لە باكووری كوردستان دەیان خانمە هونەرمەند هەن كە سەرەڕای ئاستەنگە جۆراوجۆرەكانی بەردەمیان، خاوەن توانایەكی بێ سنوورن لە كاری هونەری و پاراستنی ڕەسەنایەتیی هونەری كوردی و هێشتنەوەی زمان و كەلتوور بە زیندوویی لە ڕێگەی كارە هونەرییەكانیانەو، بنەفش جزیری یەكێكە لەو كچە هونەرمەندانەی كە بە دەنگە ڕەسەنەكەی لە تەمەنێكی زوودا هاتە نێو بواری هونەری كوردی، لەم دیمانەیەدا تیشك دەخاتە سەر چەند لایەنێكی پەیوەست بە هونەری كوردی بە گشتی.

بنەفش پێیوایە میدیا ڕۆڵێكی زۆر گرنگی لە كاری هونەریدا هەیە و لەم بارەوە دەڵێ: «گومانی تێدا نییە كە ڕۆڵی میدیا بۆ هونەرمەند زۆر گرنگە لە سەرتاسەری جیهاندا، بەڵام ئەوەی كە گرنگە میدیاكان بە هیچ شێوەیەك بابەتی (نا ڕاست) دەربارەی هونەرمەندان بڵاو نەكەنەوە، بەداخەوە ئەمە گرفتێكی گەورەیە، زۆر جار هەواڵ و بابەتی نادروست بڵاو دەكەنەوە، بۆ من هیچ جیاوازییەك لە نێوان پارچەكانی كوردستاندا نییە، كە ماوەی زیاتر لە دە ساڵە من لە بواری هونەریدام، بەداخەوە تا ئێستا هەندێك ڕۆژنامەنووس نازانن من لە كام پارچەی كوردستانم و زۆر جار زانیاریی نادرووست لەسەر ژیانی من بڵاو كراوەتەوە، ئەمەش مایەی شەرمەزارییە، هیوادارم ڕاگەیاندن خزمەت بە هونەر بكات، بەڵام خزمەتێكی درووست».

لە بارەی ڕۆڵی سۆشیال میدیا بنەفش دەڵێ: «ئێستا لە سەرتاسەری جیهاندا سۆشیال میدیا بازاڕی كۆنتڕۆڵ كردووە، وەك جاران كڕینی ئەلبووم نەماوە، تەنانەت من لەو باوەڕەدام كە بە یەكجاری نەمینێت، بۆیە كاری سینگڵ بۆ هونەرمەندی كورد بەتایبەتی لەبەر ئەوەیە كە هونەرمەندانی كورد هیچ مافێكیان بەسەر ئەلبوومەكانی خۆیدا نەماوە و بە ئاسانی كۆپی دەكرێ و مافی پارێزراو نییە، من زۆر جار تووشی ئەو كارە بوومەتە و بەرهەمەكانی من بەر لەوەی بڵاو بكرێتەوە(كۆپی كراوە) لەبەر ئەوە كارێكی نۆرماڵە كاتێك هونەرمەندانی كورد ڕوو لە كار سینگڵ دەكەن چ بە گۆرانی یان كلیپ، هەروەها هونەرمەند خۆی دەزانێت چۆن بەرهەمەكەی خۆی بڵاو دەكاتەوە و سوودی لێ دەبینێت، جا بە سنگڵ بێت یان ئەلبووم، بەڵام گرنگ ئەوەیە هونەرێكی ڕەسەن و جوان پێشكەش بكات، چونكە ئەلبووم سەرمایەی هونەرمەندە، بۆیە گرنگ ئەوەیە هونەرەكەی ڕەسەن بێت،ئەو ئەلبوومە دەبێتە هۆی ئەوەی كە بەهاكەی بەرزتر بێتەوە».

