی ئەو كارەی ئەنجامدرا، دەبێت پەنا ببەینە بەر بەراوردكاری. زۆرجار لە میدیا جیهانییەكاندا ئەو نموونەیە دەهێنرێتەوە كە چەندین وڵاتی دەوڵەمەند و خاوەن سوپای گەورە، لە ماوەیەكی دیاریكراودا نەیانتوانیوە ئەو بڕە هاوكارییەی كە پێویستە بیگەیەننە ناوچەیەكی گەمارۆدراوی وەك غەززە، یان شوێنەكانی دی. بەڵام هەرێمی كوردستان، بەو ئیمكانیەتە سنووردارەی كە هەیەتی و لەژێر ئەو هەموو فشارە سیاسی و ئابوورییانەدا، توانی كاروانێكی وا گەورەی هاوكارییەكان بگەیەنێتە ڕۆژئاوای كوردستان كە جیهانی تووشی سەرسوڕمان كردووە.

تیمەكانی دەزگای خێرخوازیی بارزانی تا ئێستا 433 بارهەڵگری گەورەی هاوكارییەكانی هەرێمی كوردستانی گەیاندووەتە ڕۆژئاوا، 394 هەزار 475 لیتر سووتەمەنی دابەش كراوە، زیاتر لە یەك ملیۆن نانی بێ بەرانبەر دابەش كراوە و پڕۆژەكەش بەردەوكامە. 9 هەزار 335 كەس چارەسەری پزیشكییان پێشكەش كراوە. هەزار و 858 هەلی كار دروست بووە.

ئەمە دەیسەلمێنێت كە سەركەوتنی كاری مرۆیی تەنیا بەند نییە بە «پارە»وە، بەڵكو بەندە بە «باوەڕ» و «ڕێكخستنی دامەزراوەیی». كاتێك سیستمێكی كارا هەبێت، دەكرێت بە كەمترین ئیمكانیەت گەورەترین كاریگەری دروست بكرێت. دەزگای خێرخوازیی بارزانی لێرەدا تەنیا وەك ڕێكخراوێك دەرنەكەوت، بەڵكو وەك نوێنەری ویژدانی نەتەوەیەك و وەك «دەرچەیەك» بۆ گەیاندنی هەستی برایەتیی باشوور بۆ هەموو پارچەكانی دیكەی كوردستان و دیاسپۆراش بووە.

ئەمڕۆ كاركردن لەگەڵ نەتەوە یەكگرتووەكان (UN) و ئاژانسە نێودەوڵەتییەكان پێویستی بە زمانێكی هاوبەش هەیە. دەزگا مرۆییەكانی كوردستان توانیویانە ئەو زمانە بدۆزنەوە. دانیشتن و گفتوگۆكردن لەگەڵ یوئێن بۆ گواستنەوەی هاوكارییەكان بۆ ناوچە ئاڵۆزەكانی وەك ڕۆژئاوای كوردستان، یان تەنانەت ئامادەكاری بۆ هاوكاری لە كاتی قەیرانەكانی ئێراندا، نیشانەی گەشەكردنی «دیپلۆماسییەتی مرۆیی» هەرێمی كوردستانە.

ئێمە ئێستا لە قۆناغێكداین كە جیهان وەك «ئەكتەرێكی بەرپرسیار» تەماشای دامەزراوە مرۆییەكانی كوردستان دەكات. ئەم متمانەیە سەرمایەیەكی سیاسی و دیپلۆماسیی گەورەیە بۆ هەرێمی كوردستان. كاتێك دەزگایەكی ناوخۆیی دەبێتە ئەندامی ئیكۆسۆك (ECOSOC)، ئیتر قسەكانی لە كۆڕ و كۆبوونەوە نێودەوڵەتییەكاندا كێشی یاسایی و مرۆییان دەبێت. ئەمە دەبێتە هۆی ئەوەی كە بتوانین ڕێگری لە شەپۆلەكانی ئاوارەبوون بكەین، نەك بە داخستنی سنوورەكان، بەڵكو بە گەیاندنی ژیان و هاوكاری بۆ ناو ماڵی لێقەوماوان لەو دیوی سنوورەكانەوە.

