بە هەزاران پەنابەر لەو کەمپانەی یۆناندا دەژین کە تەنیا بۆ سێ هەزار کەس ساز کراون و وەزیری یارمەتیی ئاوەدانکردنەوەی ئەڵمانیا کە بەسەری کردوونەتەوە، دەڵێت ئەوە مایەی شەرمە بۆ ئەورووپا.

بەپێی زانیاریی ماڵپەڕی (dw) گرد مولەر، وەزیری یارمەتییە ئاوەدانکردنەوەی ئەڵمانیا کەمپەکانی لە دوورگەکانی "لسبووس و موریا"ی لە یۆنان بەسەر کردووەتەوە و ئاشکرای کردووەتە کە زۆریی پەنابەران و ناستانداردبوونی شوێنی ژیان و گوزەرانیان مایەی شەرمە بۆ وڵاتانی ئەورووپی.

ئاماژەی بەوەش داوە: "ئەو دۆخەی کە لەناو کەمپەکان هەیە، دۆخێکی دژە مرۆییە و بە هەزاران پەنابەر لەناو کەمپەکان بە زۆرەملێ نیشتەجێ کراون و لەناویدان ٢٠ هەزار ژن و منداڵ لە ژینگەیەکدا کە هیچ جۆرە پێداویستییەکی ژیان و گوزەرانی تێدا نییە، لەوپەڕی بێدەرتانیدا دەژین".

گرد مۆلەر، دۆخی ئەو کەمپانەی بە "مایەی شەرم"ی وڵاتانی ئەورووپی لەقەڵەم داوە و داوای پشتیوانیی ئەو پەنابەرانەی ناو کەمپەکان و دابینکردنی مافەکانیانی کردووە و ڕای گەیاندووە گواستنەوەی منداڵان بۆ وڵاتانی ئەرووپی ڕێگەچارەیان نییە.

چەند کەمپێک لە دوو دوورگەی "لسبووس و موریا"ی لە یۆنان کە لە بنەڕەتدا بۆ سێ هەزار کەس ساز کراون، ئێستا زیتار لە 20 هەزار پەنابەر تێیاندا نیشتەجێ کراون و ئەمەش لە کاتێکدایە کە نەبوونی پێداویستیی تەندروستی و خواردن و مەترسییەکانی کۆرۆناش دۆخی ژیانیانی تاڵ کردووە.

دوو مانگ لەمەوبەر بە فەرمانی ڕەجەب تەیب ئەردۆغان سەرکۆماری تورکیا دەرگای هەموو کەمپی ئاوارە و پەنابەران لە تورکیا کراوەیەوە و بە سەدان هەزار پەنابەر ڕوویان لە سنوورەکانی یۆنان کرد، بەڵام یۆنان بەرەنگاری ئەو شەپۆلی پەنابەرانە بووەوە و کۆمەڵێکی زۆریان پەڕینەوە و کۆمەلێکی دیکەشیان گەڕانەوە ناو خاکی تورکیا و بەشێکیشیان لە خاڵە سنوورییەکان لە دۆخێکی زۆر ئەستەمدا دەژین.











باسنيوز