نووسینگەی کاروباری مرۆیی لە بەڕێوەبەرایەتی خۆسەر بڵاوی کردەوە، بەهۆی بۆردومانەکانی تورکیا ٧٥٠ خێزانی داعش لە کەمپی (عەین عیسا) لە نزیک گرێ سپی و سەرێ کانی رایان کردووە.

بەڕێوەبەرایەتیی خۆسەر هۆشداریی دەدات، دۆخەکە مەترسیدارە و نزیکە لە کۆنترۆڵ دەربچێت.

لەمبارەوە پەیامێنری کەناڵی (کوردستان24) ئاشکرای کردووە، فڕۆکەکانی تورکیا کەمپی (عەین عیسا)یان بۆردومان کردووە و هەوڵ دەدەن رێگای نێوان شارەکان ببڕدرێت، بەڵام تاکوو ئێستا نەگەیشتووەتە ئەو ئاستە.

سەرەڕای نیگەرانییەکان، هیچ ئاماژەیەک لەسەر ئاستی نێودوڵەتی بۆ وەستانی جەنگ و بۆردومانەکانی سوپای تورکیا لە رۆژئاوای کوردستان نییە و تاکوو دێت ژمارەی ئاوارە و قوربانیان زیاتر دەکات.

بەپێی دوایین ئامار و داتاکان هەتا ئێستا ١٣٠ هەزار هاووڵاتی لە ناوچە جیاجیاکانی ڕۆژئاوای کوردستان بەهۆی بۆردومانەکانی تورکیا ئاوارە بوون، نزیکەی ٣٠ هاووڵاتیی سڤیل و نزیکەی ٥٠ شەڕڤان شەهید بوون و ١٥٠ هاووڵاتیی سڤیل و شەڕڤانیش لەو شەڕەدا بوونەتە قوربانی.

هاوکات بەشێکی زۆر لە ئاوارەکان لە ڕەشێکی خراپدان و لەڕووی ئیمکانات و بەتایبەتی ئاوی خواردنەوەیان پێ ناگات.










باسنيوز