ده‌زگاى خێرخوازیی بارزانى له‌ ڕاگه‌یاندراوێكدا ئاماژه‌ به‌وه‌ ده‌دات، پەنابەرێکی رۆژئاوای کوردستان کە دانیشتووی کەمپی دارەشەکرانی پەنابەرانی ڕۆژئاوای کوردستانە، تووشی په‌تاى کۆرۆنا بووە، بەڵام ئەم تووشبووە بۆ ماوەی نۆ رۆژە بەمەبەستی کارکردن لە کەمپ چووەتە دەرەوە و لەو ماوەیەدا سەردانی کەمپی نەکردووە.

ئه‌مڕۆ دووشه‌ممه‌ 27/4/2020، ده‌زگاى خێرخوازیی بارزانى، ڕاگه‌یاندراوێكى بڵاو كرده‌وه‌ و، تێیدا هاتووه‌: "لە ڕۆژی 18/4/2020، ئەو پەنابەرە بە مەبەستی کارکردن لە یەکێک لە کۆمپانیاکانی کوردستان داوای لە بەڕێوەبەرایەتیی کەمپی دارەشەکران کردووە کە کەمپەکە بەجێ بهێڵێت و پێی ڕاگەیەندراوە کە لەماوەی کەرەنتینەدا بۆی نییە بگەڕێتەوە کەمپ، ئەم رێوشوێنە بەپێی بڕیاری وەزارەتی ناوخۆی هەرێمی کوردستان، بۆ سەرجەم دانیشتوانی کەمپ جێبەجێ کراوە.

ئه‌وه‌ش خراوه‌ته‌ ڕوو: "پاش نۆ ڕۆژ لە جێهێشتنی کەمپ، پەنابەری تووشبوو بە كۆرۆنا بە مەبەستی گەڕانەوە بۆ کەمپ داوایەک پێشکەشی بەڕێوەبەرایەتیی کەمپی دارەشەکران دەکات و داوای لێ دەکرێت، تێستی کۆرۆنا بکات، پێش ئەوەی بتوانێت بێتەوە ناو کەمپەکە، دوای تێستی کۆرۆنا دەرکەوت کە ئەو پەنابەرە یەکێکە لە هەڵگرانی ڤایرۆسەکەیو و ڕێگری کرا لە گەڕاندنەوەی بۆ ناو کەمپی دارەشەکران و بەو پێیەش هەتاکوو ئێستا دانیشتوانی کەمپەکە مەترسیی تووشبوونی ڤایرۆسی کۆرۆنایان لەسەر نییە و قەدەغەی هاتوچۆش تا بەتەواوەتی کۆنترۆڵکردنی ڤایرۆسی کۆرۆنا بەردەوام دەبێت".

ده‌زگاى خێرخوازیی بارزانى ڕوونیشى كردووه‌ته‌وه‌، تێستی کۆرۆنا بۆ خێزانی ئەو تووشبووە کراوە، ئەمڕۆ دووشه‌ممه‌ 27/4/2020، بەشێوەیەکی هەڕەمەکی تێست بۆ دانیشتوانی کەمپی دارەشەکران دەکرێت.











باسنیوز