لە چاوەڕوانی هیچ كەسێكدا نەبوو كە موستەفا ئاكنجی سەرۆكی باكووری قوبرس كە بە (قوبرسی توركیا) ناوی دەهێنرێت، دژی هێرشی توركیا بۆ سەر رۆژئاوای کوردستان بێت، بۆیە بەرپرسانی توركیاش بە توندی ئیدانەی لێدوانەكانی دەكەن.

ئاكنجی لە پێگەی خۆی لە تویتەر هەڵوێستی وڵاتەكەی لەبارەی هێرشی توركیا بۆ سەر رۆژئاوا راگەیاند و دەنووسێت: "ماوەی ١٠ ساڵ دەبێت خاكی سووریا تێر بووە لە شەڕ، دە ساڵە ئەو وڵاتە خوێنی لێ دەچۆرێت، بۆیە ئەگەر هەروا شەڕ بەردەوام بێت، ئەستەمە بتوانن بگەنە ئاشتی و بەم شێوەیەی ئێستاش هەرگیز ئاشتی بەرپا نابێت. بۆیە پێویستە بۆ ئارامی و خۆشگوزەرانی توركیا، دایالۆك لە نێوان تورك و كورد و عەرەبدا دروست ببێت".

ئەم بۆچوونەی ئاكنجی فوئاد ئۆكتای جێگری سەرۆك كۆماری توركیای تووڕە كردوە، بۆیە لە پێگەی خۆی لە تویتەر دەنووسێت: "ئیدانەی ئەو لێدوانەی دەكەم، دیارە ئاكنجی چاوی نابینێت ئاشتی لەگەڵ یەپەگەی تیرۆریستدا ناكرێت".

لە بەرانبەردا عومەر چەلیك گوتەبێژی ئاكەپە لە كۆنگرەیەكی رۆژنامەوانیدا گوتی: "ئەم لێدوانەی ئاكنجی لەكەیەكی رەشی گەورەیە. دەبێت ئەو رێز لەو شەهیدانەی قوبرس بگرێت كە ئێستا هیسك و بریسكیان لەو وڵاتەدا هەیە و بەرامبەر بە تیرۆر شەڕیان كردووە".












باسنيوز