پاپا فرانسیس، سەرکردەی کاسۆلیکی جیهان دەڵێت: ئەو پیاوانەی کە توندوتیژی دژی ژنان دەکەن کارێکی خراپ  دەکەن و دوورن لە مرۆڤایەتی.

ئاژانسی ڕۆیتەرز، وتەکانی پاپای بە یەکێک لە توندترین ئیدانەکردنی ئەو توندوتیژیانە وەسـف کرد.

وتاری پاپا شەوی یەکشەممە لە بەرنامەیەکی تەلەڤیزیۆنیی ئیتاڵیدا پەخش کرا.

لە بەرنامەکەدا، کە لە " تی جەی 5 " پەخش کرا، پاپا قسەی لەگەڵ سێ ژن و پیاوێک کرد، کە هەموویان بارودۆخی قورسیان هەبوو.

پاپا لە وڵامی پرسیاری یەكێك لەو ژنانەی کە قوربانی توندوتیژی خێزانی بووە، دەڵێت: ژمارەی ئەو ژنانەی کە لە ماڵەکانیان توندوتیژیان لە بەرامبەر كراوە، تەنانەت لەلایەن هاوسەرەکانیانەوە زۆر زۆرە.

گوتیشی: بە بڕوای من ئەم جۆرە ڕەفتارانە شەیتانی و ڕیسوایی یە  و دوورە لە مرۆڤایەتی، چونکە ئەمە دەستدرێژی کردنە بۆ سەر کەسێک کە ناتوانێت بەرگری لە خۆی بکات و تەنیا دەتوانێت (هەوڵ بدات) بۆ ڕێگرتن لە لێدان .

 

 

 

گوڵان: سەردار خەلیل