یەكێك لەو ڕاستییە حاشاهەڵنەگرانەی كە دەبێت بە قووڵی لێی ورد ببینەوە، ئەوەیە كە هیچ كارێكی مرۆیی مەزن و بەردەوام، لە بۆشاییدا دروست نابێت. ئەو دەستكەوتە مرۆییانەی كە لە بەشەكانی پێشوودا باسمان كردن، هەموویان لەژێر سێبەری قەوارەیەكی سیاسی و دەستووریدا گەشەیان كردووە كە ناوی هەرێمی كوردستانە. لێرەدا دەبێت ڕاشكاو بین، ئەگەر هەرێمی كوردستان وەك قەوارە بوونی نەبوایە، نەماندەتوانی ببینە ئەو دەرچە و پەناگەیەی كە نەك هەر بۆ كورد، بەڵكو بۆ هەموو لێقەوماوانی ناوچەكە بووەتە هیوایەكی گەورە. پاراستنی ئەم هەرێمە تەنیا ئەركێكی سیاسی نییە، بەڵكو ئەركێكی باڵای مرۆییە، چونكە لاوازبوونی ئەم قەوارەیە بە واتای وشكبوونی ئەو سەرچاوە مرۆییانەیە كە لە كاتی تەنگانەدا دەگەنە هانای لێقەوماوان.

 

ڕۆڵی مەرجەعییەت و ڕەهەندە دەروونییەكانی هاوكاری

لە كاتی كارەساتەكاندا، مرۆڤ تەنیا پێویستی بە نان و ئاو نییە، بەڵكو پێویستی بە «دڵنیایی» هەیە. ئەزموونی گەیشتنی دەزگا مرۆییەكانی كوردستان بۆ ڕۆژئاوای كوردستان، یان ناوچەكانی دیكە كە تووشی كارەسات بوون، ڕەهەندێكی دیكەی گرنگی هەبوو، كە پەیوەست بوو بە ڕۆڵی «مەرجەعییەت». كاتێك خەڵكی لێقەوماو دەبینن كە جەنابی سەرۆك بارزانی وەك ڕابەڕێك، ڕاستەوخۆ سەرپەرشتی و ڕاسپاردەی ناردنی هاوكارییەكان دەكات، هەستێكی قووڵی «پشتئەستووری»یان لادروست دەبێت.

ئەمە ئەو خاڵەیە كە لە زانستی دەروونناسیی كۆمەڵایەتیدا پێی دەوترێت «سەقامگیریی دەروونی لە ڕێگەی مەرجەعییەتەوە». خەڵكی ڕۆژئاوای كوردستان كاتێك كاروانەكانی هاوكارییان بینی، تەنیا وەك خۆراك تەماشایان نەكرد، بەڵكو وەك پەیامێكی سیاسی و نەتەوەیی تەماشایان كرد كە پێیان دەڵێت: «ئێوە تەنیا نین و هەرێمێكی بەهێز هەیە كە لە پشتانە». ئەم هەستە بووە هۆی ئەوەی كە خەڵك لە بڕیاری كۆچكردن و جێهێشتنی نیشتمانەكەیان پەشیمان ببنەوە. كەواتە كاری مرۆیی لێرەدا دەبێتە فاكتەرێكی سەرەكی بۆ پاراستنی دیمۆگرافیا و ڕێگریگرتن لە كارەساتی گەورەتری كۆمەڵایەتی.

لەگەڵ هەموو ئەمانەشدا، هەمیشە لە كاتی دروستبوونی دامەزراوەی بەهێزدا، هەندێك دەنگ دەبیسترێن كە هەوڵ دەدەن، ئەو كارانە لە قاڵبێكی تەسكدا وێنا بكەن، یان بە لایەنێكی سیاسی و ناوچەیەكی دیاریكراوەوە بیبەستنەوە. بەڵام واقیعی مەیدانی و كارنامەی دامەزراوە مرۆییەكانی كوردستان ئەو تۆمەتانەی بە كردەیی ڕەت كردەوە. كاتێك دامەزراوەیەك دەبێتە «سەرچاوە» بۆ تێكڕای كۆمەڵگە و سنوورەكان دەبەزێنێت، ئیتر ئەو دامەزراوەیە لە سنووری حزب و ناوچە دەردەچێت و دەبێتە موڵكی نیشتمان.

