بارزان سلێمان مزورى، خودانێ هژماره‌كا موەلیدێن كاره‌بێ ل گوندێ (مێرسیدا) سه‌ر ب قه‌زا شێخان ڤه‌ دبێژیت:لدیڤ راسپارده‌یا (مه‌سرور بارزانى) سه‌رۆكێ حكومه‌تا هه‌رێما كوردستانێ، دگه‌ل هاتنا ڤایرۆسێ كۆرۆنایێ بو ناڤا هه‌رێما كوردستانێ و ژ به‌رچاڤگرتنا ئه‌ڤان كاودانێن هه‌ستیار نها هه‌رێم تێدا ده‌رباز دبیت، مه‌ ب فه‌ر دیت ده‌ستێ هاریكاریێ بۆ هژماره‌كا خه‌لكێ درێژ بكه‌ین كو ئه‌م رابوینه‌ بۆ ده‌ما (2) هه‌یڤان مه‌ پارێ كاره‌با موەلیدێ وه‌رنه‌گرتیه‌.

خودانێ ئه‌وان موەلیدێن كاره‌بێ ئه‌و چه‌نده‌ ژى دا دیاركرن: ل گوندێ (مێرسیدا) سه‌ر ب ناحیا (ئه‌ترۆش) سه‌ر ب قه‌زا شێخان ڤه‌ ل سنورێ پارێزگه‌ها دهۆكێ،‌ مه‌ هژماره‌كا موەلیدێن كاره‌بێ هه‌نه‌ كو (100) ئه‌مپێرێن كاره‌بێ بوخه‌لكێ گوندێ ناڤبرى هاتنه‌ راكێشان و وه‌كه‌ هاریكارى بۆ خه‌لكێ گوندی هه‌یڤا بۆرى مه‌ چ پاره‌ ژ خه‌لكى وه‌رنه‌گرتیه‌ و بۆ هه‌یڤا(4) ژى مه‌ بریار دایه‌ پاره‌ى ژ خه‌لكێ گوندى وه‌رنه‌گرین.

ناڤبرى ئاماژه‌ ب وێ چه‌ندێ ژى دا: ئه‌م هیڤیخوازین ئه‌ڤ ره‌وشا هه‌ستیار زوى دوماهى بهێت لێ ئه‌گه‌ر پێتڤى بوو، ئه‌م به‌رهه‌ڤین پارێ هه‌یڤا(5) ژى وه‌رنه‌گرین و هیڤیخوازین هه‌ر ده‌وله‌مه‌نده‌ك لدیڤ شیانێن خۆ ده‌ستێ هاریكاریێ بۆ خه‌لكێ درێژ بكه‌ت تا كو ئه‌م وه‌كه‌ خه‌لك و ده‌وله‌مه‌ند بشێن دگه‌ل حكومه‌تا هه‌رێما كوردستانێ ئه‌ڤێ ره‌وشێ ده‌رباز بكه‌ین.














باسنیوز