بەڕێوەبەری خوێندنی كوردی لە كەركووك ڕایدەگەیەنێت، لەسەر بڕیاری مەسرور بارزانی، سەرۆكی حكوومەتی هەرێمی كوردستان بڕە پارەیەك بۆ قوتابخانە كوردییەكانی شارەكە تەرخان كرا.

شێرزاد ڕەشید، بەڕێوەبەری خوێندنی كوردی لە كەركووك، ڕاگەیاند، : "لەسەر بڕیاری مەسرور بارزانی، سەرۆكی حكوومەتی هەرێمی كوردستان بڕی (147178500) سەد و چل و حەوت ملیۆن و سەد و حەفتا و هەشت هەزار و پێنج سەد دینار، بۆ هاوكاری قوتابخانە كوردییەكانی شاری كەركووك بۆ كڕینی پێداویستییەكانی قوتابخانەكان تەرخان كرا".

گوتیشی: "بڕی 3 ملیار دینار لەلایەن حكوومەتی هەرێمی كوردستانەوە بۆ هەموو قوتابخانەكانی هەرێمی كوردستان تەرخان كراوە كە دەستەی كارگێری بە لیژنەیەك هەر قوتابخانە و پشكێكی پارەی بۆ كڕینی پەڕاوگە و پێداویستییەكانی تر وەردەگرێت، ئەوەش بەهۆی ئەوەیە كە ئێستا لەناو قوتابخانەكان فرۆشگا داخراوە و قوتابخانەش هیچ داهاتێكی نییە و پێویستی زۆریشی هەیە، لەو سێ ملیار دینارە كە بۆ هەموو هەرێمی كوردستان خەرج كراوە پشکی کەرکووکیشی تێدایە كە بەپێی ژمارەی قوتابیان بڕە پارەكە دەدرێت بە قوتابخانەکان".
basnews -