نەوزاد شێخ کامیل بەڕێوەبەری گشتی بازرگانی لە وەزارەتی بازرگانی و پیشەسازی حکومەتی هەرێمی کوردستان، لە لێدوانێکی تایبەتدا بۆ گۆڤاری "گوڵان" تیشکی خستە سەر ئاڵێنگارییەکانی پرۆسەی وەرگرتنی گەنمی جوتیاران بۆ وەرزی ئەمساڵ و ڕایگەیاند کە هەرێمی کوردستان بە فەرمی ناڕەزایەتی بەرامبەر ئەو بڕە کەمە دەربڕیوە کە حکومەتی فیدراڵ بۆ وەرگرتنی گەنمی جوتیارانی هەرێم دیاری کردووە.

بەپێی وتەکانی نەوزاد شێخ کامیل، لیژنەی باڵای گەنم لە عێراق تەنیا (٢٩٢) هەزار تەن گەنمی بۆ ئەمساڵی هەرێمی کوردستان دیاری کردووە. ناوبراو ئاماژەی بەوە کرد کە ئەم بڕە بە هیچ شێوەیەک قبوڵکراو نییە و وتی: "ئێمە وەک لایەنی پەیوەندیدار بەو بڕە ڕازی نەبووین، چونکە ساڵی ڕابردوو کە ساڵێکی وشکەساڵی بوو، حکومەتی عێراق (٤٠٠) هەزار تەنی وەرگرت، چۆن دەبێت بۆ ئەمساڵ کە بەرهەم زۆر زیاترە، بڕەکە کەم بکەنەوە؟"
بەڕێوەبەری گشتی بازرگانی ئاشکرای کرد کە ئەمساڵ نزیکەی (٣ ملیۆن و ٥٠٠ هەزار) دۆنم زەوی بە گەنم چێندراوە. بەهۆی بارانبارینی زۆر و دابینکردنی بنەتۆی نایاب لەلایەن حکومەتی هەرێمەوە، چاوەڕوان دەکرێت داهاتێکی یەکجار زۆری گەنم هەبێت. جەختیشی کردەوە کە سایلۆکانی هەرێم لەوپەڕی ئامادەییدان و دەتوانن بڕێکی زۆر گەنم بە شێوەیەکی زانستی کۆگا بکەن، کە ئەمەش سوودێکی گەورەی بۆ ئاسایشی خۆراکی ناوخۆ دەبێت.
سەبارەت بە مافە داراییەکانی جوتیاران، نەوزاد شێخ کامیل ڕایگەیاند کە تەنیا پارەی گەنمی ساڵانی ڕابردوو (کە ئاماژەی بە ساڵی ٢٠٢٣ کردووە لە چوارچێوەی بودجەدا) بڕی زیاتر لە (١٩٥ ملیار دینار) لای حکومەتی فیدراڵ ماوەتەوە. وتیشی: "بەردەوام لەسەر هێڵین لەگەڵ وەزارەتی بازرگانی عێراق بۆ وەرگرتنی ئەو پارەیە، چونکە ئەمە مافێکی سەرەتایی جوتیارانە بۆ ئەوەی بتوانن پەرە بە کارەکانیان بدەن."