ڕۆیتەرز ڕۆژی هەینی 8ی ئایاری 2026، بە پشتبەستن بە وێنەکانی مانگی دەستکرد ڕایگەیاند: کە نیشانەکانی ئەگەری دزەکردنی نەوت لە ئاوەکانی دەوروبەری دوورگەی خارگ کە گرنگترین تێرمیناڵی هەناردەکردنی نەوتی ئێرانە بەدی کراوە.

بەگوێرەی ڕاپۆرتەکە، ئەو وێنانەی لە نێوان 6 بۆ 8ی ئایاردا گیراون، پەڵەیەکی خۆڵەمێشی و سپی لە بەشی ڕۆژئاوای دوورگەکەدا دەردەخەن کە شارەزایان دەڵێن لەگەڵ ڕژانی نەوتدا یەکدەگرێتەوە.

توێژەرێک لە ڕوانگەی ململانێکان و ژینگە ڕایگەیاند، پەڵەکە ڕووبەرەکەی نزیکەی ٤٥ کیلۆمەتر چوارگۆشەیە.

ئاژانسی ڕۆیتەرز لە زاری شارەزایانەوە ڕایگەیاندووە، ئەگەری ڕووداوەکە ڕەنگە گەورەترین ڕژانی نەوت بێت لەو کاتەوەی کە ڕووبەڕووبوونەوەکانی ئەم دواییەی نێوان ئەمریکا و ئیسرائیل و ئێران نزیکەی ٧٠ ڕۆژ لەمەوبەر دەستیپێکردووە، هەرچەندە تا ئێستا هۆکاری ورد و ئەگەری سەرچاوەی دزەپێکردنی نەوتەکە دیاری نەکراوە.

 

 

 

گوڵان: سەردار خەلیل