بنەفش جزیری لە بارەی پێوەرەكانی بۆ هەڵبژاردنی بەرهەمەكان دەڵێ:

«هونەرمەندانی كورد ئەرك و ماندووبوونێكی زۆر دەكێشن تا بەرهەمێك بەو شێوەی هەیە پێشكەشی دەكەن، من بەر لە ئەنجامدانی هەر پرۆژەیەكی هونەری بە وردی لەسەر گشت لایەنەكانی كار دەكەم، بەتایبەتی لەسەر تێكست و ئاوازەكەی، لە گشت لایەنەكانی دەكۆڵمەوە بۆ ئەوەی بتوانم بە باشترین شێوە پێشكەشی بكەم، ئامانجی سەرەكیی من ئەوەیە لە ڕێگەی هونەرەكەمەوە خزمەتی گەلەكەم بكەم لە هەر شوێنێكی دنیا بێت. ئێمەی هونەرمەندانی كورد توانا و ئیمكانیاتمان هەیە كە بتوانین خزمەتی هونەری كوردی بكەین، بۆیە من كارەكان بە وردی هەڵدەسەنگێنم و ئامانجی سەرەكیم ئەوەیە تەنیا خزمەت بە هونەری كوردی بكەم، دەمەوێت كارێك پێشكەش بكەم لە ئاستی قوربانییەكانی میللەتەكەمدا بێت، چونكە میللەتی كورد شایستەی ئەوەیە كاری جوانی پێشكەش بكەیت».

دواتر باسی لە ئەركی هونەرمەندان كرد و ئاماژەی بەوە كرد كە هونەرمەندبوون ناوێكی گرانە، كارێكی ئاسان نییە و هەر كەسێك ناتوانێت ناو لە خۆی بنێت هونەرمەند، یان بە هونەرمەند بانگ بكرێت، ئەگەر سەیری هەموو پارچەكانی كوردستان بكەین، دەبینین بە دەیان هونەرمەند هەیە، هەبوون كە زیاتر لە پەنجا ساڵ لەو بوارەدا كاریان كردووە و خزمەتی زۆریان كردووە و، هەوڵیان داوە هونەری كوردی بە گشتی پێش بكەوێت. ئێستا دەركەوتنی هونەرمەندان زیاتر لە بۆنە و بیرەوەرییەكاندایە، لەم بارەوە دەڵێ:

«بێگومان كاری هونەری و كۆنسێرت تەنیا لە بۆنەكاندایە، ئەویش دەگەڕێتەوە بۆ سەختیی ژیان و كاركردن، كە وای كردووە تەنانەت بۆ بۆنەكانیش كات و شوێنێكی گونجاو نییە تا ئامادەسازی و پڕۆڤەی تێدا بكرێت، لەگەڵ ئەوەشدا لە زۆرترین چالاكییەكاندا بایەخ بە شێوازی ئاهەنگئامێز دەدرێت، كە شایی و هەڵپەڕین دەگرێتەوە، بە بۆچونی من ئەمەش دەگەڕێتەوە بۆ چەند هۆكارێك، لەوانە غوربەت لەو وڵاتانە وا دەكات ساتێك بەدوای كەشێكی ئاهەنگئامێزی پتر شادیدا بگەڕێن، ئەمەش وا لە دەنگبێژ و هونەرمەندەكان دەكات كە بە ناچاری پەنا بۆ ئەو شێوازە لە هونەر ببەن، لەگەڵ ئەمەشدا خۆشبەختانە كەسانێك هەن كە بە جدی هونەردۆستن و مەبەستیانە چێژ لە میوزیك و گۆرانی ببینن و، چەند ساتێكی ئارام گوێگری كۆنسێرتێك بن لە ئاستێكی باڵادا».

بنەفش تیشكی خستە سەر گرووپە هونەرییەكان كە ڕۆڵیان هەبووە لە پێشخستنی هونەری كوردیدا و ڕوونی كردەوە كە ئەو گرووپانە ڕۆڵیان زۆر كاریگەر و بەرچاوە، بۆیە شایەنی ڕێز و تەقدیرن، چونكە ئەو گرووپە هونەرییانە كار و خەباتێكی زۆریان كرد لەپێناو پاراستنی هونەری كوردیدا، بەتایبەتی هونەری فۆلكلۆری ڕەسەن و پاراستنی لە فەوتان و لەناوچوون، ئەوان لە سەردەمێكدا كاریان كرد، كە بووە هۆكاری ئەوەی چەندین هونەرمەندی گەنج و لاو پەیوەندییان پێوە بكەن و، خۆشەویستیی هونەر و زمانی كوردی لە دڵی ئەواندا چەكەرە بكات و بەردەوام بن».