ڕاستە كە پشتگیریی سیاسی و حكوومی هەبووە بۆ دروستكردنی ئەم دامەزراوانە، بەڵام ئەمە خاڵی هێزە نەك كێماسی. لە هەموو جیهاندا، دەوڵەت و سەركردەكان پشتگیری لە دامەزراوەییبوون دەكەن. گرنگ ئەوەیە كە ئەم دامەزراوانە توانیویانە ببنە «سەرمایەیەكی مەزنی نەتەوەیی» كە هەموو كوردێك لە هەر شوێنێكی دونیا بێت، شانازییان پێوە بكات. گۆڕینی «هەستی مرۆیی» بۆ «سیستەمی مرۆیی» گەورەترین وەڵامە بۆ ئەو كەسانەی كە دەیانەوێت كاری مرۆیی لە ململانێ سیاسییەكاندا بچووك بكەنەوە.

ئێمە ئێستا لە ناوچەیەكدا دەژین كە بەردەوام لەناو جەرگەی گۆڕانكاری و قەیرانەكاندایە. هەر لە وەزعی ئێستای ڕۆژهەڵاتی ناوەڕاستەوە تا دەگاتە ئەگەری شەپۆلێكی دیكەی ئاوارەبوون لە ناوچە جیاوازەكان، هەمووی ئاماژەن بۆ ئەوەی كە پێویستیمان بە دامەزراوەیەك هەیە كە هەمیشە یەك هەنگاو لە پێش ڕووداوەكان بێت. ستراتیژیی ئێستای دامەزراوە مرۆییەكانمان ئەوەیە كە چۆن هاوكارییەكان بگوازینەوە بۆ ناو خاك و ناوچەكانی ئەو لایەنەی تووشی قەیران بووە، نەك چاوەڕێ بكەین تا ئاوارەكان ڕوو لە هەرێم بكەن.

گرنگترین بابەت لەم قۆناغە هەستیارەدا، پاراستنی ئەم قەوارەیەی هەرێمی كوردستانە. ئێمە لە سەردەمێكداین كە ناوچەكە بە ناو دەریایەك لە گۆڕانكاری و قەیراندا تێدەپەڕێت، لە جیاتی ئەوەی چاومان لەوە بێت، چۆن پارچەیەكی دیكەی كوردستان ڕزگار بكەین، دەبێت سەرەتا فێری ئەوە بین چۆن ئەم پارچەیەی كە هەمانە بیپارێزین. پاراستنی هەرێم یانی پاراستنی ئەو مۆدێلە دەوڵەمەندەی مرۆڤدۆستی، یانی پاراستنی ئەو دەستە میهرەبانەی كە دەگاتە ڕۆژئاوا، باكوور و ڕۆژهەڵاتی كوردستان لە كاتی كارەساتەكاندا. ئەمە نەك هەر ئەركێكی سیاسی، بەڵكو گەورەترین بەرپرسیارێتیی مرۆیی و ئەخلاقیی هەر تاكێكی كوردە.

ئەم مۆدێلە كە لە ڕۆژئاوای كوردستان تاقی كرایەوە و سەركەوتنی گەورەی بەدەست هێنا، دەبێت بكرێتە بنەما بۆ مامەڵەكردن لەگەڵ ئەگەری هەر قەیرانێكی دیكە لە ناوچەكەدا. ئەمە نیشانەی ئەوەیە كە كوردستان گەیشتووەتە قۆناغێك لە پێگەیشتنی دامەزراوەیی كە دەتوانێت «سەقامگیری» هەناردەی دەوروبەری بكات.

لە دوماهیدا دەگەینە ئەو ئەنجامەی كە گەلی كوردستان خاوەنی سەرمایەیەكی مەزنی مرۆییە كە ڕەگەكەی لە كولتوورێكی ڕەسەنی بەخشیندایە. ئەوەی لەم چەند ساڵەی دواییدا ڕوویدا، گۆڕینی ئەم كولتوورە بوو بۆ «دامەزراوەیەكی پڕۆفیشناڵ» كە جیهان حیسابی بۆ دەكات. ئەم ئەزموونە دەوڵەمەندە، بە هەموو كێماسی و ئالنگارییەكانیەوە، باشترین بەڵگەیە لەسەر توانای تاكی كورد بۆ بونیادنانی دامەزراوەی مۆدێرن.

با هەموومان پێكەوە، بە دڵسۆزی و دیدگایەكی نیشتمانییەوە، كار بۆ بەهێزكردنی دامەزراوەكانمان و پاراستنی قەوارەی هەرێمەكەمان بكەین، چونكە تەنیا لەو ڕێگەیەوە دەتوانین كەرامەتی مرۆڤ و شكۆی نەتەوەكەمان لەم جیهانە پڕ لە گۆڕانكارییەدا بپارێزین.