لەگەڵ هاتنی یەکەم رۆژی وەرزی پایز، ئەمڕۆ شەممە، یەکەم بەفری ساڵ لە پارێزگای ئەردەخانی باکووری کوردستان باری و پلەکانی گەرما بەشێوەیەکی بەرچاو دابەزین.

بەفرەکە لە لووتکەی چیای ساهارای سەر بە پارێزگای ئەردەخان و خانووەکانی گوندی یاڤوزکۆی نزیکی لووتکەکەی سپیپۆش کرد.

هەر بەهۆی بەفربارینەکە، تەمومژێکی زۆر ئاستی بینینی بۆ چەند مەترێک کەمکردەوە، بایەکی بەهێز ناوچەکەی گرتەوە و بەوەش شۆفێران رووبەڕووی ئاستەنگی هاتووچۆ بوونەتەوە لەسەر شەقامەکان.

بەڕێوەبەرایەتیی کەشناسی ناوچەکەش رایگەیاندووە، بەفربارین و دابەزینی پلەکانی گەرما بەردەوامدەبێت، داوای لە شۆفێرانیشکردووە زیاتر ئاگاداری خۆیان بن لە کاتی لێخۆڕین لەسەر شەقامەکان.